ବ୍ରହ୍ମପୁରରେ ବୁଲୁଛି ବାଘ, ରାଜପଥ ଅତିକ୍ରମ କରିବା ବେଳର ଭିଡିଓ ଭାଇରାଲ

ବ୍ରହ୍ମପୁର: ଗୋଳନ୍ଥରା ଥାନା ରୋଲାଣ୍ଡ କଲେଜ ନିକଟରେ ଏକ ମହାବଳ ବାଘ ଜାତୀୟ ରାଜପଥ ଅତିକ୍ରମ କରୁଥିବା ଭିଡିଓ ହେଉଛି ଭାଇରାଲ । ଜଣେ ଯାତ୍ରୀ ନିଜ କାର ଯୋଗେ ବ୍ରହ୍ମପୁରରୁ ଇଚ୍ଛାପୁର ଅଭିମୁଖେ ଯାଉଥିବା ବେଳେ ରୋଲାଣ୍ଡ କଲେଜ ନିକଟରେ ମହାବଳ ବାଘ ରାସ୍ତା ପାର ହେଉଥିବା ବେଳେ କାରର କ୍ୟାମେରାରେ ଭିଡିଓ କଏଦ ହୋଇଛି ।

ଭିଡିଓ ପରବର୍ତ୍ତୀ ସମୟରେ ଭାଇରାଲ ହୋଇଥିବା ବେଳେ ଭିଡିଓ ବନ ବିଭାଗ ହାତରେ ମଧ୍ୟ ଲାଗିଛି । ଗତ ୩ ତାରିଖ ରାତିରେ ଏକ ମହାବଳ ବାଘ ଜାତୀୟ ରାଜପଥ ଅତିକ୍ରମ କରୁଥିବା ଭିଡିଓ ମିଳିବା ପରେ ବ୍ରହ୍ମପୁର ବନ ବିଭାଗ ପକ୍ଷରୁ ଏକ ଟିମ ଯାଇ ତଦନ୍ତ କରିଥିଲା । ତଦନ୍ତ ସମୟରେ ବାଘର ପାଦଚିହ୍ନ ମଧ୍ୟ ସେଠାରୁ ଠାବ ହୋଇଛି ।

ତେବେ ବର୍ତ୍ତମାନ ଜାତୀୟ ରାଜପଥ ତଥା ଏହାର ଆଖପାଖରେ ବାଘ ନଥିବା ଜଣାପଡ଼ିଛି । ତେବେ ଭିଡିଓକୁ ନେଇ ଅଧିକ ତଦନ୍ତ ଜାରି ରହିଛି । ସ୍ଥାନୀୟ ଗ୍ରାମବାସୀ ଭୟଭୀତ ହେବାର ଆବଶ୍ୟକତା ନାହିଁ । ଯଦି ସେମାନେ କେଉଁ ସ୍ଥାନରେ ବାଘ ଦେଖୁଛନ୍ତି ତେବେ ସଙ୍ଗେ ସଙ୍ଗେ ବନ ବିଭାଗକୁ ଖବର ମଧ୍ୟ ଦେଇପାରିବେ । ଏହାଛଡ଼ା ବନ ବିଭାଗର ଟିମ୍‌ ଯାଇ ସ୍ଥାନୀୟ ବାସିନ୍ଦାଙ୍କୁ ସଚେତନ ରହିବା ସହିତ ସୁରକ୍ଷିତ ରହିବା ନିମନ୍ତେ ଅପିଲ କରୁଛନ୍ତି ।