ରୋହିତ ଶର୍ମାଙ୍କୁ ‘ମୋଟା’ ‘ଆଭରେଜ୍’ କ୍ୟାପ୍ଟେନ କହିଲେ କଂଗ୍ରେସ ନେତ୍ରୀ

ନନ୍ଦିଘୋଷ ବ୍ୟୁରୋ: ଚଳିତ ICC ଚାମ୍ପିଅନ୍ସ ଟ୍ରଫିରେ ନ୍ୟୁଜିଲାଣ୍ଡ ବିପକ୍ଷରେ ଭାରତର ନିର୍ଣ୍ଣାୟକ ବିଜୟ ପରେ କଂଗ୍ରେସ ନେତ୍ରୀ ଶମା ମହମ୍ମଦ ଭାରତୀୟ କ୍ରିକେଟ ଅଧିନାୟକ ରୋହିତ ଶର୍ମାଙ୍କ ଫିଟନେସ୍ ଏବଂ ନେତୃତ୍ୱ ଉପରେ ପ୍ରଶ୍ନ ଉଠାଇ ବିବାଦ ସୃଷ୍ଟି କରିଛନ୍ତି । ରବିବାର ବିଳମ୍ବିତ ରାତିରେ ସୋସିଆଲ ମିଡିଆ ପ୍ଲାଟଫର୍ମ X ରେ, ଶମା ମହମ୍ମଦ ଶର୍ମାଙ୍କୁ “ମୋଟା” ବୋଲି ଆଖ୍ୟା ଦେଇଥିଲେ ଏବଂ ତାଙ୍କୁ ‘ମଧ୍ୟମ ଧରଣର କ୍ୟାପଟେନ” ଭାବରେ ବର୍ଣ୍ଣନା କରିଥିଲେ। ସେ ସଚିନ ତେନ୍ଦୁଲକର, ସୌରଭ ଗାଙ୍ଗୁଲି, ରାହୁଲ ଦ୍ରାବିଡ, ଏମଏସ ଧୋନି, ବିରାଟ କୋହଲି ଏବଂ କପିଲ ଦେବଙ୍କ ଭଳି କିମ୍ବଦନ୍ତୀ କ୍ରିକେଟରଙ୍କ ତୁଳନାରେ ତାଙ୍କ ଦକ୍ଷତା ଉପରେ ପ୍ରଶ୍ନ ଉଠାଇ ସୋସିଆଲ ମିଡିଆରେ ଭୂକମ୍ପ ଆଣିଛନ୍ତି ।

“ଖେଳାଳି ଭାବରେ ରୋହିତ ଶର୍ମା ମୋଟା ଅଟନ୍ତି । ତାଙ୍କୁ ଓଜନ ହ୍ରାସ କରିବାକୁ ପଡିବ। ଏବଂ ସେ ଭାରତର ସବୁଠାରୁ କମ୍ ପ୍ରଭାବଶାଳୀ ଅଧିନାୟକ !” ଅନ୍ୟ ଏକ ପୋଷ୍ଟରେ ସେ କହିଛନ୍ତି, “ଗାଙ୍ଗୁଲି, ତେନ୍ଦୁଲକର, ଦ୍ରାବିଡ, ଧୋନୀ, କୋହଲି, କପିଳ ଦେବ, ଶାସ୍ତ୍ରୀ ଏବଂ ଅନ୍ୟମାନଙ୍କ ତୁଳନାରେ ତାଙ୍କର କଣ ପ୍ରତିଭା ରହିଛି ? ସେ ଜଣେ ମଧ୍ୟମ ଧରଣର ଅଧିନାୟକ ହେବା ସହିତ ଜଣେ ମଧ୍ୟମ ଧରଣର ଖେଳାଳି ଯିଏ ଭାରତୀୟ ଦଳର ନେତୃତ୍ୱ ନେବାର ସୌଭାଗ୍ୟ ପାଇଛନ୍ତି ।”

ତାଙ୍କର ଏହି ମନ୍ତବ୍ୟ ପରେ କ୍ରିକେଟ୍ ପ୍ରେମୀ ଏବଂ ରାଜନୈତିକ ବ୍ୟକ୍ତିବିଶେଷଙ୍କ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ତେବେ ସେହି ସମୟରେ ସମାଲୋଚନାର ଜବାବ ଦେଇ, ଶମା ମହମ୍ମଦ ଗତକାଲି ମ୍ୟାଚ୍ ସମୟରେ ଶର୍ମାଙ୍କ ନିଷ୍ପତ୍ତି ଗ୍ରହଣ ଉପରେ ପ୍ରଶ୍ନ ଉଠାଇବା ସହିତ ନିଜର ମତ ବ୍ୟକ୍ତ କରିଥିଲେ । ଏହାସହିତ ସେ କହିଛନ୍ତି ମେଲବୋର୍ଣ୍ଣ କ୍ରିକେଟ୍ ଗ୍ରାଉଣ୍ଡରେ ଭାରତ ବିପକ୍ଷରେ ଅଷ୍ଟ୍ରେଲିଆ ଟେଷ୍ଟ ମ୍ୟାଚ୍ ସମୟରେ ନିଜକୁ ଓପନର ଭାବରେ ପ୍ରମୋଟ କରିବା ପଦକ୍ଷେପ ପାଇଁ କେଏଲ ରାହୁଲଙ୍କୁ ଦଳରୁ ବାହାର କରାଯାଇଥିଲା ଏବଂ ଶୁଭମନ ଗିଲଙ୍କୁ ପ୍ଲେଇଂ -୧୧ରୁ ବାଦ ଦିଆଯାଇଥିଲା ବୋଲି ସେ ଲେଖିଛନ୍ତି ।

ସେ ଲେଖିଛନ୍ତି ଯେ, “MCG ଟେଷ୍ଟରେ KL ରାହୁଲଙ୍କୁ ନମ୍ବର ୩ ରେ ବ୍ୟାଟିଂ କରିବାକୁ ନପଠାଇ ନିଜେ ନମ୍ବର ୧ ରେ ଆସିଥିଲେ ଯେଉଁଥିପାଇଁ ସବୁ ବିଗିଡିଯାଇଥିଲା ଏହା କ’ଣ ଏକ ସ୍ୱାର୍ଥପର ପଦକ୍ଷେପ ନଥିଲା ? ସେଥିପାଇଁ, ଶୁଭମନ ଗିଲ ପ୍ଲେଇଂ ଇଲେଭେନରୁ ବାଦ ପଡ଼ିଥିଲେ। ଆମେ କ’ଣ ଅହମ୍ମଦାବାଦରେ ଶେଷ ବିଶ୍ୱକପ୍ ହାରିଯାଇ ନଥିଲୁ ? ମୁଁ ତାଙ୍କୁ ଆମର ପୂର୍ବ ଅଧିନାୟକମାନଙ୍କ ସହ ତୁଳନା କରିଛି।”

କଂଗ୍ରେସ ନେତ୍ରୀଙ୍କ ମନ୍ତବ୍ୟକୁ କଡା ସମାଲୋଚନା କରି ବିଜେପି ମୁଖପାତ୍ର ଶେହଜାଦ ପୁନାୱାଲା କଂଗ୍ରେସ ଦଳର ନିର୍ବାଚନୀ ରେକର୍ଡ ଉପରେ କଟାକ୍ଷ କରିଥିଲେ। ପୁନାୱାଲା ମନ୍ତବ୍ୟ ଦେଇଛନ୍ତି, “ରାହୁଲ ଗାନ୍ଧୀଙ୍କ ଅଧିନାୟକତ୍ୱରେ ୯୦ଟି ନିର୍ବାଚନ ହାରିଥିବା ଲୋକମାନେ ରୋହିତ ଶର୍ମାଙ୍କ ଅଧିନାୟକତ୍ୱ ଉପରେ ପ୍ରଶ୍ନ ଉଠାଇଛନ୍ତି !” ରୋହିତ ଶର୍ମାଙ୍କୁ ସମର୍ଥନ କରି ସେ କହିଛନ୍ତି “ମୁଁ ଭାବୁଛି ଦିଲ୍ଲୀରେ ଛଅ ଶୂନ୍ୟ ଏବଂ ୯୦ ପଏଣ୍ଟରେ ନିର୍ବାଚନ ପରାଜୟ ପ୍ରଭାବଶାଳୀ ଅଟେ କିନ୍ତୁ ଟି-୨୦ ବିଶ୍ୱକପ୍ ଜିତିବା ନୁହେଁ ! “ ଆଉ ସେମାନେ ଭୁଲିଯାଇଛନ୍ତି ଅଧିନାୟକ ଭାବରେ ରୋହିତଙ୍କର ଏକ ମହାନ ଟ୍ରାକ୍ ରେକର୍ଡ ଅଛି!”

ତେବେ ରୋହିତଙ୍କ ପାରିବାପଣିଆ ଉପରେ ସୋସିଆଲ ମିଡିଆରେ ବିତଣ୍ଡା ଯୁକ୍ତି ଚାଲିଥିବା ବେଳେ, ଭାରତ ଚାମ୍ପିଅନ୍ସ ଟ୍ରଫିରେ ସେମାନଙ୍କର ପ୍ରଭାବଶାଳୀ ଫର୍ମ ଜାରି ରଖିଥିଲା ଏବଂ ନ୍ୟୁଜିଲାଣ୍ଡକୁ ୪୪ ରନରେ ପରାସ୍ତ କରି ଗ୍ରୁପ୍ A ରେ ଶୀର୍ଷରେ ପହଞ୍ଚିଥିଲା । ଶ୍ରେୟସ ଆୟରଙ୍କ ୭୯ ରନର ଚମତ୍କାର ଇନିଂସ ଏବଂ ବରୁଣ ଚକ୍ରବର୍ତ୍ତୀଙ୍କ ୫ ୱିକେଟ୍ ସଫଳତା ଭାରତକୁ ଅଷ୍ଟ୍ରେଲିଆ ବିପକ୍ଷ ସେମିଫାଇନାଲ ମୁକାବିଲାରେ ସ୍ଥାନ ପକ୍କା କରିବାରେ ସାହାଯ୍ୟ କରିଥିଲା।