ୱାଶିଂଟନ: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୩୪ଟି ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି। ଆମେରିକା ଇତିହାସରେ ସେ ପ୍ରଥମ ପୂର୍ବତନ ରାଷ୍ଟ୍ରପତି ଯିଏ ଅପରାଧିକ ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି। ମାମଲା ଆରମ୍ଭରୁ ଡୋନାଲ୍ଡ ଟ୍ରମ୍ପ ନିଜକୁ ନିର୍ଦ୍ଦୋଷ କହିବା ସହ ଏହା ତାଙ୍କ ବିରୋଧରେ ଷଡଯନ୍ତ୍ର ବୋଲି କହିଛନ୍ତି।
ନଭେମ୍ବରରେ ଆମେରିକାରେ ନିର୍ବାଚନ ଅନୁଷ୍ଠିତ ହେବ ଏବଂ ଡୋନାଲ୍ଡ ଟ୍ରମ୍ପ ହେଉଛନ୍ତି ରିପବ୍ଲିକାନ୍ ପାର୍ଟିର ରାଷ୍ଟ୍ରପତି ପ୍ରାର୍ଥୀ। ଏଭଳି ପରିସ୍ଥିତିରେ ପ୍ରଶ୍ନ ଉଠିଛି ଯେ ଟ୍ରମ୍ପ ଦୋଷୀ ସାବ୍ୟସ୍ତ ହେବା ପରେ ମଧ୍ୟ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରିବେ ନା ନାହିଁ ? ତାଙ୍କୁ କେତେ ବର୍ଷ ଦଣ୍ଡିତ କରାଯାଇପାରିବ ଏବଂ ଯଦି ଟ୍ରମ୍ପ ଜେଲରେ ଅଛନ୍ତି, ତେବେ ନିର୍ବାଚନ ପ୍ରଚାର ଉପରେ ଏହାର କ’ଣ ପ୍ରଭାବ ପଡ଼ିବ?
କୋର୍ଟ ଟ୍ରମ୍ପଙ୍କୁ ଦୋଷୀ ଘୋଷଣା କରିଛନ୍ତି, କିନ୍ତୁ ତାଙ୍କ ଦଣ୍ଡ ଏପର୍ଯ୍ୟନ୍ତ ଘୋଷଣା କରାଯାଇ ନାହିଁ। ଜୁଲାଇ ୧୧ରେ ଏହି ଦଣ୍ଡ ଘୋଷଣା କରାଯିବ। ଆଇନ ଅନୁଯାୟୀ ତାଙ୍କୁ ସର୍ବାଧିକ ଚାରି ବର୍ଷ ଦଣ୍ଡିତ କରାଯାଇପାରେ। ରିପବ୍ଲିକାନ୍ ପାର୍ଟି ସମ୍ମିଳନୀ ପୂର୍ବରୁ ଏହି ଦଣ୍ଡ ଘୋଷଣା କରାଯିବ।
ଆମେରିକାର ନିୟମ ଅନୁଯାୟୀ ଡୋନାଲ୍ଡ ଟ୍ରମ୍ପ ଦୋଷୀ ସାବ୍ୟସ୍ତ ହେବା ପରେ ମଧ୍ୟ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରିବେ। ଏହି ରାୟ ପରେ ତୁରନ୍ତ ଟ୍ରମ୍ପଙ୍କ ପ୍ରଚାର ଦଳ ପାଣ୍ଠି ସଂଗ୍ରହ ପାଇଁ ଆବେଦନ କରିଛନ୍ତି । ଆମେରିକାର ସମ୍ବିଧାନ ଅନୁଯାୟୀ ଟ୍ରମ୍ପ ରାଷ୍ଟ୍ରପତି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରିବେ। ସମ୍ବିଧାନରେ ଜଣେ ରାଷ୍ଟ୍ରପତି ପ୍ରାର୍ଥୀଙ୍କ ୩୫ ବର୍ଷ ବୟସ ଏବଂ ଜଣେ ଜନ୍ମିତ ଆମେରିକୀୟ ନାଗରିକ ହେବା ଆବଶ୍ୟକ । ଏହାର ଅର୍ଥ ଟ୍ରମ୍ପ ଜେଲରୁ ମଧ୍ୟ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରିବେ।
