ଆୟୁଷ୍ମାନ ଭାରତ ଯୋଜନାରେ ଦୁର୍ନୀତି, ଦେଶର ୨୧ଟି ସ୍ଥାନରେ ଇଡିର ପକ୍ଷରୁ ଚଢ଼ାଉ

ନନ୍ଦିଘୋଷ ବ୍ୟୁରୋ : ଆୟୁଷ୍ମାନ ଭାରତ ଯୋଜନାରେ ଦୁର୍ନୀତି। ଦେଶର ୨୧ଟି ସ୍ଥାନରେ ଇଡିର ପକ୍ଷରୁ ଚଢ଼ାଉ। ଝାଡ଼ଖଣ୍ଡ, ଦିଲ୍ଲୀ, ପଶ୍ଚିମବଙ୍ଗ ସମେତ ୨୧ଟି ସ୍ଥାନରେ ରେଡ୍। ହସପିଟାଲ ଏମପ୍ୟାନେଲ ଓ କ୍ଲେମ ସେଟେଲମେଣ୍ଟରେ ଅନିୟମିତତା ହୋଇଥିବା ଅଭିଯୋଗରେ ଚଢ଼ାଉ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ। ରାଞ୍ଚିର ଅଶୋକ ନଗର ଓ ବାରିଆତୁ ସମେତ ଜାମସେଦପୁର ମାଙ୍ଗୋ ଅଞ୍ଚଳରେ ଥିବା ଏକ ଘର ଏବଂ ୩୩ ନମ୍ବର ଜାତୀୟ ରାଜପଥରେ ନିକଟରେ ଏକ ନର୍ସିଂ ହୋମରେ ଚଢ଼ାଉ ହୋଇଛି। ଅଭିଯୋଗ ଅନୁସାରେ ରୋଗୀଙ୍କ ଚିକିତ୍ସା ନ କରି ଏପରିକି ରୋଗୀ ଭର୍ତ୍ତି ନ ହୋଇ ମଧ୍ୟ ହସପିଟାଲକୁ ଦିଆଯାଇଛି ଟଙ୍କା। ଏପରିକି ବିଭିନ୍ନ ହସପିଟାଲର ଏମପ୍ୟାନେଲରେ ମଧ୍ୟ ବ୍ୟାପକ ଅନିୟମିତତା ହୋଇଥିବାର ଅଭିଯୋଗ ହୋଇଥିଲା। ଅନେକ ବଡ଼ ବଡ଼ ହସ୍ତୀଙ୍କ ଘରେ,  ଅଫିସରେ ରେଡ୍ ହୋଇଛି। ଝାଡ଼ଖଣ୍ଡ ଷ୍ଟେଟ ଆରୋଗ୍ୟ ସୋସାଇଟିର ବିଭିନ୍ନ ଅଧିକାରୀ, କର୍ମଚାରୀ ଓ ଥାର୍ଡ ପାର୍ଟି ସଂସ୍ଥା ଯଥା ଏମଡି ଇଣ୍ଡିଆ, ସେଫୱେ ଓ ମେଡି ଆସିଷ୍ଟରେ ରେଡ୍ ହୋଇଛି। ଝାଡ଼ଖଣ୍ଡର ପୂର୍ବତନ ସ୍ଵାସ୍ଥ୍ୟମନ୍ତ୍ରୀଙ୍କ  ବ୍ୟକ୍ତିଗତ ସଚିବ ଓମ ପ୍ରକାଶ ସିଂହଙ୍କ ଘରେ ବି ଇଡି ଖାନତଲାସ କରିଛି। ଆୟୁଷ୍ମାନ ଭାରତ ଯୋଜନାର ବ୍ୟାପକ ଅନିୟମିତତା ହୋଇଥିବା ନେଇ ୨୦୨୩ରେ ପାର୍ଲାମେଣ୍ଟରେ ସିଏଜି ରିପୋର୍ଟ ଉପସ୍ଥାପିତ ହୋଇଥିଲା। ୨୦୦ରୁ ଅଧିକ ହସପିଟାଲରେ ଜାଲିଆତି ହୋଇଥିବାର ରିପୋର୍ଟ ଆସିଥିଲା।