ରତ୍ନଭଣ୍ଡାର ଯାଞ୍ଚକୁ ନେଇ ଶଙ୍କାରାଚାର୍ଯ୍ୟଙ୍କ କ୍ଷୋଭ, କହିଲେ- ମୋ ମତାମତ ନିଆଯାଉନି

ପୁରୀ: ଶ୍ରୀମନ୍ଦିର ରତ୍ନଭଣ୍ଡାର ଯାଞ୍ଚକୁ ନେଇ ପୁରୀ ଶଙ୍କରାଚାର୍ଯ୍ୟଙ୍କ କ୍ଷୋଭ l ଏ ବିଷୟରେ ତାଙ୍କଠାରୁ କୌଣସି ମତାମତ ନିଆଯାଉନାହିଁ ବୋଲି କହିଛନ୍ତି ଜଗତଗୁରୁ ଶଙ୍କରାଚାର୍ଯ୍ୟ ।

ସେ କହିଛନ୍ତି, ମୋତେ ଅଣଦେଖା କରାଯାଉଛି ।ସାଧୁସନ୍ତଙ୍କ ଶୃଙ୍ଖଳିତ ଦର୍ଶନ ପାଇଁ କୌଣସି ବ୍ୟବସ୍ଥା ଗ୍ରହଣ କରାଯାଉନାହିଁ । ସାଧାରଣ ଭକ୍ତଙ୍କ ପରି ସାଧୁସନ୍ଥମାନେ ମଧ୍ୟ ଭିଡ଼ରେ ଯାଇ ଦର୍ଶନ କରୁଛନ୍ତି ।

ଆଜି ଜଗତଗୁରୁ ଚତୁଃମାସିଆ ବ୍ରତ ସମ୍ପନ୍ନ କରି ପତିତପାବନ ଦର୍ଶନ କରିବା ପରେ ପ୍ରତିକ୍ରିୟା ରଖିଛନ୍ତି । ପରମ୍ପରା ଅନୁସାରେ ଜଗତଗୁରୁ ଶଙ୍କରାଚାର୍ଯ୍ୟ ବ୍ରତ ସମୟରେ ଗୋବର୍ଦ୍ଧନ ମଠରୁ ବାହାରକୁ ବାହାରନ୍ତି ନାହିଁ । ମାତ୍ର ବ୍ରତ ସାରିବା ପରେ ଗୋବାର୍ଦ୍ଧନ ମଠରୁ ବାହାରି ବାଲିସାହି ରାସ୍ତା ଦେଇ ସେ ସିଂହଦ୍ୱାର ନିକଟରେ ପହଞ୍ଚି ପତିତପାବନଙ୍କୁ ଦର୍ଶନ କରି ଆଶିଷ ଲାଭ କରିଛନ୍ତି । ପତିତପାବନ ଦର୍ଶନ କରିବା ପରେ ସେ ପଞ୍ଚଗୋଟି ଗୋଶାଳା, ମା ବାଟମଙ୍ଗଳା ଦର୍ଶନ କରି ମହୋଦଧି ଆଳତି କରିବେ l ସନାତନ ଧର୍ମର ଆଦିଗୁରୁଙ୍କୁ ବହୁ ଭକ୍ତ ଶ୍ରଦ୍ଧାଳୁ ଦର୍ଶନ କରି ସୌଭାଗ୍ୟ ଲାଭ କରିଛନ୍ତି ।