ସିନ୍ଦେ ଶିବିରରେ ଆଉଜଣେ ମନ୍ତ୍ରୀଙ୍କ ଏଣ୍ଟ୍ରି

ମୁମ୍ବାଇ: ମହାରାଷ୍ଟ୍ରରେ ରାଜନୀତିରେ ଚାଲିଥିବା ସଙ୍କଟ ଥମିବାର ନାଁ ନେଉନାହିଁ  । ଶିବସେନା ଦଳର ଦୁଇ ଗୋଷ୍ଠୀ ଶକ୍ତି ପ୍ରଦର୍ଶନ କରିବା ପଛରେ ଲାଗିଛନ୍ତି  । ଗୋଟିଏ ପଟେ ବିଦ୍ରୋହୀ ବିଧାୟକ ଏକନାଥ ସିନ୍ଦେ ସରକାରରୁ ଅଲଗା ହୋଇ ଦଳକୁ ନିଜ କବଜାକୁ ନେବା ପାଇଁ ଲାଗିଥିବା ବେଳେ ଅନ୍ୟପକ୍ଷରେ ମୁଖ୍ୟମନ୍ତ୍ରୀ ତଥା ଶିବସେନା ଅଧ୍ୟକ୍ଷ ଉଦ୍ଧବ ଠାକରେ ଦଳକୁ ନିଜ ଅକ୍ତିଆରରେ ରଖିବା ଏବଂ ସରକାର ବଞ୍ଚାଇବା ପାଇଁ ଲାଗିଛନ୍ତି  । ଦଳର କିଛି ସଦସ୍ୟ ଏକନାଥଙ୍କୁ ନିଜ ନେତା ମାନୁଥିବା ବେଳେ ଅନ୍ୟ କିଛି ଉଦ୍ଧବଙ୍କୁ ନିଜ ନେତା ମାନୁଛନ୍ତି  ।

କ୍ରମାଗତ ଭାବେ ବିଦ୍ରୋହୀ ଏକନାଥ ସିନ୍ଦେଙ୍କ ଶକ୍ତି ବୃଦ୍ଧି ପାଇବାରେ ଲାଗିଛି  । ମୋଟ ୫୫ ବିଧାୟକଙ୍କ ମଧ୍ୟରୁ ତାଙ୍କ ସମର୍ଥନରେ ୪୦ରୁ ଉର୍ଦ୍ଧ୍ବ ବିଧାୟକ ରହିଛନ୍ତି  । ଉଦ୍ଧବ ସରକାରର ଆଉ ଜଣେ ମନ୍ତ୍ରୀ ଉଦୟ ସାମନ୍ତ ଏକନାଥ ସିନ୍ଦେଙ୍କ ଶିବିରରେ ସାମିଲ ହେବା ପାଇଁ ଗ୍ୱୌହ୍ୱାଟି ଅଭିମୁଖେ ଗସ୍ତ କରିଛନ୍ତି  । ପୂର୍ବରୁ ମହାରାଷ୍ଟ୍ର ସରକାରର ୭ ମନ୍ତ୍ରୀ ଉଦ୍ଧବଙ୍କୁ ଛାଡି ବିଦ୍ରୋହ କରିଥିଲେ  । ତେବେ ସିନ୍ଦେଙ୍କ ବିଦ୍ରୋହ ପଛରେ ବିଜେପି ଥିବା କଥା ଅନୁମାନ କରାଯାଉଥିଲା  । ଆଜି ତାହା ପ୍ରମାଣିତ ହୋଇଯାଇଛି । କାରଣ କେନ୍ଦ୍ର ସରକାରଙ୍କ ପକ୍ଷରୁ ୧୫ ବିଦ୍ରୋହୀ ବିଧାୟକଙ୍କୁ ସିଆରପିଏଫର ୱାଇ ପ୍ଲସ ସୁରକ୍ଷା ଦିଆଯାଇଛି  ।

ଶିବସେନା ମଧ୍ୟ ବିଦ୍ରୋହୀଙ୍କ ଉପରେ କାର୍ଯ୍ୟାନୁଷ୍ଠାନ ନେବା ଆରମ୍ଭ କରିଦେଇଛି  । ବିଧାନସଭା ଡେପୁଟି ସ୍ପିକର ୧୬ ବିଦ୍ରୋହୀ ବିଧାୟକଙ୍କୁ  ଲିଖିତ ଜବାବ ଦେବାକୁ ନିର୍ଦ୍ଦେଶ ଦେଇଥିଲେ ଏବଂ ସଦସ୍ୟତା ରଦ୍ଦ କରିବାକୁ ମଧ୍ୟ ଚେତାବନୀ ଦେଇଥିଲେ  । ଆସନ୍ତାକାଲି ଜବାବ ଦେବାର ଶେଷ ତାରିଖ  । ବର୍ତ୍ତମାନ ସୁଦ୍ଧା ବିଦ୍ରୋହୀ ବିଧାୟକଙ୍କ ପକ୍ଷରୁ କୌଣସି ଜବାବ ମିଳିନାହିଁ  ।