ବଳକା ଉଷୁନା ଚାଉଳ କାହିଁକି ଉଠାଯାଉନାହିଁ ବୋଲି ସଂସଦରେ ପ୍ରଶ୍ନ କଲେ ମାନସ ମଙ୍ଗରାଜ

ନୂଆଦିଲ୍ଲୀ: ଓଡ଼ିଶାରୁ ବଳକା ଉଷୁନା ଚାଉଳ ଏଫସିଆଇ ଉଠାଉ ନଥିବା ନେଇ ସଂସଦରେ ଉଦବେଗ ପ୍ରକାଶ କଲେ ବିଜେଡି ସାଂସଦ ମାନସ ରଞ୍ଜନ ମଙ୍ଗରାଜ। ଏ ସମ୍ପର୍କରେ ଏକ ଅଣତାରକା ପ୍ରଶ୍ନରେ ବଳକା ଉଷୁନା ଚାଉଳ କାହିଁକି ଉଠାଯାଉନାହିଁ ବୋଲି ସେ ପ୍ରଶ୍ନ କରିଛନ୍ତି। ଏହାର ଉତ୍ତର ରଖିଛନ୍ତି ଗ୍ରାମ୍ୟ ଉନ୍ନୟନ ଓ ଖାଉଟି କଲ୍ଯାଣ ବ୍ଯାପାର, ଖାଦ୍ଯ ଓ ସାଧାରଣ ବଣ୍ଟନ ବିଭାଗ ରାଷ୍ଟ୍ରମନ୍ତ୍ରୀ ସାଧ୍ବୀ ନିରଞ୍ଜନ ଜ୍ୟୋତି। ସେ କହିଛନ୍ତି- କେନ୍ଦ୍ର ସରକାର ଓ ରାଜ୍ଯ ସରକାରଙ୍କ ମଧ୍ୟରେ ଏନେଇ ଏକ ବୁଝାମଣା ଚୁକ୍ତି ସ୍ବାକ୍ଷରିତ ହୋଇଛି। ଏହି ଚୁକ୍ତି ଅନୁଯାୟୀ ଏଫସିଆଇ ସବୁ ରାଜ୍ୟରୁ ଚାଉଳ ଉଠାଇଥାଏ। ୨୦୨୨-୨୩ ଖରିଫ ଋତୁରେ ୫୩.୮୫ ଲକ୍ଷ ମେଟ୍ରିକ ଟନ ଚାଉଳ ଓଡ଼ିଶା ଯୋଗାଇଛି। ସେଥିମଧ୍ୟରୁ ୪୪.୧୮ ଲକ୍ଷ ମେଟ୍ରିକ ଟନ ହେଉଛି ଉଷୁନା ଚାଉଳ। ସେଣ୍ଟ୍ରାଲ ପୁଲକୁ ଓଡ଼ିଶା ପଠାଇଥିବା ଚାଉଳ ମଧ୍ୟରୁ ନିଜସ୍ବ ବ୍ଯବହାର ପାଇଁ ୩୧. ୩୭ ଲକ୍ଷ ମେଟ୍ରିକ ଟନ ରଖିଥିଲା। ବଳକା ୨୨.୪୮ ଲକ୍ଷ ମେଟ୍ରିକ ଟନ୍ ଚାଉଳ ଏଫସିଆଇ ଉଠାଇଛି। ଏଫସିଆଇ ପାଖରେ ପର୍ଯ୍ୟାପ୍ତ ଷ୍ଟୋରେଜ କ୍ଷମତା ରହିଛି। ଯଦ୍ଦ୍ବାରା ଓଡ଼ିଶାର ବଳକା ଚାଉଳ ଉଠାଇବାରେ କୌଣସି ଅସୁବିଧା ନାହିଁ ବୋଲି କେନ୍ଦ୍ରମନ୍ତ୍ରୀ କହିଛନ୍ତି।