ନିରାଶ କରିଛି କେନ୍ଦ୍ର ବଜେଟ, ଚାଷୀ, ଗରିବ ଓ ମଧ୍ୟବିତ୍ତଙ୍କ ପେଟକୁ ଲାତ

ଭୁବନେଶ୍ୱର: କେନ୍ଦ୍ର ବଜେଟ୍‌ ଅମୃତ ନୁହେଁ, ବିଷ l ଏପରି କହି ବଜେଟ ଉପରେ କଡ଼ା ପ୍ରତିକ୍ରିୟା ଦେଇଛନ୍ତି କଂଗ୍ରେସ ବିଧାୟକ ସୁରେଶ ରାଉତରାୟ । ଚାଷୀ, ଗରିବ ଓ ମଧ୍ୟବିତ୍ତଙ୍କ ପେଟକୁ କେନ୍ଦ୍ର ସରକାର ଲାତ ମାରିଛନ୍ତି l ବଜେଟ ନୈରାଶ୍ୟଜନକ ବୋଲି ସୁର ରାଉତରାୟ କହିଛନ୍ତି । ଚାଷୀଙ୍କ ପାଇଁ ବଜେଟରେ କିଛି ନାହିଁ l ଧାନ ବିକ୍ରି ମଧ୍ୟ ହୋଇପାରିବନି l କେନ୍ଦ୍ର ସରକାର ଶିଳ୍ପପତିଙ୍କ ସରକାର l ସ୍ୱାସ୍ଥ୍ୟ ଓ ଶିକ୍ଷା ପାଇଁ ବଜେଟରେ ବ୍ୟୟ ବରାଦ କମିଛି l ଯାହାକୁ ଦଳ କଡ଼ା ବିରୋଧ କରୁଛି ବୋଲି ସୁର କହିଛନ୍ତି । ରେଳବାଇ କ୍ଷେତ୍ରରେ ଓଡ଼ିଶାକୁ କେନ୍ଦ୍ର ଅବହେଳା କରିଛି l

ଅନ୍ୟପଟେ ସେ ରାଜ୍ୟ ସରକାରଙ୍କୁ ପ୍ରଶଂସା କରିଛନ୍ତି । 5T ସଂସ୍କାରରେ ବହୁତ କାମ ହୋଇଛି ବୋଲି ସୁର କହିଛନ୍ତି । ସେହିପରି  କେନ୍ଦ୍ର ସରକାରଙ୍କ ବଜେଟ ଗରିବ ବିରୋଧୀ ବଜେଟ୍ ବୋଲି କହିଛନ୍ତି ବିଜେଡି ବିଧାୟକ ଭୂପିନ୍ଦର ସିଂ । ମୌଳିକ ସୁବିଧା କ୍ଷେତ୍ରରେ ବଜେଟରେ କିଛି ନାହିଁ । ଚାଷୀଙ୍କୁ ହତାଶ କରିଛି କେନ୍ଦ୍ର ବଜେଟ୍ । କେନ୍ଦ୍ର ସରକାର ବୋଧେ ଚାହିଁଛନ୍ତି ଚାଷୀମାନେ ଆଉ ଧାନ ଚାଷ ନକରନ୍ତୁ l ଏଫସିଆଇ ଧାନ କିପରି ନଉଠାଇବ ସେ ବାଟ ବଜେଟରେ ଫିଟାଇ ଦେଇଛନ୍ତି । କେନ୍ଦ୍ରର ବଜେଟ୍ ଶିଳ୍ପପତିଙ୍କ ପାଇଁ ବୋଲି କହିଛନ୍ତି ଭୂପିନ୍ଦର ।

ସେହିପରି ଏଥର କେନ୍ଦ୍ର ବଜେଟ ସମ୍ପୂର୍ଣ୍ଣ ଭାବରେ କୃଷକ ବିରୋଧୀ ବୋଲି କହିଛନ୍ତି ରାଷ୍ଟ୍ରୀୟ କିଷାନ ମଜଦୁର ମହାସଂଘର ନେତା ସଚିନ ମହାପାତ୍ର । କୃଷି ଉତ୍ପାଦ ସଂଗ୍ରହ ପାଇଁ ବ୍ୟୟବରାଦ ୮୦ ହଜାର କୋଟିରୁ ୨୫ ପ୍ରତିଶତ କମାଇ ୬୦ ହଜାର କୋଟି କରାଯାଇଛି । ଏହାର ଅର୍ଥ ଏମଏସପିରେ ଚାଷୀ ବିକିବା ଆହୁରି କଷ୍ଟ ହେଇଯିବ । ବଜେଟରେ କୃଷି ଯନ୍ତ୍ରପାତି ଉପରେ ରିହାତି ବା ଜିଏସଟି କମ୍ କରିବାର କୌଣସି ବ୍ୟବସ୍ଥା ନାହିଁ । ଏହି ବିଜେଟ କୃଷକଙ୍କ ପାଇଁ ଭଲ ନୁହେଁ ବୋଲି ସଚିନ କହିଛନ୍ତି ।