ଆଜି ଉତ୍କଳ ଗୌରବ ମଧୁସୂଦନ ଦାସଙ୍କ ଜୟନ୍ତୀ

କଟକ: ଆଜି ଉତ୍କଳ ଗୌରବ ମଧୁସୂଦନ ଦାସଙ୍କ ଜନ୍ମଜୟନ୍ତୀ । ମଧୁବାବୁଙ୍କ ୧୭୪ତମ ଜନ୍ମଜୟନ୍ତୀ ପାଇଁ ଉତ୍ସବମୁଖର ହୋଇଛି ଜନ୍ମପୀଠ କଟକ ଜିଲ୍ଲାର ସତ୍ୟଭାମାପୁର । ଆଜି ଜୟନ୍ତୀ ଅବସରରେ ମଧୁବାବୁଙ୍କ ସ୍ମୃତି ସମ୍ବଳିତ ଏକ ମ୍ୟୁଜିୟମ ଉଦଘାଟନ ହେବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ମ୍ୟୁଜିୟମକୁ ଉଦଘାଟନ କରିବେ । ସନ୍ଧ୍ୟା ସାଢ଼େ ୫ଟାରେ ଭିଡିଓ କନଫରେନ୍ସିଂରେ ଶୁଭ ଉଦଘାଟନ କରିବେ ମୁଖ୍ୟମନ୍ତ୍ରୀ ।

ଏଥିରେ କଟକ ଜିଲ୍ଲାପାଳ, ବିଧାୟକ ପ୍ରଶାନ୍ତ ବେହେରା, ମନ୍ତ୍ରୀ ପ୍ରତାପ ଜେନା ଯୋଗଦେବାର କାର୍ଯ୍ୟକ୍ରମ ରହିଛି । ସଂଗ୍ରହାଳୟରେ ମଧୁବାବୁଙ୍କ ଜୀବନୀ ସ୍ଥାନ ପାଇବ । ମଧୁବାବୁଙ୍କ ଜନ୍ମ ପୀଠର ଉନ୍ନତୀକରଣ କାମ ରାଜ୍ୟ ସରକାର ହାତକୁ ନେଇଥିବାରୁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ସ୍ଥାନୀୟ ବାସିନ୍ଦା । ମଧୁବାବୁଙ୍କ ଜୟନ୍ତୀ ଅବସରରେ ଗୋରାକବରରେ ଥିବା ତାଙ୍କ ସମାଧୀସ୍ଥଳରେ ବହୁ ରାଜନେତା, ପ୍ରଶାସନିକ ଅଧିକାରୀ ଓ ସାଧାରଣ ଜନତା ପୁଷ୍ପମାଲ୍ଯ ଅର୍ପଣ କରିଛନ୍ତି । ଅନ୍ୟ ପକ୍ଷରେ ତାଙ୍କ ଜନ୍ମ ମାଟି ସତ୍ୟଭାମାପୁରରୁ ଏକ ଶୋଭାଯାତ୍ରା ଶୈଳବାଳା ମହିଳା ମହାବିଦ୍ୟାଳୟକୁ ଆସି ମଧୁବାବୁଙ୍କ ସ୍ମୃତି ଚାରଣ କରିବାର କାର୍ଯ୍ୟକ୍ରମ ରହିଛି ।