ଇରାନ ଉପରେ ଆମେରିକା ଆକ୍ରମଣ କଲେ ବନ୍ଦ ହେବ ହର୍ମୁଜ ପ୍ରଣାଳୀରେ ପଣ୍ୟବାହୀ ଜାହାଜ ଚଳାଚଳ। ପ୍ରଭାବିତ ହେବ ଭାରତକୁ ଆସୁଥିବା ଅଶୋଧିତ ତୈଳ ପରିବହନ। ସିଧା ସିଧା ଭାରତ ତୈଳ ଆମଦାନୀକୁ ପ୍ରଭାବିତ କରିବ। ଇରାନ ଆମେରିକା ସମ୍ପର୍କ ଅଧିକରୁ ଅଧିକ ଘନୀଭୂତ ହୋଇଚାଲିଛି। ଇରାନ ଓ ଓମାନ ମଧ୍ୟରେ ରହିଥିବା ସଂକୀର୍ଣ୍ଣ ଜଳପଥ ଅର୍ଥାତ ଷ୍ଟ୍ରେଟ ଅଫ ହର୍ମୁଜକୁ ଇରାନ ବନ୍ଦ କରିବାକୁ ଏକ ପ୍ରକାର ନିଷ୍ପତ୍ତି ନେଇଛି। ବିଶ୍ବର ସବୁଠାରୁ ଗୁରୁତ୍ବପୂର୍ଣ୍ଣ ସାମୁଦ୍ରିକ ପାସେଜ ହେଲା ହର୍ମୁଜ। ଏହି ପ୍ରଣାଳୀ ୧୬୭ କିଲୋମିଟର ଦୀର୍ଘ ଓ ଓସାର ୩୩ କିଲୋମିଟର। ଏହି ବାଟ ଦେଇ ବିଶ୍ବର ଏକ ପଞ୍ଚାମାଂଶ ତୈଳ ପରିବହନ ହୋଇଥାଏ। ହର୍ମୁଜ ପ୍ରଣାଳୀ ବନ୍ଦ ହେଲେ ସିଧାସଳଖ ଭାରତ ପ୍ରଭାବିତ। କାରଣ ଇରାନରୁ ତୈଳ ଆମଦାନୀ ବନ୍ଦ ହୋଇଯିବ। ଭାରତକୁ ତୈଳ ଆମଦାନୀ କରିବାକୁ ଦକ୍ଷିଣ ଆଫ୍ରିକାର କେପ ଅଫ ଗୁଡ ହୋପ ଦେଇ ତୈଳ ପରିବହନ କରିବାକୁ ପଡ଼ିବ। ଯାହାକି ସମୟସାପେକ୍ଷ ହେବା ସହ ପରିବହନ ଖର୍ଚ୍ଚ ବ୍ୟୟବହୁଳ ହେବ।
ତୈଳ ଆମଦାନୀ ଖର୍ଚ୍ଚ ବଢ଼ିଲେ ଦେଶରେ ପେଟ୍ରୋଲ ଓ ଡିଜେଲ ଦର ବୃଦ୍ଧି ସମ୍ଭାବନା ରହିଛି। ଖାଲି ସେତିକି ନୁହେଁ । ଆମେରିକା ସହ ଇରାନ ଯୁଦ୍ଧ ସ୍ଥିତିକୁ ଆସିଲେ ଇରାନରୁ ତୈଳ ଆମଦାନୀ ବନ୍ଦ ହେବାର ଆଶଙ୍କା ଉପୁଜିଛି। ଏଭଳି ସ୍ତରରେ ବିଶ୍ବ ଅର୍ଥନୀତି ମଧ୍ୟ ପ୍ରଭାବିତ ହେବ। ଦୈନିକ ଏହି ପ୍ରଣାଳୀ ଦେଇ ୧୭ ନିୟୁତ ବ୍ୟାରେଲ ତୈଳ ପରିବହନ ହୋଇଥାଏ। ଏହି ପ୍ରଣାଳୀକୁ ବନ୍ଦ କଲେ ତୈଳ ରପ୍ତାନୀ ଉପରେ ସାଂଘାତିକ ପ୍ରଭାବ ପଡ଼ିବ। OPEC ସଦସ୍ୟ ରାଷ୍ଟ୍ରରେ ଅଛନ୍ତି ସାଉଦି ଆରବ, ଇରାନ, ୟୁଏଇ, କୁଏତ ଓ ଇରାକ। ଏହି ପ୍ରଣାଳୀ ଦେଇ ଏସିଆକୁ ହୋଇଥାଏ ତୈଳ ରପ୍ତାନୀ। ହର୍ମୁଜ ପ୍ରଣାଳୀ ବନ୍ଦ ହେଲେ ସବୁଠାରୁ ବେଶୀ କ୍ଷତି ସହିବ ଭାରତ। ହର୍ମୁଜ ପ୍ରଣାଳୀକୁ ବନ୍ଦ କରିବା କ୍ଷମତା ଇରାନ ନିକଟରେ ନାହିଁ। କେବଳ ବଳପୂର୍ବକ ଏହି ପ୍ରଣାଳୀକୁ ଅଟକାଇ ପାରିବ ଇରାନ। ହର୍ମୁଜ ପ୍ରଣାଳୀ ବନ୍ଦ ହେଲେ ୧୯୭୩ ତୈଳ ସଙ୍କଟ ପରି ସଙ୍କଟ ଉପୁଜିପାରେ। ଯଦି ଏହି ପ୍ରଣାଳୀ ବନ୍ଦ କରେ ତେବେ ଇରାନ ବି କ୍ଷତି ସହିବ। ଏହି ପ୍ରଣାଳୀ ଦେଇ ଭାରତ ୧.୫ ନିୟୁତ ବ୍ୟାରେଲ ତୈଳ ଆଣିଥାଏ। ଅନ୍ୟାନ୍ୟ ରୁଟ୍ ଦେଇ ଭାରତ ୫.୫ ନିୟୁତ ବ୍ୟାରେଲ ତୈଳ ଆଣିଥାଏ। ଭାରତ ନିଜର ଆବଶ୍ଯକତା ଲାଗି ୯୦ ପ୍ରତିଶତ ତୈଳ ଆମଦାନୀ କରିଥାଏ।
