ଶରିଫ ଉସମାନ ହାଦିଙ୍କ ହତ୍ୟା ପଛରେ ବାଂଲାଦେଶ ଅନ୍ତରୀଣ ପ୍ରଧାନମନ୍ତ୍ରୀ ମହମ୍ମଦ ୟୁନୁସଙ୍କ ହାତ ଅଭିଯୋଗ
ନନ୍ଦିଘୋଷ ବ୍ୟୁରୋ: ବାଂଲାଦେଶର ମହମ୍ମଦ ୟୁନୁସ ସରକାର ବିରୋଧରେ ବଡ଼ ଅଭିଯୋଗ । ଗୁଳିମାଡରେ ମୃତ ଶରିଫ ଉସମାନ ହାଦିଙ୍କ ଭାଇ ଶରିଫ ଉମର ହାଦି କହିଛନ୍ତି, ପ୍ରସ୍ତାବିତ ଜାତୀୟ ସାଧାରଣ ନିର୍ବାଚନ କରାଇ ନଦେବା ଲକ୍ଷ୍ୟରେ ଭାଇଙ୍କୁ ହତ୍ୟା କରାଯାଇଛି। ହତ୍ୟାକାଣ୍ଡ ପଛରେ ନ୍ୟସ୍ତସ୍ବାର୍ଥ ଗୋଷ୍ଠୀର ହାତ ରହିଛି । ଶାହାବାଗସ୍ଥିତ ନ୍ୟାସନାଲ ମ୍ୟୁଜିୟମ ନିକଟରେ ଇନକିଲାବ ମଞ୍ଚ ପକ୍ଷରୁ ଆୟୋଜିତ ଶହୀଦ ଶପଥ କାର୍ଯ୍ୟକ୍ରମରେ ଭାଗ ନେଇ ସେ କହିଛନ୍ତି, ୟୁନୁସ ହିଁ ଭାଇ ଉସମାନଙ୍କୁ ହତ୍ୟା କରିଛନ୍ତି ।
ସାଧାରଣ ନିର୍ବାଚନ କରାଇ ନଦେବା ଲାଗି ଏହା ଏକ ଯୋଜନା । ଦେଶରେ ଜାତୀୟ ନିର୍ବାଚନ କରିବା ଏବଂ ନିର୍ବାଚନ ପ୍ରକ୍ରିୟାରେ ବ୍ୟାଘାତ ସୃଷ୍ଟି ନ କରିବାକୁ ଭାଇ ଉସମାନ ଚାହିଁଥିଲେ । ମାତ୍ର ତାଙ୍କୁ ହତ୍ୟା କରାଯାଇ ତାଙ୍କ ସ୍ବରକୁ ଚପାଇ ଦିଆଗଲା । ଯଦି ଉସମାନ ହାଦିଙ୍କୁ ଉପଯୁକ୍ତ ନ୍ୟାୟ ନମିଳେ ତେବେ ୟୁନୁସଙ୍କୁ ଦେଶ ଛାଡ଼ି ଚାଲିଯିବାକୁ ବାଧ୍ୟ କରାଯିବ ବୋଲି ଉମର କହିଛନ୍ତି । କୌଣସି ସଂସ୍ଥା ବା ବିଦେଶୀ ଶକ୍ତିର ହାତ କଣ୍ଢେଇ ନସାଜିବାରୁ ଭାଇଙ୍କୁ ହତ୍ୟା କରାଗଲା ବୋଲି ସେ କହିଛନ୍ତି । ଗତ ୧୨ ତାରିଖରେ ଢାକା ବିଜୟ ନଗରରେ ଉସମାନଙ୍କୁ ଗୁଳି କରାଯାଇଥିଲା । ୧୮ ତାରିଖରେ ସେ ସିଙ୍ଗାପୁରରେ ପ୍ରାଣ ହରାଇଥିଲେ ।
