ରାଜ୍ୟରେ ବଢିଛି ଦେଶୀ ଓ ବିଦେଶୀ ମଦ ବିକ୍ରି

ଭୁବନେଶ୍ବର: ରାଜ୍ୟରେ ବଢୁଛି ମଦ ବିକ୍ରି । ଗତବର୍ଷ ୨୦୨୨-୨୩ରେ ୫ କୋଟି ୮୩ ଲକ୍ଷ ୪୪ ହଜାର ଲିଟର ବିଦେଶୀ ମଦ ବିକ୍ରି ହୋଇଥିବା ବେଳେ ୨୦୨୩-୨୪ରେ ୫ କୋଟି ୮୮ ଲକ୍ଷ ୮୫ ହଜାର ଲିଟର ବିଦେଶୀ ମଦ ବିକ୍ରି ହୋଇଛି । ସେହିପରି ୨୦୨୨-୨୩ରେ ୧୨ କୋଟି ୯ ଲକ୍ଷ ୬୭ ହଜାର ଲିଟର ବିକ୍ରି ହୋଇଥିବା ବେଳେ ୨୦୨୩-୨୪ରେ ଏହା ବଢି ୧୫ କୋଟି ୩୫ ଲକ୍ଷ ୭୨ ହଜାର ଲିଟର ହୋଇଛି ।

ସେହିପରି ଦେଶୀ ମଦର ମଧ୍ୟ ଚାହିଦା ବଢିଛି । ୨୦୨୨-୨୩ରେ ୮୪ ଲକ୍ଷ ୩୭ ହଜାର ଲିଟର ଦେଶୀ ମଦ ବିକ୍ରି ହୋଇଥିବା ବେଳେ ୨୦୨୩-୨୪ରେ ୯୮ ଲକ୍ଷ ୪୩ ହଜାର ଲିଟର ମଦ ବିକ୍ରି ହୋଇଛି । ସେହିପରି ଅବକାରୀ ରାଜସ୍ୱ ମଧ୍ୟ ବଢି ୨୦୨୩-୨୪ରେ ୭ ହଜାର ୨୧୬ କୋଟି ୯୯ ଲକ୍ଷରେ ପହଞ୍ଚିଛି । ଏ ସଂପର୍କରେ ବିଧାନସଭାରେ ଲିଖିତ ଉତ୍ତର ରଖି ଏହା କହିଛନ୍ତି ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ।

ରାଜ୍ୟରେ ଏବେ ମୋଟ ୧୦୭୩ଟି ବିଦେଶୀ ଠିପି ବନ୍ଦ ମଦ ଦୋକାନ ଅଛି । ୭୬୨ଟି ବିଦେଶୀ ଠିପି ଖୋଲା ମଦ ଦୋକାନ, ୧୭୯ଟି ଦେଶୀ ମଦ ଦୋକାନ, ୪୮୨ଟି ମହୁଲି ଦେଶୀ ମଦ ଦୋକାନ, ୩୫ଟି ମିଲିଟାରୀ କ୍ୟାଣ୍ଟିନ ଏବେ ଚାଲୁଛି ବୋଲି ଉତ୍ତର ମିଳିଛି ।