ନିର୍ମାଣ ହୋଇଛି ପରିବା ହାଟ, ହେଲେ କାମରେ ଆସୁନି

ଭୁବନ : ଅସ୍ବାସ୍ଥ୍ୟକର ପରିବେଶରେ ମଧ୍ୟରେ ଚାଲିଛି ପରିବା ହାଟ । ରାସ୍ତାରୁ ହଟୁନି ଅଳିଆ ଆବର୍ଜନା । ଦୁର୍ଗନ୍ଧରେ ଫାଟି ପଡୁଛି ପୂରା ଅଞ୍ଚଳ ।  ଢେଙ୍କାନାଳ ଜିଲ୍ଲାର ଭୁବନ ବିଜ୍ଞାପିତ ଅଞ୍ଚଳ ପରିଷଦର ମୂଖ୍ଯ ରାସ୍ତାରେ ଚାଲିଛି ଦୈନନ୍ଦିନ ପରିବା ହାଟ। ନିତିଦିନ ଶହ ଶହ ପରିବା ଚାଷୀ ଖରା ବର୍ଷାରେ ଏହି ମୁଖ୍ଯ ରାସ୍ତାରେ ପରିବା ବିକ୍ରି କରୁଛନ୍ତି । ହାଟ ସରିଗଲେ ପଚା ସଢା ପରିବା ରାସ୍ତାରେ ପଡୁଥିବା ଦେଖିବାକୁ ମିଳୁଛି। ବର୍ତ୍ତମାନ ସମୟରେ ଚାଲୁଥିବା ପରିବା ହାଟରେ ଶୌଚାଳୟ ନଥିବାରୁ ବାଳିକା ଉଚ୍ଚ ବିଦ୍ୟାଳୟ ପାଚୋରୀ ଓ ହାଇସ୍କୁଲ ଖେଳପଡିଆକୁ ଶୌଚାଳୟ ଭଳି ବ୍ୟବହାର କରାଯାଉଛି ।  ଫଳରେ ଗନ୍ଧମୟ ପରିବେଶରେ ପାଠ ପଢିବାକୁ ବାଧ୍ୟ ହେଉଛନ୍ତି ପିଲା।

ଭୁବନରେ ସ୍ଥାୟୀ ପରିବା ହାଟ ରଗଡ଼ି ଛକରେ ଲକ୍ଷ ଲକ୍ଷ ଟଙ୍କା ବ୍ୟୟରେ ନିର୍ମାଣ କରିଛି ଭୁବନ ବିଜ୍ଞାପିତ ଅଞ୍ଚଳ ପରିଷଦ। ହେଲେ ସେଠାରେ ପାନୀୟଜଳ ଓ ଶୈଚାଳୟର ସୁବିଧା ନଥିବା କାରଣରୁ ବ୍ୟବସାୟୀ ମାନେ ସ୍ଥାନାନ୍ତରିତ ହେବାକୁ ଅମଙ୍ଗ । ତେବେ ବର୍ତ୍ତମାନ ସମୟରେ ଭୁବନ ବିଜ୍ଞାପିତ ଅଞ୍ଚଳ ପରିଷଦ ସ୍ଥିତ ଡାକବଙ୍ଗଳା ଛକରେ ପରିବା ବଜାର କୋଭିଡ ସମୟରୁ ଅସ୍ଥାୟୀ ରୂପେ ଚାଲିଆସିଛି । ତେବେ ଡାକବଙ୍ଗଳା ଛକ ନିକଟରେ ଅନେକ ଗୁରୁତ୍ବପୂର୍ଣ୍ଣ କାର୍ଯ୍ୟାଳୟ ରହୁଥିବା କାରଣରୁ ଅନେକ ସମୟରେ ଜନସାଧାରଣଙ୍କ ଯାତାୟତରେ ଅସୁବିଧାର ସମ୍ମୁଖୀନ ହେଉଛନ୍ତି ।  ହାଟକୁ ଆସୁଥିବା ବ୍ୟବସାୟୀଙ୍କ ଠାରୁ ବିଜ୍ଞାପିତ ଅଞ୍ଚଳ ପରିଷଦ ମୁଣ୍ଡ ପିଛା ୨୦ ଟଙ୍କା ମହାସୁଲ ଆଦାୟ କରୁଥିବା ସେମାନଙ୍କ ମୋଳିକ ସୁବିଧାରୁ ବଞ୍ଚିତ ରଖାଯାଉଥିବା ଅଭିଯୋଗ ହୋଇଛି ।  ଭୁବନ ବିଜ୍ଞାପିତ ଅଞ୍ଚଳ ପରିଷଦ ତରଫରୁ ନିର୍ମିତ ସ୍ଥାୟୀ ପରିବା ହାଟରେ ଖୁବଶୀଘ୍ର ପରିବା ଚାଷୀମାନଙ୍କୁ ଥଇଥାନ କରାଯିବା ନେଇ ସୁଚନା ପ୍ରଦାନ କରିଛନ୍ତି ନିର୍ବାହୀ ଅଧିକାରୀ