ଢେଙ୍କାନାଳ : ବିହାର ପାଟନା ଏମ୍ସରେ ଓଡ଼ିଆ ଡାକ୍ତରୀ ଛାତ୍ରଙ୍କ ସନ୍ଦେହଜନକ ମୃତ୍ୟୁ। ମୃତକ ହେଲେ ଢେଙ୍କାନାଳର ଯାଦବେନ୍ଦ୍ର ସାହୁ। ସେ ପାଟନା ଏମ୍ସରେ ପିଜି କରୁଥିଲେ। ଶନିବାର ସନ୍ଦେହଜନକ ଅବସ୍ଥାରେ ତାଙ୍କର ମୃତଦେହ ଉଦ୍ଧାର କରାଯାଇଛି। ପରିବାର ଲୋକେ ଅଭିଯୋଗ କରିଛନ୍ତି, ରାଗିଂ କରି ପୁଅକୁ ମାରି ଦିଆଯାଇଛି। ନିଶା ଇଞ୍ଜେକସନ ଦେଇ ତାଙ୍କୁ ମାରି ଦିଆଯାଇଥିବାର ଅଭିଯୋଗ କରିଛନ୍ତି ମାଆ । ରାଗିଂ କରାଯାଉଥିବାରୁ ଆଗରୁ ପୁଅ ଜଣାଇଥିବା ସେ କହିଛନ୍ତି। ଗତକାଲି ସକାଳେ ପାଟନା ଏମ୍ସ କର୍ତ୍ତୃପକ୍ଷ ଯାଦବେନ୍ଦ୍ରଙ୍କ ମୃତ୍ୟୁ ଖବର ଜାଣିବା ପରେ ପରିବାର ଲୋକଙ୍କୁ ଜଣାଇଥିଲା। ସେଠାରେ ପହଞ୍ଚିଛନ୍ତି ମାଆ ଓ ପରିବାର ଅନ୍ୟ ସଦସ୍ୟ। ପୁଅର ମୃତଦେହ ଓଡ଼ିଆ ଆଣିବାକୁ ସେମାନେ ଚେଷ୍ଟା କରୁଛନ୍ତି। କିନ୍ତୁ କର୍ତ୍ତୃପକ୍ଷ କିଛି ସାହାଯ୍ୟ କରୁନଥିବା ସେମାନେ ଅଭିଯୋଗ କରିଛନ୍ତି। ଢେଙ୍କାନାଳ ଗଁଦିଆ ବ୍ଲକ ବୈଦକାଟେଣୀ ଗାଁ ହେଉଛନ୍ତି ଯାଦବେନ୍ଦ୍ର ସାହୁ। ସେ ପାଟନା ଏମ୍ସରେ ପିଜି ପ୍ରଥମ ବର୍ଷର ଛାତ୍ର ଥିଲେ। ଏ ନେଇ ପୂର୍ବତନ ବିଧାୟକ ନବୀନ ନନ୍ଦ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେପି ନଡା, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ମୁଖ୍ୟ ଶାସନ ସଚିବଙ୍କ ଦୃଷ୍ଟି ଆକର୍ଷଣ କରିଛନ୍ତି।
