ନନ୍ଦିଘୋଷ ବ୍ୟୁରୋ : ରାଜ୍ୟସଭାରେ ବିଜେଡି ସାଂସଦ ମାନସ ରଂଜନ ମଙ୍ଗରାଜଙ୍କ ଅଣତାରକା ପ୍ରଶ୍ନ। ଓଡ଼ିଶାରେ ଦୁଗ୍ଧ ସମବାୟ ସମିତିକୁ ମଜଭୁତ କରିବାକୁ କୌଣସି ସ୍ଵତନ୍ତ୍ର ପଦକ୍ଷେପ ନିଆଯାଇଛି କି। ଜିଲ୍ଲା ୱାରି କେତୋଟି ଏପରି ସମିତି ଓ କେତେ ଦୁଗ୍ଧ ଚାଷୀ ଅଛନ୍ତି। ଦୁଗ୍ଧ ପ୍ରକ୍ରିୟାକରଣ ପ୍ଲାଣ୍ଟ ଓ ମାର୍କେଟ ଲିଙ୍କେଜ ପାଇଁ କେତେ ସହାୟତା ପ୍ରଦାନ କରାଯାଇଛି। ଓଡି଼ଶାର ଦୁଗ୍ଧ ଚାଷୀମାନେ ଯେମିତି କ୍ଷୀରର ଉଚିତ ମୂଲ୍ଯ ଠିକ୍ ସମୟରେ ପାଇବେ, ସେଥିପାଇଁ କଣ ସବୁ ପଦକ୍ଷେପ ନିଆଯାଇଛି ବୋଲି ପ୍ରଶ୍ନ କରିଥିଲେ ସାଂସଦ ମାନସ ରଂଜନ ମଙ୍ଗରାଜ। ତାଙ୍କର ଏହି ସବୁ ପ୍ରଶ୍ନର ଉତ୍ତରରେ ସମବାୟ ମନ୍ତ୍ରୀ ଅମିତ ଶାହା ଉତ୍ତର ଦେଇଛନ୍ତି, ଓଡି଼ଶା ସମେତ ସାରା ଦେଶରେ ଦୁଗ୍ଧ ସମବାୟ ସମିତିଗୁଡ଼ିକୁ ମଜଭୁତ କରିବା ପାଇଁ ଅନେକ ପଦକ୍ଷେପ ନେଉଛନ୍ତି। ଏ ଦିଗରେ କାମ କରୁଛି ନ୍ୟାସନାଲ ପ୍ରୋଗ୍ରାମ ଫର୍ ଡାଏରି ଡଫଲପମେଣ୍ଟ ବା NPDD । ଦୁଗ୍ଧ ଚାଷୀ ସଂଗଠନ, MPO ଙ୍କ ପାଇଁ NDDB ହେଉଛି ଷ୍ଟେଟ୍ ଇପ୍ଲିମେଣ୍ଟିଂ ଏଜେନ୍ସି। ତେବେ ବର୍ତ୍ତମାନ ସୁଦ୍ଧା ଓଡ଼ିଶା ପାଇଁ କୌଣସି MPO ମଂଜୁର ହୋଇ ନାହିଁ। ସଂଶୋଧିତ NPDD ଯୋଜନାରେ ଶ୍ଵେତ ବିପ୍ଲବ ୨.୦ କାର୍ଯ୍ୟକାରୀ କରାଯାଉଛି। ଏହାର ଲକ୍ଷ୍ଯ ହେଉଛି ସମବାୟ ସମିତିର ସଂପ୍ରସାରଣ, ନିଯୁକ୍ତି ସୁଯୋଗ ସୃଷ୍ଟି ଓ ଦୁଗ୍ଧ ଉତ୍ପାଦନରେ ମହିଳାଙ୍କ ଅଂଶଗ୍ରହଣକୁ ବୃଦ୍ଧି କରିବା। ଏହି ଯୋଜନାରେ ଗ୍ରାମାଞ୍ଚଳରେ ଦୁଗ୍ଧ ସଂଗ୍ରହ କେନ୍ଦ୍ର ସ୍ଥାପନ, କ୍ଷୀର ଶୀତଳିକରଣ, ଟ୍ରେନିଂ ଓ କାପାସିଟି ବିଲଡିଂ ପାଇଁ ଆର୍ଥିକ ସହାୟତା ପ୍ରଦାନ କରାଯାଉଛି। ଶ୍ଵେତ ବିପ୍ଲବ ୨.୦ରେ ୮୫୪୭ଟି ଟି ନୂଆ ଦୁଗ୍ଧ ସମବାୟ ସମିତି ପ୍ରତିଷ୍ଠା ପାଇଁ ଓଡ଼ିଶାକୁ ଦିଆଯାଇଛି ଟାର୍ଗେଟ। ଏହା ସହିତ ବର୍ତ୍ତମାନ ଥିବା ୧୧୪୦ ସୋସାଇଟିକୁ ମଧ୍ୟ ମଜଭୁତ କରିବାକୁ ଲକ୍ଷ୍ୟ ରଖାଯାଇଛି। ଏଥିପାଇଁ NPDD ଯୋଜନା ଅଧୀନରେ ଆର୍ଥିକ ସହାୟତା ପ୍ରଦାନ କରାଯାଉଛି। ୧୩ ଜାନୁଆରି ୨୦୨୬ ସୁଦ୍ଧା ଓଡ଼ିଶାରେ ୪୯୪ଟି ନୂଆ ଦୁଗ୍ଧ ସୋସାଇଟି ପ୍ରତିଷ୍ଠା କରାଯାଇଛି। ଦୁଗ୍ଧ ଚାଷୀଙ୍କୁ ଆର୍ଥିକ ସହାୟତା ପ୍ରଦାନ ପାଇଁ ସପୋର୍ଟିଂ ଡାଇରି କୋଅପରିଭ୍ ଆଣ୍ଡ ଫାର୍ମର ପ୍ରଡ୍ୟୁସର ଅର୍ଗାନାଇଜେସନ ଯୋଜନା ଚାଲିଛି। ଏହି ଯୋଜନାରେ ଆର୍ଥିକ ବର୍ଷ ୨୦୨୩-୨୪ ରେ ଓଡି଼ଶାର ଓମଫେଡକୁ ୨୯ ଲକ୍ଷ ଟଙ୍କା ପ୍ରଦାନ କରାଯାଇଛି। ଓଡ଼ିଶାରେ ୪୨୨୪ଟି ଦୁଗ୍ଧ ସମବାୟ ସମିତିରେ ୨ ଲକ୍ଷ ୩୭ ହଜାର ୪୭୭ ଜଣ ଦୁଗ୍ଧ ଚାଷୀ ଅଛନ୍ତି। ସେମାନଙ୍କୁ ଉଚିତ ଦାମ୍ ପ୍ରଦାନ କରାଯାଉଛି। ୮୦ ପ୍ରତିଶତ ଚାଷୀଙ୍କୁ ଓମଫେଡ୍ ତରଫରୁ ସେମାନଙ୍କର ବ୍ୟାଙ୍କ ଆକାଉଣ୍ଟରେ ସିଧାସଳଖ ଟଙ୍କା ପ୍ରଦାନ କରାଯାଉଛି ବୋଲି ଅମିତ ଶାହ ଉତ୍ତର ରଖିଛନ୍ତି।
