ମାନସଙ୍କୁ ମାରିବା ପରେ ଘୁରି ବୁଲୁଥିଲେ ଶର୍ମିଷ୍ଠା, ମିଛ କହି ଶାଶୂଘରେ ଥିଲେ ୨ ଦିନ
ଯାଜପୁର: କ୍ୟାମେରାମ୍ୟାନ ମାନସ ସ୍ୱାଇଁ ହତ୍ୟା ମାମଲା । ମୁଖ୍ୟ ଅଭିଯୁକ୍ତ ଶର୍ମିଷ୍ଠାଙ୍କୁ ଖୋଜୁଛି ପୋଲିସ । ଶର୍ମିଷ୍ଠା ଫେରାର୍ ଥିବାବେଳେ ଦିନ ଗଡ଼ିବା ସହ ଦିନକୁ ଦିନ ସାମ୍ନାକୁ ଆସୁଛି ନୂଆ ନୂଆ ତଥ୍ୟ । ମୁଖ୍ୟ ଅଭିଯୁକ୍ତ ଶର୍ମିଷ୍ଠା ରାଉତ ଓ ତାଙ୍କ ସହଯୋଗୀ ଝୁନା ଭୋଇ ଯାଜପୁର ଜିଲ୍ଲା କାଳିଆପାଣି ଅଞ୍ଚଳରେ ୩ ଦିନ ଲୁଚି ରହିଥିଲେ । ଶର୍ମିଷ୍ଠା ତାଙ୍କ ଶାଶୂ ଓ ବଡ଼ ଯାଆ ରହୁଥିବା ଘରେ ଲୁଚି ରହିଥିଲେ ।
ଏନେଇ ଖବର ଜଣାପଡ଼ିବା ପରେ ଶର୍ମିଷ୍ଠାଙ୍କ ଶାଶୂଙ୍କୁ ତଦନ୍ତକାରୀ ଟିମ୍ ପଚରାଉଚରା କରି ଫେରିଥିବା ଜଣାପଡ଼ିଛି । ଗତ ୭ ତାରିଖ ବିଳମ୍ବିତ ରାତିରେ ଯାଜପୁର ଜିଲ୍ଲା କାଳିଆପାଣି ଥାନା ଅନ୍ତର୍ଗତ କୋଳିପସି ଗାଁରେ ତାଙ୍କ ଶାଶୂ ଓ ଯାଆ ରହୁଥିବା ଘରେ ପହଞ୍ଚିଥିଲେ । ଶାଶୂଙ୍କୁ ମିଛ କହି ସେଠାରେ ୨ ଦିନ ରହିଥିଲା । ପରେ ୧୦ ତାରିଖ ସକାଳେ ସେଠାରୁ ସେ ଚାଲି ଯାଇଥିଲେ ।
ଶର୍ମିଷ୍ଠା ସେଠାରେ ରହିବା କଥା ଜଣାପଡ଼ିବା ପରେ ଗତ ୧୯ ତାରିଖ ଦିନ ତଦନ୍ତକାରୀ ଅଧିକାରୀ କାଳିଆପାଣିରେ ପହଞ୍ଚି ଶର୍ମିଷ୍ଠାଙ୍କ ଶାଶୂଙ୍କୁ ପଚରାଉଚରା କରିଛନ୍ତି । ଶର୍ମିଷ୍ଠାଙ୍କ ଶାଶୂ କହିଛନ୍ତି ବୋହୂ ମାନସିକ ନିର୍ଯାତନା ଦେଉଥିଲା । ଯେଉଁଥିପାଇଁ ୨୦୧୮ ମସିହାରୁ ଶାଶୂଘର ସହିତ ଶର୍ମିଷ୍ଠାଙ୍କ କୌଣସି ସମ୍ପର୍କ ନାହିଁ ।
