ବାହା ହେବେ OYO ପ୍ରତିଷ୍ଠାତା ରିତେଶ, ପ୍ରଧାନମନ୍ତ୍ରୀଙ୍କୁ କଲେ ନିମନ୍ତ୍ରଣ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନିମନ୍ତ୍ରଣ କଲେ OYO ପ୍ରତିଷ୍ଠାତା ରିତେଶ ଅଗ୍ରୱାଲ  ।  ମା ଓ ବିବାହ କରିବାକୁ ଯାଉଥିବା ବାନ୍ଧବୀଙ୍କୁ  ସାଥିରେ ନେଇ ପ୍ରଧାନମନ୍ତ୍ରୀଙ୍କୁ ଭେଟିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିବା ସହ ବାହାଘର କାର୍ଡ ଦେଇଛନ୍ତି ଓୟୋ  ସିଇଓ ରିତେଶ ଅଗ୍ରୱାଲ । ଆସନ୍ତାମାସରେ ରିତେଶ ଅଗ୍ରୱାଲ ବାହା ହେଉଥିବା ବେଳେ ତାଙ୍କ ଭାବିପତ୍ନୀ ଓ ମା’ଙ୍କ ସହ ପ୍ରଧାନମନ୍ତ୍ରୀଙ୍କୁ ନିମନ୍ତ୍ରଣ କରିଥିଲେ ।

ପ୍ରଧାନମନ୍ତ୍ରୀଙ୍କୁ ନିମନ୍ତ୍ରଣ କାର୍ଡ ଦେଇଥିବା ନେଇ ନିଜେ ରିତେଶ ଅଗ୍ରୱାଲ ଟ୍ୱିଟରରେ ଫଟୋ ସେୟାର କରିଥିଲେ  । ପିଏମ ମୋଦିଙ୍କ ସହ ସାକ୍ଷାତ ବେଶ ଉତ୍ସାହଜନକ ବୋଲି ଲେଖିଛନ୍ତି ରିତେଶ । ରିତେଶ ଅଗ୍ରୱାଲ ହେଉଛନ୍ତି ଓଡ଼ିଶା ରାୟଗଡ଼ାରେ ଜନ୍ମିତ, ଦେଶର ପ୍ରତିଷ୍ଠିତ ବ୍ୟବସାୟୀ । ହୋଟେଲ ଚେନ୍ ଓୟୋ ପ୍ରତିଷ୍ଠା କରି ଭାରତରେ ହୋଟେଲ ଶିଳ୍ପକୁ ଏକ ନୂଆ ଦିଗ ଦେଇଛନ୍ତି ରିତେଶ ଅଗ୍ରୱାଲ ।

ସାକ୍ଷାତ ପରେ ପର୍ଯ୍ୟଟନ ଉଦ୍ୟାଗ ବିକାଶ ପାଇଁ କ୍ରମାଗତ ଭାବେ କାମ କରି ଆସୁଥିବା ସେ ଟୁଇଟ କରି ସୂଚନା ଦେଇଛନ୍ତି । ବିଶେଷ କରି ରାୟଗଡ଼ା, ଗୀର, ଲଦାଖ୍, ରାମେଶ୍ୱରମ୍ ଏବଂ ମେଘାଳୟ ପର୍ଯ୍ୟଟନ ଶିଳ୍ପରେ ବଡ଼ ସୁଯୋଗ ଥିବା ସୂଚନା ଦେଇଛନ୍ତି । ଏହି ଅବସରରେ ପ୍ରଧାନମନ୍ତ୍ରୀ ତାଙ୍କୁ ନୂଆ ଜୀବନ ପାଇଁ ଶୁଭକାମନା ଜଣାଥିବା ଟୁଇଟରରେ ଲେଖିଛନ୍ତି ରିତେଶ ଅଗ୍ରୱାଲ  ।