ସରକାରୀ ଜମି ଉଚ୍ଛେଦ ନାଁରେ ହାଇଡ୍ରାମା, ତଦନ୍ତ ଆଳରେ ଆଦିବାସୀଙ୍କୁ ବିସ୍ଥାପିତ କରାଯାଉଥିବା ଅଭିଯୋଗ

ଆଠଗଡ଼ : କଟକ ଜିଲ୍ଲା ଆଠଗଡ଼ ବ୍ଲକ କୁମାରପୁର ପଞ୍ଚାୟତ ଏକ ଆଦିବାସୀ ଅଧ୍ୟୁଷିତ ଅଞ୍ଚଳ। ବିଶେଷ କରି ମୟୂରଭଞ୍ଜ, କେନ୍ଦୁଝର ଜିଲ୍ଲାର ଆଦିବାସୀ ମାନେ ଏଠାରେ ଦୀର୍ଘ ବର୍ଷ ଧରି ଜଙ୍ଗଲ ସଫା କରି ରହି ଆସୁଛନ୍ତି । ଦମ୍ପତିପୁର ମୌଜାର ଖାତା ନମ୍ୱର ୭୦ର ପ୍ଲଟ ନମ୍ବର ୨୫୭ରେ ଥିବା ୮ ଏକର ୬ ଡିସିମିଲି ଜଙ୍ଗଲ ଜାଗାକୁ କିଛି ଲୋକ ବେଆଇନ ଭାବେ ଦଖଲ କରିଥିବା ଅଭିଯୋଗ ହୋଇଛି । ପ୍ରଶାସନ ପକ୍ଷରୁ ରାଜସ୍ବ ଅଧିକ୍ଷକ ତଦନ୍ତ କରି ଆଦିବାସୀ ମାନେ ସେଠାରେ ବେଆଇନ ଭାବେ ରହିଥିବା ନେଇ ଦର୍ଶାଇ ଥିବାରୁ ଚିନ୍ତାରେ ଆଦିବାସୀ ପରିବାର । ଏଠାରେ ଥିବା ଆଦିବାସୀମାନେ ଜମି ବାଡ଼ି ନଥିବାରୁ ଜଙ୍ଗଲ ସଫା କରି ୨୦ ବର୍ଷ ଧରି ରହି ଆସିଥିବା କହିଛନ୍ତି । ଜଙ୍ଗଲ ଆଇନ ଅନୁଯାୟୀ ତାଙ୍କୁ ସେ ଜମି ଅଧିଗ୍ରହଣ କରିବା ପାଇଁ ଅନୁମତି ଦେବା ପାଇଁ ଦାବି କରିଛନ୍ତି।…

ସେହି ଜମିର ୮ ଏକର ଜାଗାକୁ ଆଠଗଡ ବ୍ଲକର ପୂର୍ବତନ ବ୍ଲକ ଅଧ୍ୟକ୍ଷ ରଞ୍ଜନ ଆଚାର୍ଯ୍ୟ ଦଖଲ କରିଥିବା ନେଇ ପ୍ରଶାସନ ପକ୍ଷରୁ ନୋଟିସ ଦିଆଯାଇଛି । ନୋଟିସକୁ ନେଇ ଏବେ ପ୍ରଶ୍ନ ଉଠାଇଛନ୍ତି ରଂଜନ ଆଚାର୍ଯ୍ୟ । ତାଙ୍କ ନାମରେ ଆସିଥିବା ନୋଟିସର ଜମିକୁ ସେ ଦଖଲ କରି ନଥିବା କହିବା ସହ ତାଙ୍କୁ ଜାଣିଶୁଣି ବଦନାମ କରାଯାଉଛି ବୋଲି କହିଛନ୍ତି। ଏନେଇ ସେ ଆଇନର ଆଶ୍ରୟ ନେବେ ବୋଲି କହିଛନ୍ତି । ଅନ୍ୟପଟେ ଅଭିଯୋଗ ପାଇବା ପରେ ରାଜସ୍ବ ଅଧକାରୀଙ୍କ ତଦନ୍ତ ରିପୋର୍ଟ ଅନୁଯାୟୀ ଦଖଲକାରୀ ରଞ୍ଜନ ଆଚାର୍ଯ୍ୟଙ୍କୁ ନୋଟିସ କରାଯାଇଥିବା କହିଛନ୍ତି ଅତିରିକ୍ତ ତହସିଲଦାର । ଦୁଇ ବର୍ଷରୁ ଉର୍ଦ୍ଧ୍ବ ସମୟ ଭୂମିହୀନ ଲୋକ ଯଦି ଏକ ସ୍ଥାନରେ ରହି ଆସୁଛି ତେବେ ତାକୁ ଜମି ପଟ୍ଟା ଯୋଗାଇ ଦେବାର ସରକାର ନିୟମ ରହି ଆସିଛି। ଏହି ନିୟମ ଅନୁଯାୟୀ ଆଦିବାସୀ ପରିବାରଙ୍କୁ ଜମି ପଟ୍ଟା ଯୋଗାଇ ଦେବାକୁ ସାଧାରଣରେ ଦାବି ହୋଇଛି।