ପୁରୀ ବଡଦାଣ୍ଡରେ ପୁଣି ବସିଲେ ଉଠା ଦୋକାନୀ । ଗତ ୧୪ ମାସ ହେବ କ୍ଷତିପୂରଣ ରାଶି ପାଇ ନଥିବାରୁ ଦୋକାନୀ ମାନେ ପ୍ରତିବାଦ କରି ଦୋକାନ ଖୋଲିଛନ୍ତି । ସକାଳୁ ଉଠା ଦୋକାନୀ ମାନେ ଦୋକାନ ଖୋଲିଥିବା ଦେଖିବାକୁ ମିଳିଛି । ପୁରୀରେ ଭକ୍ତଙ୍କ ଭିଡ଼କୁ ନଜରରେ ରଖି ଗତ ସରକାର ସମୟରେ ଉଠା ଦୋକାନୀ ମାନଙ୍କୁ ବଡ଼ଦାଣ୍ଡରୁ ହଟାଯାଇଥିଲା। ସେମାନଙ୍କୁ ଥଇଥାନ ପର୍ଯ୍ୟନ୍ତ କ୍ଷତିପୂରଣ ରାଶି ପ୍ରଦାନ କରାଯିବାକୁ କୁହାଯାଇଥିଲା । ତେବେ ସରକାର ପରିବର୍ତନ ପରେ ନୂତନ ସରକାର କିଛି ମାସର ଥଇଥାନ କ୍ଷତିପୂରଣ ରାଶି ଦୋକାନୀ ମାନଙ୍କୁ ପ୍ରଦାନ କରିଥିଲେ। ଏପରିକି ଦୋକାନୀ ମାନଙ୍କୁ ଥଇଥାନ କରାଯାଇ ନଥିବାରୁ ଦୋକାନୀ ମାନେ ଧାରଣା ଓ ଆନ୍ଦୋଳନ କରିଥିଲେ । ଥଇଥାନ ନେଇ ପ୍ରତିଶୃତି ମିଳିଥିବା ସତ୍ୱେ ଆଜି ପର୍ଯ୍ୟନ୍ତ ଥଇଥାନ ହୋଇ ନାହାନ୍ତି । କ୍ଷତିପୂରଣ ରାଶି ପାଇନଥିବାରୁ ଦୋକାନୀ ମାନେ ପୁନର୍ବାର ବଡ଼ଦାଣ୍ଡରେ ଦୋକାନ ଖୋଲିଥିବା ଦେଖିବାକୁ ମିଳିଛି ।
