୧୫ ଜାନୁଆରୀ ପର୍ଯ୍ୟନ୍ତ ରାଲି, ରୋଡ ଶୋ’ ଉପରେ ଲାଗିଲା ରୋକ

ନୂଆଦିଲ୍ଲୀ: ଦେଶର ପାଞ୍ଚ ରାଜ୍ୟ ଉତ୍ତରପ୍ରଦେଶ, ପଞ୍ଜାବ, ଉତ୍ତରାଖଣ୍ଡ, ମଣିପୁର ଓ ଗୋଆରେ ବିଧାନସଭା ନିର୍ବାଚନ ପାଇଁ ଆଜି ତାରିଖ ଘୋଷଣା ହୋଇଛି । ଏହି ପାଞ୍ଚ ରାଜ୍ୟରେ ୭ଟି ପର୍ଯ୍ୟାୟରେ ବିଧାନସଭା ନିର୍ବାଚନ ହେବ ବୋଲି ମୁଖ୍ୟ ନିର୍ବାଚନ କମିଶନ ସୁଶୀଲ ଚନ୍ଦ୍ରା କହିଛନ୍ତି । ତେବେ ଦେଶରେ କରୋନା ସଂକ୍ରମଣକୁ ଦୃଷ୍ଟିରେ ରଖି ଆସନ୍ତା ଜାନୁଆରୀ ୧୫ ପର୍ଯ୍ୟନ୍ତ ସମସ୍ତ ଜନ ସମାବେଶ, ରୋଡ ଶୋ’, ସାଇକେଲ ରାଲି, ବାଇକ ରାଲି ଓ ପଦଯାତ୍ରା ଉପରେ ରୋକ ଲଗାଇଛନ୍ତି ନିର୍ବାଚନ କମିଶନ । ମୁଖ୍ୟ ନିର୍ବାଚନ କମିଶନର ସୁଶୀଲ ଚନ୍ଦ୍ର ଶନିବାର ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଜାନୁଆରୀ ୧୫ ପରେ ପରିସ୍ଥିତିକୁ ଅନୁଧ୍ୟାନ ପରେ ପରବର୍ତ୍ତୀ ନିଷ୍ପତ୍ତି ନିଆଯିବ ।

ଶନିବାର ମୁଖ୍ୟ ନିର୍ବାଚନ ଆୟୋଗ କରିଥିବା ସାମ୍ବାଦିକ ସମ୍ମିଳନୀରେ କହିଥିଲେ କି କୌଣସି ବି ରାଜନୈତିକ ଦଳ କିମ୍ବା ପ୍ରାର୍ଥୀଙ୍କୁ ରାଲି, ରୋଡ ଶୋ’, ପଦଯାତ୍ରା କରିବାକୁ ଅନୁମତି ପ୍ରଦାନ କରାଯିବ ନାହିଁ । ସେହିପରି ରାତି ୮ରୁ ସକାଳ ୮ ପର୍ଯ୍ୟନ୍ତ କୌଣସି ରାଜନୈତିକ ସଭା ହୋଇପାରିବ ନାହିଁ । କେବଳ ଡୋର ଟୁ ଡୋର କ୍ୟାମ୍ପେନିଂ କରିବା ପାଇଁ ୫ ଜଣ ଲୋକଙ୍କୁ ଅନୁମତି ମିଳିବ । ସେ ଆହୁରି କହିଛନ୍ତି କି ଆମେ ସମସ୍ତ ରାଜନୈତିକ ପାର୍ଟିକୁ ଅନୁରୋଧ କରୁଛୁ କି ସେମାନେ ଡିଜିଟାଲ ମାଧ୍ୟମରେ ନିର୍ବାଚନୀ ପ୍ରଚାର କରନ୍ତୁ । ଏହାସହ ନିର୍ବାଚନରେ ବିଜୟୀ ପ୍ରାର୍ଥୀ କୌଣସି ପ୍ରକାର ରାଲିର ମଧ୍ୟ ଆୟୋଜନ କରିପାରିବେ ନାହିଁ । ଅନ୍ୟପକ୍ଷରେ କରୋନାକୁ ଦୃଷ୍ଟିରେ ରଖି ମତଦାନ କେନ୍ଦ୍ରରେ ସାନିଟାଇଜର ଏବଂ ମାସ୍କର ବ୍ୟବସ୍ଥା ହେବ ଏବଂ କରୋନା କାରଣରୁ ଅଧିକ ମତଦାନ କେନ୍ଦ୍ର କରାଯିବ ବୋଲି କହିଛନ୍ତି ମୁଖ୍ୟ ନିର୍ବାଚନ କମିଶନର ସୁଶୀଲ ଚନ୍ଦ୍ରା ।