ପୁରୀ ସ୍ୱର୍ଗଦ୍ୱାରରେ ହେବ ମହେଶ୍ୱର ମହାନ୍ତିଙ୍କ ଶେଷକୃତ୍ୟ

ଭୁବନେଶ୍ୱର: ପୁରୀର ପୂର୍ବତନ ବିଧାୟକ ମହେଶ୍ବର ମହାନ୍ତିଙ୍କ ପରଲୋକ । ୬୭ ବର୍ଷ ବୟସରେ ମହେଶ୍ବରଙ୍କର ପରଲୋକ ହୋଇଛି । ଭୁବନେଶ୍ବରର ଏକ ଘରୋଇ ହସପିଟାଲରେ ଚିକିତ୍ସାଧୀନ ଅବସ୍ଥାରେ ମହେଶ୍ବର ମହାନ୍ତିଙ୍କର ଦେହାନ୍ତ ହୋଇଛି । ଗତ ୧ ତାରିଖ ରାତିରେ ମହେଶ୍ବର ମହାନ୍ତି ଅସୁସ୍ଥ ହୋଇ ମେଡିକାଲରେ ଭର୍ତ୍ତି ହୋଇଥିଲା ବେଳେ ଚିକିତ୍ସାଧୀନ ଅବସ୍ଥାରେ ଆଜି ଭୋର ୩ଟା ୨୫ରେ ତାଙ୍କର ପରଲୋକ ହୋଇଛି। ତାଙ୍କର ଅନ୍ତିମ ସଂସ୍କାର ପୁରୀ ସ୍ବର୍ଗଦ୍ବାରରେ ହେବାନେଇ ସୂଚନା ମିଳିଛି।

ମହେଶ୍ବରଙ୍କ ବିୟୋଗ ଖବର ଶୁଣିବା ପରେ ବିଭିନ୍ନ ମହଲରେ ଶୋକ ପ୍ରକାଶ ପାଇଛି। ହସ୍ପିଟାଲରେ ପହଞ୍ଚି ଶେଷ ଦର୍ଶନ କରିଥିଲେ ବଶିଷ୍ଟ ବ୍ୟକ୍ତି ବିଶେଷ। ମେଡିକାଲରୁ ମହେଶ୍ବରଙ୍କ ପାର୍ଥିବ ଶରୀରକୁ ଶଙ୍ଖ ଭବନକୁ ନିଆଯାଇଥିଲା। ସେଠାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମହେଶ୍ବରଙ୍କ ଶେଷ ଦର୍ଶନ କରିବା ସହ ଶ୍ରଦ୍ଧାଞ୍ଜଳି ଜଣାଇଥିଲେ।

ସେହିପରି ଦଳୀୟ ନେତା ଓ କର୍ମୀ ମଧ୍ୟ ଶେଷ ଦର୍ଶନ କରିଥିଲେ । ଶଙ୍ଖ ଭବନ ପରେ ବିଧାନସଭାରେ ଗାର୍ଡ ଅଫ୍ ଅନର ପ୍ରଦାନ କରାଯାଇଥିଲା। ବିଧାନସଭାରେ ବହୁ ମନ୍ତ୍ରୀ, ସରକାରୀ ମୁଖ୍ୟ ସଚେତକଙ୍କ ସମେତ ସବୁ ଦଳର ବିଧାୟକ ତାଙ୍କ ପ୍ରତି ଶ୍ରଦ୍ଧାଞ୍ଜଳି ଜଣାଇବା ସହ ସ୍ମୃତିଚାରଣ କରିଥିଲେ। ଏହାପରେ ପିପିଲି ଦଳୀୟ କାର୍ଯ୍ୟାଳୟ, ସତ୍ୟବାଦୀ ଦଳୀୟ କାର୍ଯ୍ୟାଳୟକୁ ନିଆଯାଇଛି ପାର୍ଥିବ ଶରୀର। ସେଠାରେ ସ୍ଥାନୀୟ ନେତା ଓ ଜନତା ଶେଷ ଦର୍ଶନ କରିବେ। ପରେ ପୁରୀ ବାସଭବନକୁ ନିଆଯିବ ପାର୍ଥିବ ଶରୀର। ବାସଭବନରେ ବନ୍ଧୁ ଓ ପରିବାର ବର୍ଗ ଶେଷ ଦର୍ଶନ କରିବା ପରେ ପୁରୀ ଦଳୀୟ କାର୍ଯ୍ୟାଳୟକୁ ନିଆଯିବ ମରଶରୀର। ଶେଷରେ ପୁରୀ ସ୍ବର୍ଗଦ୍ବାରରେ ହେବ ଅନ୍ତିମ ସଂସ୍କାର।