ତୁର୍କୀଠୁ ବଡ଼ ବିପର୍ଯ୍ୟୟ ହେବ କି ? ପାକିସ୍ତାନରେ ଆସିବ କି ବଡ ସୁନାମୀ ?

ନନ୍ଦିଘୋଷ ବ୍ୟୁରୋ: ତୁର୍କୀ ଭଳି ଥରିବ କି ପାକିସ୍ତାନ ? ଲଗାତାର କରାଚୀରେ ଭୂମିକମ୍ପ ଅନୁଭୂତ ହେଉଥିବା ବେଳେ ଲୋକଙ୍କ ମଧ୍ୟରେ ଭୟର ବାତାବରଣ ଦେଖାଦେଇଛି । ୨୦୨୩ମସିହାରେ ତୁର୍କୀରେ ୭.୮ତୀବ୍ରତାର ଭୂମିକମ୍ପରେ ପ୍ରାୟ ୫୦ହଜାରରୁ ଅଧିକ ଲୋକ ମୃତ୍ୟୁବରଣ କରିଥିବା ବେଳେ କରାଚୀରେ ମଧ୍ୟ ସମାନ ଆଲୋଡନ ଦେଖିବାକୁ ମିଳିଛି । ରବିବାର ରାତିରୁ ସୋମବାର ପର୍ଯ୍ୟନ୍ତ କରାଚୀରେ ଲଗାତାର ଭୂମିକମ୍ପ ଅନୁଭୂତ ହୋଇଥିଲା, ଯାହା ଯୋଗୁଁ ଲୋକଙ୍କ ମଧ୍ୟରେ ଭୟର ବାତାବରଣ ରହିଛି । ପ୍ରଶ୍ନ ଉଠୁଛି ଯେ ପାକିସ୍ତାନ କଣ ତୁର୍କୀ ପରି ବିପର୍ଯ୍ୟୟର ଦ୍ୱାରରେ ଠିଆ ହୋଇଛି କି?

ରବିବାର ରାତିରୁ ସୋମବାର ପର୍ଯ୍ୟନ୍ତ ପାକିସ୍ତାନର କରାଚୀ ସହରରେ ଅନେକ ଥର ଭୂମିକମ୍ପ ହୋଇଥିଲା। ଲୋକମାନେ ଭୟରେ ଘରୁ ବାହାରକୁ ଆସି ରାସ୍ତାକୁ ଆସିଥିଲେ। ସୋସିଆଲ ମିଡିଆରେ ଆଲୋଡନ ସୃଷ୍ଟି ହେଇଥିଲା ? ସମସ୍ତେ ଚିନ୍ତା ପ୍ରକାଶ କରି ପଚାରିଥିଲେ ଯେ ଏହା କ’ଣ ଏକ ବଡ଼ ଭୂମିକମ୍ପର ସଙ୍କେତ? ପାକିସ୍ତାନ ପାଣିପାଗ ବିଭାଗ ଅନୁଯାୟୀ, ଜୁନ୍ ୧ ରୁ ୨ ମଧ୍ୟରେ କରାଚୀରେ ଅତି କମରେ ୫ଟି ଭୂମିକମ୍ପ ରେକର୍ଡ କରାଯାଇଛି, । ଯଦିଓ ଏହାର ତୀବ୍ରତା କମ୍ ଥିଲା, କିନ୍ତୁ ବାରମ୍ବାର ଭୂମିକମ୍ପ ଲୋକଙ୍କ ଚିନ୍ତା ବଢାଇ ଦେଇଛି ।

ସକ୍ରିୟ ହେଲା କରାଚୀର ଫଲ୍ଟ ରେଖା

ପାକିସ୍ତାନ ପାଣିପାଗ ବିଭାଗ ଅନୁଯାୟୀ, କରାଚୀର ଲାଣ୍ଡି ଅଞ୍ଚଳର ତଳେ ଏକ ପୁରୁଣା ଫଲ୍ଟ ଲାଇନ ଅଛି, ଯାହା ବର୍ତ୍ତମାନ ସକ୍ରିୟ ହୋଇଯାଇଛି। ଯେତେବେଳେ ଏକ ଫଲ୍ଟ ଲାଇନ ସକ୍ରିୟ ହୁଏ, ଏହା ଧୀରେ ଧୀରେ ଶକ୍ତି ରିଲିଜ  କରେ, ଯାହା ଦ୍ଵାରା ବାରମ୍ବାର ମୃଦୁ ଭୂମିକମ୍ପ ହୁଏ। ଏକ ରିପୋର୍ଟ ଅନୁଯାୟୀ, ଏହି ପରିସ୍ଥିତି ସାଧାରଣତଃ ଗୋଟିଏ କିମ୍ବା ଦୁଇ ଦିନ ମଧ୍ୟରେ ସ୍ୱାଭାବିକ ହୋଇଯାଏ । ଆଶ୍ବସ୍ତିକର କଥା ହେଉଛି କରାଚୀର ଟେକ୍ଟୋନିକ୍ ପ୍ଲେଟଗୁଡ଼ିକୁ ବିପଦପୂର୍ଣ୍ଣ ନୁହେଁ ଏବଂ ଏପର୍ଯ୍ୟନ୍ତ ଏଠାରେ କୌଣସି ବଡ଼ ଭୂମିକମ୍ପ ହୋଇନାହିଁ।

ସୁନାମି କିମ୍ବା ବଡ଼ ବିପର୍ଯ୍ୟୟର ଆଶଙ୍କା

ବିଶେଷଜ୍ଞଙ୍କ ମତରେ, କରାଚୀରେ ସୁନାମି ଆସିବାର ସମ୍ଭାବନା ବହୁତ କମ୍ କାରଣ ଏଠାକାର ଟେକ୍ଟୋନିକ୍ ପ୍ଲେଟ୍‌ଗୁଡ଼ିକ ଅପେକ୍ଷାକୃତ ସ୍ଥିର। କିନ୍ତୁ ବେଲୁଚିସ୍ତାନର ସମୁଦ୍ର ଅଞ୍ଚଳ, ଯେଉଁଠାରେ ଆରବ ଏବଂ ୟୁରେସିଆନ୍ ପ୍ଲେଟ୍‌ଗୁଡ଼ିକ ମିଶିଛନ୍ତି, ସେଠାରେ ସୁନାମିର ବିପଦ ରହିଛି। ପାକିସ୍ତାନର ଭୂତାତ୍ତ୍ୱିକ ସର୍ବେକ୍ଷଣ ଅନୁସାରେ, ପାକିସ୍ତାନର ଦୁଇ-ତୃତୀୟାଂଶ ଏକ ଫଲ୍ଟ ଲାଇନରେ ଅବସ୍ଥିତ। କରାଚୀକୁ ଜୋନ୍-3 ରେ ରଖାଯାଇଛି, ଯାହାର ଅର୍ଥ ହେଉଛି ଏଠାରେ ମଧ୍ୟମ ସ୍ତରର ଭୂକମ୍ପ ବିପଦ ରହିଛି।

ଭୟଭୀତ ହେବା ନୁହେଁ, ସତର୍କ ରହିବା ଗୁରୁତ୍ବପୂର୍ଣ୍ଣ

ବିଶେଷଜ୍ଞମାନଙ୍କ ଅନୁସାରେ ଭୟଭୀତ ହେବାର କୌଣସି ଆବଶ୍ୟକତା ନାହିଁ, ବରଂ ସତର୍କ ରହିବାକୁ ପଡିବ। ଦୃଢ଼ ନିର୍ମାଣ, ବିପର୍ଯ୍ୟୟ ପରିଚାଳନା ପ୍ରସ୍ତୁତି ଏବଂ ଜନସଚେତନତା ମାଧ୍ୟମରେ ଏକ ବଡ଼ ବିପର୍ଯ୍ୟୟକୁ ଏଡାଇ ଦିଆଯାଇପାରିବ। କିଛି ବିଶେଷଜ୍ଞ ଏହା ମଧ୍ୟ ପରାମର୍ଶ ଦେଇଛନ୍ତି ଯେ ଉଚ୍ଚ କୋଠା ତିଆରି କରନ୍ତୁନି ଏବଂ ନିର୍ମାଣ ସମୟରେ କୋଠାଗୁଡ଼ିକ ମଧ୍ୟରେ ଖୋଲା ସ୍ଥାନ ଛାଡିବା ଉଚିତ ଯାହା ଦ୍ଵାରା ଆବଶ୍ୟକ ହେଲେ ସ୍ଥାନାନ୍ତର ସହଜ ହୋଇପାରିବ।