ଐତିହାସିକ ବାଲିଯାତ୍ରା ପାଇଁ ପ୍ରସ୍ତୁତି ଆରମ୍ଭ

ନଭେମ୍ବର ୧୨ ତାରିଖରୁ ଆରମ୍ଭ ହେଉଛି କଟକର ଐତିହାସିକ ବାଲିଯାତ୍ରା । ମେଳାକୁ ମାସେରୁ ବି କମ ସମୟ ଥିବାବେଳେ ଏବେଠୁ ପ୍ରସ୍ତୁତ ହେଲାଣି ଜିଲ୍ଲା-ପ୍ରଶାସନ । ଆଜି କଟକ ଜିଲ୍ଲାପାଳ ଭବାନୀ ଶଙ୍କର ଚୟନୀଙ୍କ ଅଧ୍ୟକ୍ଷତାରେ ଏ ନେଇ ଏକ ପ୍ରସ୍ତୁତି ବୈଠକ ବସିଥିଲା । ଏହି ବୈଠକରେ ଜିଲ୍ଲା ପ୍ରଶାସନର ଅଧିକାରୀଙ୍କ ସମେତ କଟକ ମହାନଗର ନିଗମର କମିଶନର ଅନନ୍ୟା ଦାଶ ଯୋଗ ଦେଇଥିଲେ । ଚଳିତଥର ବାଲିଯାତ୍ରାକୁ ସରସ ସୁନ୍ଦର କରିବା ପାଇଁ ଲକ୍ଷ୍ୟ ରଖିଛି ମହାନଗର ନିଗମ ଏବଂ ଜିଲ୍ଲା ପ୍ରଶାସନ । ଆଗକୁ କେତେ ପରିମାଣର ଷ୍ଟଲ୍ ଲାଗିବ ଏବଂ ପ୍ଲଟ୍ ବଣ୍ଟନ କିପରି ସୁରୁଖୁରୁରେ ହେବ ସେ ନେଇ ନିଷ୍ପତ୍ତି ଗ୍ରହଣ କରାଯିବ । ତେବେ ବଡ଼ ବଡ଼ ବ୍ୟବସାୟୀଙ୍କୁ ପ୍ଲଟ୍ ଆବଣ୍ଟନ କାମ ଜିଲ୍ଲାପାଳଙ୍କ କାର୍ଯ୍ୟାଳୟରେ ହେବ ଏବଂ କ୍ଷୁଦ୍ର ବ୍ୟବସାୟୀଙ୍କ ପାଇଁ ପ୍ଲଟ୍ ବଣ୍ଟନ ଗଡ଼ଗଡ଼ିଆ ଠାରେ ହେବ ବୋଲି ସ୍ପଷ୍ଟ କରିଛନ୍ତି କଟକ ଜିଲ୍ଲାପାଳ ।

୧୨ ରୁ ୧୯ ତାରିଖ ୮ ଦିନ ଧରି ଚାଲିବ ଏହି ମେଳା । ଚଳିତ ବର୍ଷ ମୋଟ ୪୭ ଏକର ଜାଗାରେ ଲାଗିବ ବାଲିଯାତ୍ରା ।  ତଳ ପଡ଼ିଆର ୩୭ ଏକର ଏବଂ ଉପର ପଡ଼ିଆର ୧୦ ଏକର ଜାଗା ଉପରେ ଲାଗିବ ବାଲିଯାତ୍ରା ମେଳା । ବାଲିଯାତ୍ରା ପଡ଼ିଆକୁ ସଫା କରିବା ପାଇଁ ଗତକାଲି ୩୭ଟି ବୁସ୍ କଟର ଲାଗିଥିବା ବେଳେ ଆଜି ୨୫ଟି ବୁସ୍ କଟର ଲାଗିଥିଲା । ଏଥରର ମେଳାକୁ ପଲିଥିନ ମୁକ୍ତ କରିବା ସହ ପରିମଳ ବ୍ୟବସ୍ଥା ଉପରେ ବିଶେଷ ଧ୍ୟାନ ଦିଆଯିବ । ଠିକ ସେହିପରି ବାସି ଖାଦ୍ୟର ଯାଞ୍ଚ ପାଇଁ ପ୍ରତିବର୍ଷ ଭଳି ଏବର୍ଷ ମଧ୍ୟ ସ୍କ୍ୱାର୍ଡ ଗଠନ କରାଯିବ । ଏଥର ମେଳା ବୁଲି ଆସୁଥିବା ଲୋକଙ୍କ ପାଇଁ ଅସ୍ଥାୟୀ ଟୟଲେଟ ପ୍ରସ୍ତୁତ କରିବା ପାଇଁ ଯୋଜନା କରିଛି ସିଏମସି । ଯାହାର ରକ୍ଷଣାବେକ୍ଷଣ କରିବ ଜନସ୍ୱାସ୍ଥ୍ୟ ବିଭାଗ ବୋଲି କହିଛନ୍ତି କଟକ ମହାନଗର ନିଗମର କମିଶନର । ')}