କନ୍ନଡ୍ ଷ୍ଟାର୍ ଦର୍ଶନଙ୍କୁ ମିଳିଲା ଜାମିନ୍

ନନ୍ଦିଘୋଷ ବ୍ୟୁରୋ: କନ୍ନଡ୍ ଷ୍ଟାର୍ ଦର୍ଶନଙ୍କୁ ମିଳିଲା ଜାମିନ। ସ୍ବାସ୍ଥ୍ୟଗତ କାରଣରୁ ତାଙ୍କୁ କର୍ଣ୍ଣାଟକ ହାଇକୋର୍ଟ ଜାମିନ ଦେଇଛନ୍ତି। ତାଙ୍କର ଗୋଡ଼ରେ ଏକ ଅପରେସନ କରାଯିବାର ଅଛି। ତେଣୁ ଦର୍ଶନଙ୍କୁ ସାମୟିକ ଭାବେ ୬ ସପ୍ତାହ ପାଇଁ ଜାମିନ ଦେଇଛନ୍ତି କର୍ଣ୍ଣାଟକ ହାଇକୋର୍ଟ। ନିଜର ଜଣେ ଫ୍ୟାନ ରେଣୁକାସ୍ଵାମୀଙ୍କୁ ହତ୍ୟା ଅଭିଯୋଗରେ ଦର୍ଶନଙ୍କୁ ଗତ ଜୁନ ମାସରେ ପୋଲିସ ଗିରଫ କରିଥିଲା। ଗର୍ଲଫ୍ରେଣ୍ଡ ପବିତ୍ରା ଗୌଡ଼ଙ୍କୁ ଅଶାଳୀନ ମେସେଜ ପଠାଇଥିଲେ ରେଣୁକାସ୍ଵାମୀ। ଜୁନ ୯ ତାରିଖରେ ବେଙ୍ଗଳରୁରୁର ଏକ ଡ୍ରେନରୁ ମିଳିଥିଲା ରେଣୁକାସ୍ଵାମୀଙ୍କର ଏକ ମୃତଦେହ। ତନାଘନା କରିବା ପରେ ଜଣାପଡ଼ିଥିଲା ରେଣୁକାଙ୍କୁ ପିଟି ପିଟି ହତ୍ୟା କରିଥିଲେ ଫିଲ୍ମ ଷ୍ଟାର ଦର୍ଶନ ଓ ତାଙ୍କ ସହଯୋଗୀ।

ପ୍ରଥମେ ରେଣୁକାସ୍ଵାମୀଙ୍କୁ ଅପହରଣ କରି ବେଙ୍ଗଳୁରୁ ଅଣାଯାଇଥିଲା ଏବଂ ଏକ ଫାର୍ମ ହାଉସରେ ବହୁତ ନିର୍ଯାତନା ଦେବା ପରେ ପିଟି ପିଟି ହତ୍ୟା କରାଯାଇଥିଲା। ଜୁନ ୧୧ରେ ଦର୍ଶନ ଓ ଅନ୍ୟ ୧୭ ଜଣଙ୍କୁ ଗିରଫ  କରିଥିଲା ପୋଲିସ । ସେହିଦିନଠାରୁ ସବୁ ଅଭିଯୁକ୍ତ ଜେଲରେ ଥିଲେ।