ଦୁର୍ବଳ ହାତ ଶକ୍ତ ପାଇଁ କଣ ରହିଛି ଫର୍ମୁଲା ?

ସଦ୍ୟ ସମାପ୍ତ ମହାରାଷ୍ଟ୍ର ଓ ହରିୟାଣା ନିର୍ବାଚନରେ ସବୁ ଏକଜିଟ୍ ପୋଲ ଏନଡିଏ ଆଡକୁ ଢଳୁଛନ୍ତି । ଯଦି ଏକଜିଟ୍ ପୋଲର ଆକଳନ ସତ ହୁଏ ତେବେ ୨୦୧୯ ସାଧାରଣ ନିର୍ବାଚନ ପରେ ପୁଣିଥରେ ପରାଜୟ ଦେଖିବ କଂଗ୍ରେସ । ୨ ରାଜ୍ୟରେ ମାତ୍ର କିଛି ପ୍ରତିଶତରେ ସୀମିତ ରହିଯିବ ହାତ । ତେବେ କଂଗ୍ରେସର ବାରମ୍ବାର ପରାଜୟର କଣ ରହିଛି କାରଣ ?

ଭାରତୀୟ ସମାଜର ନିୟମ କହେ, ସବୁ ବାପାମାଆ ଚାହାଁନ୍ତି ବୃଦ୍ଧାବସ୍ଥାରେ ପୁଅ ତାଙ୍କର ଆଶାବାଡ଼ି ହେବ। ପୁଅର ଉନ୍ନତିକୁ ପୁଞ୍ଜି କରି ବଞ୍ଚିଯିବେ ବାକି ଆୟୁଷ । ମାତ୍ର ଅନେକ ସମୟରେ, ଅନେକ ଯାଗାରେ ଦେଖାଯାଇଛି ଏହାର ବିଲକ୍ଷଣତା । ଏଥିସହ ଭାରତୀୟ ରାଜନୀତିରେ ମଧ୍ୟ ।

୨୦୧୪ ଭଳି ୨୦୧୯ ସାଧାରଣ ନିର୍ବାଚନରେ ଜାତୀୟ କଂଗ୍ରେସର ବିପୁଳ ବିପର୍ଯ୍ୟୟ ପାଇଁ ନିଜକୁ ଦାୟୀ କରି ସଭାପତି ରାହୁଲ ଗାନ୍ଧି ନିଜ ପଦବୀରୁ ଇସ୍ତଫା ପାଇଁ ଅଡ଼ିବସିଲେ । ବହୁ ବରିଷ୍ଠ ଓ ଯୁବ ନେତାଙ୍କ ଅନୁରୋଧ ସତ୍ତ୍ବେ ହତୋତ୍ସାହିତ ରାହୁଲ ବାବା କିନ୍ତୁ ଥିଲେ ନଛୋଡ଼ବନ୍ଦା । ଶେଷରେ ଗ୍ରହଣ ହେଲା ତାଙ୍କ ଇସ୍ତଫା ଓ ଅନ୍ତରୀଣ ଭାବେ ଦଳର ମଙ୍ଗ ଧରିଲେ ମାଆ ସୋନିଆ ଗାନ୍ଧି । ଯାହାକୁ ନେଇ ଗଣମାଧ୍ୟମରେ ଲାଗିରହିଲା ବିତର୍କ ଓ ସୋସିଆଲ ମିଡ଼ିଆରେ ହେଲା ଘମାସାନ । ଅନେକ ମନ୍ତବ୍ୟ ଭିତରୁ ଏହା ଉଲ୍ଲେଖନୀୟ ଥିଲା, ଯେ ‘ ବୃଦ୍ଧାବସ୍ଥାରେ ମାଆ ପାଇଁ ବୋଝ ହେଲେ ପୁଅ ‘ । ‘ଅସଫଳ’ ରାହୁଲ ଗାନ୍ଧିଙ୍କୁ ନେଇ ବିଭିନ୍ନ ତାତ୍ସଲ୍ୟ କଲା ସୋସିଆଲ ମିଡ଼ିଆ । ଆଶା ଥିଲା ସୋନିଆଙ୍କ ନେତୃତ୍ବରେ ପୁଣି ସମସ୍ତ କର୍ମୀ ଏକଜୁଟ ହୋଇ ଏହା କରି ଦେଖାଇବେ ‘ କଂଗ୍ରେସ କମିଂ’ । କିନ୍ତୁ ଏ ଭିତରେ ବାସ୍ତବରେ ସେମିତି କିଛି ହୋଇନି । ରାହୁଲଙ୍କ ବେଳୁ ମଇଁଷି ସିଙ୍ଗ ଫଟା, ଜୁଝିଲା ବେଳକୁ ଗୋଟା ହୋଇପାରିଲାନି। ତେବେ କଂଗ୍ରେସ କର୍ମୀ ମାଡ଼ି ଚାଲିବେ ବା କେମିତି ? ବିଭିନ୍ନ ରାଜ୍ୟରେ ଦଳୀୟ ଅର୍ନ୍ତକନ୍ଦଳ, ଗୋଷ୍ଠୀ ବିବାଦ, ନିର୍ଜୀବ ସାଂଗଠନିକ ସ୍ଥିତି, ଅପାରଗ ମଙ୍ଗୁଆଳ ଓ ଅର୍ଥାଭାବ କଂଗ୍ରେସର ଭବିଷ୍ୟତକୁ ଆହୁରି ଠେଲିଚାଲିଛି ରାଜନୈତିକ ଅପ୍ରାସଙ୍ଗିକତା ଆଡ଼କୁ । ମାତ୍ର କେଇଟା ରାଜ୍ୟରେ ଶାସନ ଡୋରୀକୁ ଛାଡ଼ିଦେଲେ କଂଗ୍ରେସ ହାତରେ ସୂତା ଖଣ୍ଡେ ବି ନାହିଁ । ଏଇମାତ୍ର ସରିଥିବା ମହାରାଷ୍ଟ୍ର ଓ ହରିଆଣା ନିର୍ବାଚନ ଓ କିଛି ଉପ ନିର୍ବାଚନକୁ ଦେଖିଲେ ଚିତ୍ର କିଛି ସେମିତି ଲାଗୁଥିଲା । ଯେମିତି କଂଗ୍ରେସ, ଦଳର ଉପସ୍ଥାନ ପକାଇବାକୁ ଲଢ଼ୁଛି, ବିଜୟ ପାଇଁ ନୁହେଁ । ସବୁ କିଛି ଥିଲା ଶୁଖିଲା ଶୁଖିଲା ।

ତେବେ ଏଭଳି ସ୍ଥିତି ପାଇଁ ଦାୟୀ କିଏ ? ରାହୁଲ ଗାନ୍ଧି କି ? ଦଳର ମୁଖିଆ ଭାବେ ସେ ମୁଣ୍ଡେଇଥିବା ଦୁଇ ବର୍ଷର ଶିରପା କି ? ତାଙ୍କ ରାଜନୈତିକ ଅପରିପକ୍ବତା, ପିଲାଳିଆ ଅଭିଭାଷଣ, ସେ ବନେଇଥିବା ରାଜ୍ୟ ମଙ୍ଗୁଆଳଙ୍କ ଭିତରେ ନେତୃତ୍ବର ଅଭାବ ନା ଅବିଶ୍ବାସ ? କିଏ ଦାୟୀ  ? ଯେଉଁଥିପାଇଁ ବିମୁଖ ହେଲେ ନେତା, କର୍ମୀ ଓ ଆଜିଯାଏ ନିଜ ଧମନୀରେ କଂଗ୍ରେସ ରକ୍ତକୁ ବୁହେଇ ଚାଲିଥିବା ଲକ୍ଷ ଲକ୍ଷ କଟ୍ଟର କଂଗ୍ରେସୀ ଦିଶାହୀନ ଏବଂ ଲକ୍ଷ୍ୟହୀନ।
ତେବେ ନିକଟ ଭବିଷ୍ୟତରେ କଂଗ୍ରେସ ଉଠିବ କେମିତି ? ହଁ, ସମାଧାନ ଅଛି ଓ ଏହାର ଏକମାତ୍ର ବାଟ ଯଦି ଦଳ ନିଜକୁ ରାହୁଲ ଗାନ୍ଧିଙ୍କ ଠାରୁ ସଂପୂର୍ଣ୍ଣ ଦୂରେଇ ରଖିବ  । ବର୍ତ୍ତମାନ ସ୍ଥିତିରେ ଏହା ମାଇନା ରଖୁନି କି ରାହୁଲ ଦଳର ସଭାପତି ଅଛନ୍ତି ବା ନାହାନ୍ତି । ଭାରତୀୟ ଭୋଟରଙ୍କ ଭିତରେ ଏହି ଧାରଣା ଅଛି ବୋଲି ମାନିବାକୁ ପଡ଼ିବ ଯେ, ଯଦି ସେ କଂଗ୍ରେସକୁ ଭୋଟ୍‌ ଦେଉଛନ୍ତି ତେବେ ସେମାନେ ରାହୁଲ ଗାନ୍ଧି ଓ ତାଙ୍କ ତାଙ୍କ ନେତୃତ୍ବକୁ ଚୟନ କରୁଛନ୍ତି । ତେଣୁ ପରିବାରବାଦର ଏ ପରସ୍ତ ବିରୋଧୀ ବିଜେପି ପାଇଁ ପାଲଟିଯାଇଛି ମୁଖ୍ୟ ପ୍ରସଙ୍ଗ ।

ରାହୁଲଙ୍କ ନେତ୍ବତ୍ବରେ ବିରାଟ ବିପର୍ଯ୍ୟୟ ଦେଖିଛି କଂଗ୍ରେସ । ଭୋଟରଙ୍କ ସହ ନା ତାଙ୍କର ଯୋଗାଯୋଗ ଅଛି, ନା ତୃଣମୂଳ ସ୍ତରର ରାଜନୀତି ସହ ସଂଶ୍ଳିଷ୍ଟତା । ଦୃଢ଼ ନିଷ୍ପତ୍ତି ନେବାର ଅପାରଗତା କଂଗ୍ରେସକୁ ବିଭିନ୍ନ ରାଜ୍ୟରେ ବିରୋଧୀ ଆସନରେ ବି ବସାଇପାରିନି । ଏପରିକି ଏଥର ନିର୍ବାଚନରେ ନିଜ ପାରମ୍ପରିକ ଆସନ ଆମେଠିକୁ ବି ହରାଇଛନ୍ତି ଏହି ୪୯ ବର୍ଷିୟ ଯୁବନେତା । ଯାହା ତାଙ୍କ ସମ୍ମାନ ଓ ଗ୍ରହଣୀୟତାକୁ ପଦାରେ ପକାଇଛି । ରାଜନୀତିକ ରୁଆପୋତା ବେଳେ ବିଦେଶରେ ଛୁଟି କାଟିବା, ଦେଶର ପ୍ରଧାନମନ୍ତ୍ରୀଙ୍କୁ ‘ଚୋର’ କହି ସାରାଦେଶରେ କ୍ୟାମ୍ପେନ କରିବାର ଅପରିଣାମଦର୍ଶି ନିଷ୍ପତ୍ତି ରାହୁଲଙ୍କ ପିଲାଳିଆମିର ଅନ୍ୟତନ ଉଦାହରଣ ନୁହେଁ କି ? ଯାହା ପ୍ରଧାନମନ୍ତ୍ରୀଙ୍କ ଶକ୍ତି ବୃଦ୍ଧିର ପ୍ରଧାନ କାରଣ ବୋଲି କୁହାଯାଇପାରେ ।

ତେଣୁ ଏବେ କଂଗ୍ରେସ ଚେତିବା ଦରକାର । ଇସ୍ତଫା ଭଳି ପ୍ରତୀକାତ୍ମକ ଡ୍ରାମା କରି ନିଜକୁ ସର୍ବୋଚ୍ଚ ଚୌକିରୁ ବିରତ ରଖିବା ଅପେକ୍ଷା ରାହୁଲ କଂଗ୍ରେସକୁ ଛାଡ଼ିଦେବା ଉଚିତ୍ ଓ କଂଗ୍ରେସ ମଧ୍ୟ ରାହୁଲଙ୍କ ଛାଡ଼ି ବାହାରେ ରହିବା ଉଚିତ୍ । ଯେ ପର୍ଯ୍ୟନ୍ତ ସେ ଦଳରେ ଥିବେ, କଂଗ୍ରେସ ପଛରେ ଗାନ୍ଧି ପରିବାର ଥିବ ଓ ପରିବାରବାଦର ଟ୍ୟାଗ୍ ଝୁଲୁଥିବ, ଏହା ଦଳ ପାଇଁ କାଳ ହୋଇ ଗୋଡ଼ାଇବ ବୋଲି ବିଶେଷଜ୍ଞଙ୍କ ମତ । ବିନା ରାହୁଲରେ ଦଳ ପୁଣି ଥରେ ନୂଆ ରାଜନୀତିକ ସକାଳରୁ ସଂଗଠନ ଆରମ୍ଭ କରିବା ଉଚିତ୍ । ପରମ୍ପରା ଭାଙ୍ଗି ସଂଗଠନକୁ ମଜଭୂତ କରିବାର ଶକ୍ତ ସୂଚନା ତୃଣମୂଳ ସ୍ତରକୁ ଯିବା ଉଚିତ୍ । ଦଳରେ ଅନେକ ଯୁବ ଚେହେରା ଅଛନ୍ତି ଯେଉଁମାନେ କଂଗ୍ରେସକୁ ଏକ ନୂଆ ଦିଶା ଦେଇପାରିବେ । ଅନେକ ଜ୍ଞାନୀ ନେତ୍ବତ୍ବ ଅଛନ୍ତି ଯେଉଁମାନେ କଂଗ୍ରେସକୁ ଏକ ବିକଳ୍ପ କରି ପୁଣିଥରେ ମୋଦି-ଶାହ ଓ ବିଜେପି ସହ କଡ଼ା ଟକ୍କର ପାଇଁ ପ୍ରସ୍ତୁତ କରିପାରିବେ ଓ ନୂଆ ଭାରତର ସ୍ବପ୍ନ ଦେଖିପାରିବେ । ତାହାଲେ ହୁଏତ ରାଜନୀତିକ କ୍ୟାନସରର ଅନ୍ତ ଦେଖିବା ପୂର୍ବରୁ ଲଢ଼େଇ କରି ପୁଣି ଦେଶରେ ଆସିପାରିବ କଂଗ୍ରେସ । ଆଗକୁ ଯେଉଁ ସବୁ ରାଜ୍ୟର ବିଧାନସଭା ନିର୍ବାଚନ ଅଛି ସେ ପୂର୍ବରୁ କଂଗ୍ରେସ ସଂଜୀବନି ଖୋଜି ପାଇଲେ ହିଁ ଉଠିପାରିବ ଦୁର୍ବଳ ହାତ ଏବଂ ଶସକ୍ତ ହୋଇପାରିବ ଶହେ ବର୍ଷର ଦଳ ।

-ଅବିନାଶ ଷଡ଼ଙ୍ଗୀ 

')}