ଆଶାକର୍ମୀଙ୍କୁ ହତ୍ୟା କରି ପୋଖରୀରେ ଫିଙ୍ଗି ଦେଲେ
ସୁନ୍ଦରଗଡ଼: ସୁନ୍ଦରଗଡ଼ ଭସ୍ମା ଥାନା କୁଡ଼ାବଗା ପତ୍ରାପାଲି ଗାଁରେ ଆଶାକର୍ମୀଙ୍କୁ ବୀଭତ୍ସ ହତ୍ଯା । ହତ୍ୟା ପରେ ମୃତଦେହକୁ ଫିଙ୍ଗିଦେଲେ ପୋଖରୀରେ । ଗତକାଲି ଏହି ହତ୍ଯାକାଣ୍ଡ ଘଟିଥିବା ସନ୍ଦେହ କରାଯାଉଛି ।
ଗତକାଲି ମଧ୍ଯାହ୍ନ ପ୍ରାୟ ସାଢେ ୧୨ଟା ସମୟରେ ଆଶାକର୍ମୀ ସୁଭାଷିନୀ ନାଏକ କାମ ସାରି ଗାଁ ନିକଟ ପୋଖରୀକୁ ଗାଧୋଇବାକୁ ଯାଇଥିଲେ। ଏହାର ଅଧଘଣ୍ଟା ପରେ ତାଙ୍କ ମୋବାଇଲକୁ ଏକ ଫୋନ ଆସିଥିଲା । ଫୋନରେ ସେ କାନ୍ଦୁଥିବା ପରିବାର ଲୋକେ ଶୁଣିଥିଲେ । ଏହାପରେ ତାଙ୍କୁ ଆଉ ଦେଖିବାକୁ ମିଳି ନଥିଲା । ବିଭିନ୍ନ ସ୍ଥାନରେ ଖୋଜାଖୋଜି କରି ପରିବାର ଲୋକେ ନିରାଶ ହେବା ପରେ ପୋଲିସକୁ ଖବର ଦେଇଥିଲେ ।
ବିଭିନ୍ନ ସ୍ଥାନରେ ଯାଞ୍ଚ ବେଳେ ପୋଖରୀରେ ତାଙ୍କ ଚପଲ ଭାସୁଥିବା ସ ନିକଟରେ କପଡ଼ା ପଡ଼ିଥିବା ଦେଖିବାକୁ ଯାଇଥିଲା । ଏହାପରେ ପୋଖରୀଠାରୁ ପ୍ରାୟ ଅଧ କିମି ଦୂରରୁ ରକ୍ତଛିଟା ଲାଗିଥିବା ତାଙ୍କ ମୋବାଇଲ ଫୋନ ମିଳିଥିଲା ।
ଏହାପରେ ଅଗ୍ନିଶମ ବାହିନୀ ସହାୟତାରେ ପୋଖରୀରେ ଖୋଜାଖୋଜି କରାଯାଇଥିଲେ ବି କିଛି ମିଳି ନଥିଲା । ହେଲେ ଆଜି ସେହି ପୋଖରୀରେ ଆଶାକର୍ମୀଙ୍କ ମୃତଦେହ ଭାସୁଥିବା ଦେଖିବାକୁ ମିଳିଥିଲା । ପୋଲିସ ମୃତଦେହକୁ ଉଦ୍ଧାର କରି ତନାଘନା ଆରମ୍ଭ କରିଛି । ଆଶାକର୍ମୀଙ୍କ ବେକ ଓ କପାଳରେ ଛୁରାମାଡ଼ ହୋଇଥିବା ଅନୁମାନ କରାଯାଉଛି । ଜମିଜମା ବିବାଦକୁ ନେଇ ଏହି ହତ୍ଯାକାଣ୍ଡ ଘଟିଥିବା କହିଛନ୍ତି ମୃତକଙ୍କ ପରିବାର ଲୋକେ ।
