ତୁର୍କୀର ଏକ ହୋଟେଲରେ ଭୟଙ୍କର ଅଗ୍ନିକାଣ୍ଡ, ୭୬ ଲୋକ ଜୀବନ୍ତଦଗ୍ଧ
1 min read
ନନ୍ଦିଘୋଷ ବ୍ୟୁରୋ: ତୁର୍କୀର ଏକ ହୋଟେଲରେ ଭୟଙ୍କର ଅଗ୍ନିକାଣ୍ଡ। ଗ୍ରାଣ୍ଡ କାର୍ଟାଲ ହୋଟେଲରେ ନିଆଁ ଲାଗି ୭୬ ଲୋକ ଜୀବନ୍ତଦଗ୍ଧ । ଏହି ଦୁର୍ଘଟଣାରେ ମୃତ୍ୟୁ ସଂଖ୍ୟା ଅଧିକ ହେବା ଆଶଙ୍କା କରାଯାଉଛି। ୫୧ ଜଣ ଆହତ ହୋଇଛନ୍ତି। ତୁର୍କୀର ବୋଲୁ ପାର୍ବତ୍ୟାଞ୍ଚଳରେ ଥିବା ହୋଟେଲରେ ଏହି ଅଘଟଣ ଘଟିଛି। ଜୀବନ ବିକଳରେ କିଛି ଲୋକ ହୋଟେଲରୁ ଡେଇଁ ପଡିବାରୁ ଆହତ ହୋଇଛନ୍ତି।
ଉତ୍ତର-ପଶ୍ଚିମାଞ୍ଚଳ ତୁର୍କୀର କାର୍ତାଲକାୟା ସ୍କି ରିସର୍ଟରେ ଏହି ଅଘଟଣ ଘଟିଛି। ହୋଟେଲରେ ୨୩୪ ଜଣ ଅତିଥି ରହୁଥିବା ସୂଚନା ମିଳିଛି। ୧୨ ମହଲା ବିଶିଷ୍ଟ ହୋଟେଲରେ ରାତିରେ ନିଆଁ ଲାଗିଥିଲା। ଅଗ୍ନିକାଣ୍ଡ ଯୋଗୁ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା। ହୋଟେଲରୁ ଡେଇଁ ପଡିବାରୁ ୨ ଜଣଙ୍କ ମୃତ୍ୟୁ ଘଟିଥିଲା ବୋଲି କହିଛନ୍ତି ବୋଲୁ ଗଭର୍ଣ୍ଣର ଅବଦୁଲଜିଜ ଆୟଦିନ। ଅଗ୍ନିକାଣ୍ଡ ଯୋଗୁ ସ୍ଥାନୀୟ ଅଞ୍ଚଳ ଧୂଆଁମୟ ହୋଇଯାଇଥିଲା। ପ୍ରବଳ ଧୂଆଁ ଯୋଗୁ କିଛି ଲୋକ ଶ୍ବାସରୁଦ୍ଧ ହୋଇ ପ୍ରାଣ ହରାଇଥିଲେ। ଦୀର୍ଘ ସମୟ ପରେ ନିଆଁକୁ ଆୟତ୍ତ କରାଯାଇଛି।
