ବନ୍ଧାହେଲା ଯୁବତୀଙ୍କୁ ପ୍ରେମ ଜାଲରେ ଫସାଉଥିବା 420 ଲଭର ବୟ

ନନ୍ଦିଘୋଷ ବ୍ୟୁରୋ: ଶେଷରେ ବନ୍ଧାହେଲା 420 ଲଭର ବୟ। ଯୁବତୀଙ୍କୁ ପ୍ରେମ ଜାଲରେ ଫସାଇ ଠକୁଥିଲା। ମୟୂରଭଞ୍ଜରେ ଦୀର୍ଘ ବର୍ଷ ଧରି ଶତାଧିକ ଯୁବତୀଙ୍କୁ ଠକୁଥିବା ଠକ୍ ପ୍ରେମିକକୁ ବାନ୍ଧିଛି ବାରିପଦା ପୋଲିସ । ସୋସିଆଲ ମିଡିଆରେ ମିଥ୍ୟା ପ୍ରଲୋଭନ ଦେଇ ଯୁବତୀଙ୍କୁ ଜାଲରେ ଫସାଉଥିଲା। ଶତାଧିକ ଯୁବତୀଙ୍କ ସହ ପ୍ରେମ ସମ୍ପର୍କ ରଖି ଲକ୍ଷାଧିକ ଟଙ୍କା ଠକିନେଇଛି ଏହି ଠକ ପ୍ରେମିକ।  ପ୍ରେମ ଓ ବିବାହର ପ୍ରତିଶୃତି ଦେଇ ଟଙ୍କା ଠକି ନେଇ ଚମ୍ପଟ ମାରୁଥିଲା । ଗିରଫ ଠକ ପ୍ରେମିକ ଯାଜପୁର ଜିଲ୍ଲା ଜେନାପୁର ଥାନା କବାଟବନ୍ଧ ଗାଁର ତ୍ରୈଲୋକ୍ୟ ରଞ୍ଜନ ପାତ୍ର । ଫେସବୁକ, ଇନଷ୍ଟାଗ୍ରାମରେ ଯୁବତୀଙ୍କ ସହ ବନ୍ଧୁତା ସୃଷ୍ଟି କରୁଥିଲା। କିଛି ଦିନ କଥା ହେବା ପରେ ଯୁବତୀଙ୍କୁ ପ୍ରେମ ନିବେଦନ କରୁଥିଲା। ଯୁବତୀ ମାନଙ୍କୁ ମିଛ ପ୍ରେମ ଜାଲରେ ଫସାଇ ସେମାନଙ୍କର ସରଳତାର ସୁଯୋଗ ନେଇ ଲକ୍ଷାଧିକ ଟଙ୍କା ହଡପ କରୁଥିଲା।  ବାରିପଦା ମଧୁବନ ଅଞ୍ଚଳର ଜଣେ ଯୁବତୀଙ୍କ ଠାରୁ ଲକ୍ଷାଧିକ ଟଙ୍କା ହଡ଼ପ ନେଇ ବାରିପଦା ଟାଉନ ଥାନାରେ ଅଭିଯୋଗ ହୋଇଥିଲା। ଅଭିଯୋଗ ପରେ ଥାନା ଅଧିକାରୀଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ପୁରୀ ଯାଇଥିଲେ । ପୁରୀ ଜିଲ୍ଲାର ବାସେଳିସାହି ଥାନା ଅନ୍ତର୍ଗତ ହାତୀସାହି ଅଞ୍ଚଳରୁ ଏହି ଠକ ପ୍ରେମିକକୁ ଗିରଫ କରିଛି ପୋଲିସ। ଶତାଧିକ ମହିଳାଙ୍କ ସହ ପ୍ରେମ କରି ଏଭଳି ଟଙ୍କା ଠକେଇ କରିଥିବା ପୋଲିସ ପକ୍ଷରୁ ସୂଚନା ମିଳିଛି।