ବିବାଦୀୟ ବର୍ଷ୨୧: ସରକାର ଆଣିଥିଲେ କୃଷି ଆଇନ୍, ଫେରାଇଦେଲେ ଚାଷୀ
ନନ୍ଦିଘୋଷ ବ୍ୟୁରୋ: ରାଜନୀତିରେ ବିବାଦ ଓ ବିତର୍କର ପ୍ରାସଙ୍ଗିକତା ସର୍ବଦା ରହିଛି । ଜନତା ଏ ଦେଶର ମୂଳ ପିଣ୍ଢ । ରାଜନୀତି ସାମ୍ବିଧାନିକ ବ୍ୟବସ୍ଥାର ଏକ ଢାଞ୍ଚା । ଯେଉଁ ଢାଞ୍ଚାକୁ ସାଧାରଣ ଜନତା ଗଢନ୍ତି ଏବଂ ନେତୃତ୍ୱ ନିଜେ ଚୟନ କରିଥାନ୍ତି । ପ୍ରଧାନମନ୍ତ୍ରୀ ବାଛିବା ପର୍ଯ୍ୟନ୍ତ ମଧ୍ୟ ସାଧାରଣ ଜନତା ହିଁ ନିର୍ଣ୍ଣୟ କରେ । ଏହା ହିଁ ଭାରତୀୟ ବ୍ୟବସ୍ଥାର ସୁନ୍ଦରତା । ସାଧାରଣ ଜନତାକୁ ଅଖଣ୍ଡ ଅଧିକାର ପ୍ରଦାନ କରାଯାଇଥାଏ । ଶାସକ କିମ୍ବା ବିରୋଧି ସଭିଙ୍କୁ ପ୍ରଶ୍ନ ପଚାରିବାର ସ୍ୱୀକୃତି ସଭିଙ୍କ ପାଖେ ରହିଛି । ଉତ୍ତରଦାୟୀ ସରକାର ବିଭିନ୍ନ ସମୟରେ ପୁରାତନ ବ୍ୟବସ୍ଥାକୁ ପରିବର୍ତ୍ତନ କରିଥାଏ । କିନ୍ତୁ ଯଦି ଏହା ଜନବିରୋଧି ହୋଇଥାଏ । ଅର୍ଥାତ ଜନତା ଯଦି ଏଭଳି କିଛି ପ୍ରସ୍ତାବ କିମ୍ବା ଆଇନକୁ ଗ୍ରହଣ କରିନଥାଏ, ତେବେ ତାହାକୁ ପୁନର୍ବାର ପରଖିବାର ଦାୟିତ୍ୱ ସରକାର ଉପରେ ନ୍ୟସ୍ତ ଥାଏ । ଏଭଳି ମଧ୍ୟ ସମୟ ଉପନୀତ ହୋଇଥାଏ ଯେ, ସରକାର ଆଇନକୁ ପ୍ରତ୍ୟାବର୍ତ୍ତନ କରିବାକୁ ବାଧ୍ୟ ହୋଇଥାଏ ।
ଆପଣ ସଠିକ ଅନୁମାନ କରିଥିବେ ନିଶ୍ଚୟେ । ଆମେ ସେହି ‘ନୂତନ କୃଷି ଆଇନ’କୁ ପରଖିବାକୁ ଚାହୁଁଛୁ । ୨୦୧୪ ମେ ୨୬ ତାରିଖ । ଦୀର୍ଘ ଦଶନ୍ଧିର ସଂଗ୍ରାମ ପରେ ଶାସନ ଗାଦିକୁ ଫେରିଥିଲା ଭାରତୀୟ ଜନତା ପାର୍ଟି (ବିଜେପି) । ଦଳର ବରିଷ୍ଠ ନେତା ନରେନ୍ଦ୍ର ଦାମୋଦର ଦାସ ମୋଦି ହୋଇଥିଲେ ଦେଶର ୧୫ତମ ପ୍ରଧାନମନ୍ତ୍ରୀ । ନୂଆ ଭାରତ ନିର୍ମାଣ କରିବାର ଆହ୍ୱାନ ନେଇ ସତ୍ତାସୀନ ହୁଅନ୍ତି ମୋଦି । ଅନେକ ରାଜନୈତିକ ମାଷ୍ଟରଷ୍ଟ୍ରୋକ ଖେଳି ପୁଣି ଥରେ ଦ୍ୱିତୀୟ ପାଳିରେ ସତ୍ତାକୁ ଆସେ ବିଜେପି । ଅନେକ ବିବାଦୀୟ ଆଇନ ଏବଂ ରାଜନୈତିକ ରଣନୀତି ଭିତରେ ଗତି କରେ ବର୍ଷ ୨୦୨୦୨ । ଶେଷ ଆଡ଼କୁ କିନ୍ତୁ ବିବାଦୀୟ ହୋଇପଡ଼େ ଶାସନରେ ଥିବା ଏନଡ଼ିଏ । ସରକାର ସଂସଦରେ ଆଣେ ନୂତନ କୃଷି ଆଇନ୍ ।
ବିଲକୁ ପୂର୍ବରୁ ଯେତିକି ବିରୋଧ କରାଯାଇଥିଲା ଗୃହରେ ମଧ୍ୟ ସେତିକି । କିନ୍ତୁ ସରକାରଙ୍କ ଏକ ଜିଦ ଏହା ଆଇନରେ ପରିଣତ ହେବ । ଶେଷରେ ହଟଗୋଳ ନାରାବାଜୀ, ଆନ୍ଦୋଳନ ଓ ହରତାଳ ପରେ ମଧ୍ୟ କେନ୍ଦ୍ର ସରକାର ଉଭୟ ଲୋକସଭା ଓ ରାଜ୍ୟ ସଭାରେ ପାରିତ କରାଇନେଇଥିଲେ । ୨୦୨୦ ସେପ୍ଟେମ୍ବର ୧୭ ତାରିଖରେ ଲୋକସଭାରେ ପାରିତ କରିଥିବାବେଳେ ୨୦ ସେପ୍ଟେମ୍ବରରେ ରାଜ୍ୟ ସଭାରେ ପାରିତ କରାଯାଏ । ଏହାପରେ ରାଷ୍ଟ୍ରପତି ରାମନାଥ କୋବିନ୍ଦ ସେପ୍ଟେମ୍ବର ୨୭ ତାରିଖରେ ଏହି କୃଷି ବିଲକୁ ଆଇନରେ ପରିଣତ କରନ୍ତି
କଣ ଏହି କୃଷି ଆଇନ୍ ?
ଆର୍ଥିକ ପ୍ରତିଶ୍ରୁତି, କୃଷକ ସଶକ୍ତିକରଣ ଓ ନିରାତ୍ତା ଏବଂ କୃଷି ସେବା ଲାଗି କୃଷି ଆଇନ 2020 । ଚାଷ ଓ ଚାଷୀର ଆର୍ଥିକ ମାନଦଣ୍ଡକୁ ମଜଭୁତ କରିବା ଏହାର ପ୍ରମୁଖ୍ୟ ଉଦ୍ଦେଶ୍ୟ ବୋଲି ଉଲ୍ଲେଖ କରିଥିଲେ ପ୍ରଧାନମନ୍ତ୍ରୀ ଅତ୍ୟାବଶ୍ୟକ ସାମଗ୍ରୀ ସଂଶୋଧନ ଆଇନ 2020 ଅଦ୍ୟାବଧି ସବୁଠାରୁ ବଡ କୃଷିଗତ ସଂସ୍କାରର ମାନ୍ୟତାଥିବା କେନ୍ଦ୍ର ଦାବି ଦାବି କରିଥିଲା । ଏହି ଆଇନ ଦ୍ୱାରା ଚାଷୀମାନଙ୍କୁ ବଜାରରେ ସ୍ୱାଧିନତା ପ୍ରାପ୍ତି ହେବ । ସଂସ୍କାର ଯୋଗୁଁ ଔଦ୍ୟୋଗିକତା ପାଇଁ ପ୍ରୋତ୍ସାହନ ମିଳିବ । ନିଜେ ଉତ୍ପାଦନ କରିଥିବା ସାମଗ୍ରୀକୁ ମୁକ୍ତ ବଜାରରେ ଚଢା ଦରରେ ବିକ୍ରୟ କରିପାରିବେ । ଯଦ୍ୱାରା ଏଠି ଦଲାଲ ଲାଭାନ୍ୱିତ ହେବା ନାହିଁ ନାହିଁ । ଚାଷୀ ନିଜ ପରିଶ୍ରମର ଉଚିତ ହକ୍ ପାଇଁ ଏହି ଆଇନ ଉଦ୍ଧିଷ୍ଟ ବୋଲି କୁହାଯାଇଥିଲା । ଏହା ସହିତ ବୈଷୟିକ ଜ୍ଞାନର ଉପଯୋଗ କରି କୃଷି କ୍ଷେତ୍ରରେ ମଧ୍ୟ ପରିବର୍ତ୍ତନ ଆଣିପାରିବା ନେଇ ଦୃଢୋକ୍ତି ପ୍ରକାଶ କରିଥିଲେ ସରକାର । ଦେଶ ପାଇଁ ଏହା ଏକ ବୈପ୍ଲବିକ ଆଇନ ବୋଲି ଉଲ୍ଲେଖ କରିଥିଲେ ପ୍ରଧାନମନ୍ତ୍ରୀ । କେନ୍ଦ୍ର ସରକାର ଏମଏସପି ଏବଂ ଉତ୍ପାଦ ସଂଗ୍ରହ ଉପରେ ପ୍ରତିଶ୍ରୁତି ଦେବା ପାଇଁ ରାଜି ଥିବା କହିଥିଲେ ନେତା ।ଏପିଏମସି ଏବଂ ତା ବାହାରେ ସରକାର ନେଣଦେଣ କାରବାର ନେଇ ସ୍ଵଛତା ରକ୍ଷା କରିବେ । କୌଣସି ବିବାଦ ଉପୁଜିଲେ ଚାଷୀମାନେ ଚାହିଁଲେ ଏସଡିଏମ ଅଦାଲତ ବ୍ୟତୀତ ଦେବାନୀ ଅଦାଲତର ମଧ୍ୟ ଆଶ୍ରୟ ନେଇପାରିବେ । ଛଣ ବା ନଡା ଜଳାଇବା ପାଇଁ ଜରିମାନା ଓ ପ୍ରସ୍ତାବିତ ବିଦ୍ୟୁତ ସଂଶୋଧିତ ବିଲ ଉପରେ ସରକାର ସଚେତନ ଅଛନ୍ତି । ନୂତନ କୃଷି ଆଇନରେ ଚାଷୀମାନଙ୍କ ଜମି ଜମା ସୁରକ୍ଷିତ ରହିବା ନେଇ ପ୍ରତିଶ୍ରୁତି ଦେଇଥିଲେ ।
କୃଷି କ୍ଷେତ୍ରକୁ ମଜବୁତ କରିବା ତଥା କୃଷକମାନଙ୍କ ବିକାଶ କରିବା ପାଇଁ ମୋଦୀ ସରକାର ବିଭିନ୍ନ ପଦକ୍ଷେପ ନେଇଥିବା ମନ୍ତ୍ରୀ ନରେନ୍ଦ୍ରସିଂ ତୋମାର ଓ ପିଉଷ ଗୋୟଲ ପ୍ରକାଶ କରିଥିଲେ । ସେମାନେକହିଛନ୍ତି ଯେ, ଅଂଶୀଦାରମାନଙ୍କ ସହ ଅନେକ ଆଲୋଚନା ପରେ ଏହି ସଂସ୍କାର ଅଣାଯାଇଛି ଏଥିରେ କୃଷକମାନଙ୍କୁ ସେମାନଙ୍କ ଉତ୍ପାଦିତ ସାମଗ୍ରୀ ଯେକୌଣସି ସ୍ଥାନରେ ବିକ୍ରୟ କରିବା ପାଇଁ ସ୍ଵାଧୀନତା ଦିଆଯିବା ସହ ଘରୋଇ କମ୍ପାନୀଗୁଡ଼ିକ ସହିତ ବ୍ୟବସାୟିକ ବୁଝାମଣା ବେଳେ ଆଇନଗତ ସୁରକ୍ଷା ଦିଆଯିବା ପାଇଁ ବ୍ୟବସ୍ଥା ହୋଇଛି । କେନ୍ଦ୍ର ସରକାର ଯେତେବେଳେ କୌଣସି ଆଇନ ପ୍ରଣୟନ କରନ୍ତି, ତାହା ସମଗ୍ର ଦେଶ ପାଇଁ ଲାଗୁ ହୋଇଥାଏ । କୃଷି ବିପଣନ କ୍ଷେତ୍ରରେ ଯେକୌଣସି ଆଇନ କଲାବେଳେ କେନ୍ଦ୍ର ସରକାର ତାହା ସାମ୍ବିଧାନିକ ପ୍ରକ୍ରିୟା ମଧ୍ୟରେ ହିଁ କରିଥାନ୍ତି । 2014 ରୁ 2020 ମଧ୍ୟରେ କୃଷି କ୍ଷେତ୍ରରେ ବଜେଟରେ ପର୍ଯ୍ୟାପ୍ତ ଅର୍ଥ ବ୍ୟବସ୍ଥା ହୋଇଛି ଏବଂ ଏହା କୃଷି ଓ ଗ୍ରାମାଞ୍ଚଳ କ୍ଷେତ୍ର ପ୍ରତି ସରକାରଙ୍କ ଅଙ୍ଗୀକାରବଦ୍ଧତାର ସୂଚନା ଦେଇଥାଏ । ପିଏମ କିଷାନ ବାବଦକୁ 75 ହଜାର କୋଟି ଟଙ୍କାର ବ୍ୟୟ ବରାଦକରାଯାଇଛି, ଯାହାଫଳରେ କୃଷକମାନେ 6 ହଜାର ଟଙ୍କାର ପ୍ରତ୍ୟକ୍ଷ ଆୟ ସହାୟତା ପାଉଛନ୍ତି । କୃଷି ଭିତ୍ତିଭୂମିର ବିକାଶ ନିମନ୍ତେ 1 ଲକ୍ଷ କୋଟି ଟଙ୍କାର ବ୍ୟୟ ବରାଦ କରାଯାଇଛି ।
ମୋଦି ସରକାରଙ୍କ ଦ୍ଵାରା ରାସାୟନିକ ସାରର ପ୍ରୟୋଗ ହ୍ରାସ କରି ଜମିର ଉର୍ବରତା ବୃଦ୍ଧି ପାଇଁ ନିମ ପ୍ରଲେପଯୁକ୍ତ ୟୁରିଆ ଯୋଜନା ପ୍ରବର୍ତ୍ତନ କରାଯାଇଛି । ସ୍ଵାମୀନାଥନ କମିଟି ଆୟୋଗର ସୁପାରିଶ ଅନୁସାରେ ନ୍ୟୁନତମ ସହାୟକ ମୂଲ୍ୟ ମୋଦି ସରକାର ଘୋଷଣା କରିଛନ୍ତି । ଏହାଫଳରେ କୃଷକମାନେ ନିଶ୍ଚିତ ଭାବରେ ଅନ୍ତତଃ ତାଙ୍କର ଉତ୍ପାଦିତ ଖର୍ଚ୍ଚଠାରୁ ଦେଢଗୁଣ ଅଧିକ ଲାଭ ପାଇପାରିବେ । ପ୍ରଧାନମନ୍ତ୍ରୀ କିଷାନ ମନ ଧନ ଅଧୀନରେ କୃଷକମାନେ ପେନସନ ସହାୟତା ମଧ୍ୟ ପାଉଛନ୍ତି ।କୃଷକ ଉତ୍ପାଦକ ସଂଗଠନ କୃଷକମାନଙ୍କୁ ସେମାନଙ୍କ ଭବିଷ୍ୟତ ସମ୍ପର୍କରେ ସଚେତନ କରାଉଛନ୍ତି ଏବଂ ଏହିପରି 10 ହଜାର ସଂଗଠନ ସୃଷ୍ଟି କରାଯାଇଛି ।
ଜଳିଥିଲା ପ୍ରତିବାଦ ଅଗ୍ନି..
ସିଙ୍ଘୁରୁ ଟିକ୍ରି ସବୁଠି ଜଳିଥିଲା ପ୍ରତିବାଦର ନିଆଁ । ୯ ଅଗଷ୍ଟ ୨୦୨୦ ମସିହା । ଏହି ନିଆଁର ସୂତ୍ରପାତ ହୋଇଥିଲା ଦିଲ୍ଲୀରେ । ପରେ ଏହା ଏତେ ଭୟଭହତା ହୋଇଥିଲା ଯେ, ଭାରତର ସମସ୍ତ କୃଷିଙ୍କ ଘରେ ଧୁଆଁ କୁହୁଳିଥିଲା । ନୂତନ କୃଷି ଚାଷୀର ହିତରେ ନୁହେଁ ବଂର ବିରୋଧରେ ବୋଲି ସ୍ଲୋଗାନ ଦେଇଥିଲେ ଚାଷୀ ନେତା । ସଂଯୁକ୍ତ କିଷାନ ମୋର୍ଚ୍ଚା ଠାରୁ ଆରମ୍ଭ କରି ନବ ନିର୍ମାଣ କୃଷକ ସଂଗଠନ କେନ୍ଦ୍ର ସରକାର ବିରୋଧରେ ରାସ୍ତାକୁ ଓହ୍ଲାଇଥିଲେ । ଏହାର ବିରୋଧରେ ଏକାଠି ହୋଇଥିଲେ ଦେଶର ହଜାର ହଜାର କୃଷକ । ସର୍ବାଧିକ କୃଷି ପ୍ରଧାନ ରାଜ୍ୟ ପଞ୍ଜାବ, ହରିୟାଣା ଓ ଉତ୍ତରପ୍ରଦେଶ ଭଳି ରାଜ୍ୟରେ ଜୋରଦାର ବିରୋଧ ହୋଇଥିଲା । ସିଙ୍ଘୁ ସୀମାରେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବସିବାର ନିର୍ଣ୍ଣୟ ନେଲେ କୃଷକ ସଂଗଠନ । ହାଡ଼ଭଙ୍ଗା ଶୀତ, ଟାଣ ଖରା ଓ ପ୍ରବଳ ବର୍ଷା ସ୍ୱତେ କୃଷି ଆଇନ ନହଟିବା ପର୍ଯ୍ୟନ୍ତ ଉଠିବାର ପ୍ରଶ୍ନ ଉଠୁନାହିଁ ବୋଲି ଆହ୍ୱାନ ଦେଲେ ଚାଷୀ ନେତା । ଉତ୍ତରପ୍ରଦେଶର ଚାଷୀ ନେତା ରାକେଶ ଟିକାୟତଙ୍କ ନେତୃତ୍ୱରେ ଜାରି ରହିଲା ଏହି କୃଷକ ସଂଗ୍ରାମ ।
ଲାଲକିଲ୍ଲାରେ ରକ୍ତ ଛିଟା
ଜାନୁୟାରୀ ୨୬ ତାରିଖ । ରାଷ୍ଟ୍ରପତି ରାଜଧାନୀ ଦିଲ୍ଲୀର ଲାଲକିଲ୍ଲା ଦୁର୍ଗଠାରେ ଜାତୀୟ ପତ୍ତାକା ଉତ୍ତୋଳନ କରି ଫେରଯାଇଥାନ୍ତି । ଦେଶ ଗଣତନ୍ତ୍ର ଦିବସର ଖୁସି ମନାଉଥାଏ । ଚାରିଆଡ଼େ କଡ଼ା ସୁରକ୍ଷା ବଳୟ । ବ୍ୟାରିକେଡ଼ରେ ଆଛାଦିତ ଲାଲକିଲ୍ଲା । କାରଣ ଲାଲକିଲ୍ଲା ଚାଲ ଡକରା ଦେଇଥାଏ କୃଷକ ସଂଗଠନ । ପ୍ରାୟ ୭ ହଜାର ଟ୍ରାକ୍ଟର ଓ ଲକ୍ଷାଧିକ ଚାଷୀ ସମାଗମରେ ସାମିଲ ହୋଇଥିଲେ । ସେପଟେ ଟ୍ରାକ୍ଟର ଧରି ସିଙ୍ଘୁ ବର୍ଡର ପଟୁ ମାଡ଼ି ଆସୁଥାନ୍ତି ଚାଷୀ । ବ୍ୟାରିକେଡ଼ ଉପରେ ଗାଡ଼ି ଚଢାଇ ଲାଲ୍ଲକିଲ୍ଲାରେ ପ୍ରବେଶ କରନ୍ତି । ବ୍ୟାପକ ଭଙ୍ଗାରୁଜା ଓ ଠେଲାପେଲା ଭିତରେ ଆହତ ହୁଅନ୍ତି ନିୟୋଜିତ ସୁରକ୍ଷାକର୍ମୀ । ବିଜୟ ଦୁର୍ଗ ଲାଲ କିଲ୍ଲାରେ ପଡ଼େ ରକ୍ତ ଛିଟା । ଯାହା ଇତିହାସରେ ଲଗାଏ ଏକ ଦାଗ । ତେବେ ଏଭଳି ବଡ଼ ଘଟଣା ଦେଶକୁ ସ୍ତମ୍ଭୀଭୁତ କରିଦେଇଥିଲା । ମାମଲାରେ ସଂଶ୍ଲିଷ୍ଟ ଅନେକ ନେତା ଗିରଫ ହୋଇଥିଲେ । କିନ୍ତୁ କେମିତି ପୂର୍ବ ସୂଚନା ସ୍ୱତେ ଚାଷୀ ସଂଗଠନ ଲାଲ କିଲ୍ଲା ଭିତରକୁ ପ୍ରବେଶ କଲେ ଓ ନିୟୋଜିତ ସୁରକ୍ଷାକର୍ମୀଙ୍କ ଭୂମିକାକୁ ନେଇ ମଧ୍ୟ ପ୍ରଶ୍ନ ଉଠିଥିଲା ।
୧୩ଥର ବିଫଳ ବୈଠକ
ନୂତନ କୃଷି ଆଇନୃ ପ୍ରସଙ୍ଗକୁ ନେଇ ବାରମ୍ବାର ବୁଝାଇବାକୁ ପ୍ରୟାସ କରିଥିଲେ କେନ୍ଦ୍ର ସରକାର । ଆନ୍ଦୋଳନରତ ଚାଷୀଙ୍କୁ ବିଜ୍ଞାନ ଭବନ ଡ଼କାଇ ପ୍ରାୟ ୧୩ ଥର ଆଲୋଚନା କତରିଛନ୍ତି କେନ୍ଦ୍ର କୃଷି ମନ୍ତ୍ରୀ ଓ ସରକାର । କିନ୍ତୁ ଚାଷୀ ଆଇନ ପ୍ରତ୍ୟାହୃତ ନେଇ ଅଡ଼ି ବସିଥିବା କୃଷକ ନେତା ବୈଠକକୁ ପ୍ରତ୍ୟାଖାନ କରିଥିଲେ । ସେପଟେ ମାମଲା ସୁପ୍ରିମକୋର୍ଟରେ ପହଁଚିଥିଲା । ଏହି ଆଇନକୁ ନେଇ କେନ୍ଦ୍ର ସରକାରଙ୍କ ଉପରେ ଅସନ୍ତୋଷ ପ୍ରକାଶ କରିଥିଲେ ନ୍ୟାୟାଳୟ ।
ନିଆଁ ଲଗାଇଲା ଲଖୀମପୁର ମୃତ୍ୟୁ
ପ୍ରାୟ ମାସାଧିକ ଏହି ଆନ୍ଦୋଳନକୁ ଆହୁରି ବଢାଇଦେଇଥିଲା କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀଙ୍କ ପୁଅ । ସ୍ୱରାଷ୍ଟ୍ର ମନ୍ତ୍ରୀ ଅଜୟ ମିଶ୍ର ଟେନିଙ୍କ ପୁଅ ଆଶିଷ ମିଶ୍ର ଉତ୍ତରପ୍ରଦେଶ ଲଖିମପୁର ଖେରୀ ଠାରେ ଆନ୍ଦୋଳନରତ ଚାଷୀଙ୍କ ଉପରେ ଗାଡ଼ି ଚଢାଇଦେଇଥିଲେ । ଫଳରେ ୪ ଜଣ ଚାଷୀଙ୍କ ସମେତ ମୋଟ ୮ ଜଣଙ୍କ ମୃତ୍ୟୁ ଘଟିଥିଲା । ଏହି ଘଟଣା ସମଗ୍ର ଦେଶରେ ବ୍ୟାପିଯାଇଥିଲା । ଏହା ସୁଚିନ୍ତିତ ଷଡ଼ଯନ୍ତ୍ର ବୋଲି ଦାବି କରିଥିଲେ ଚାଷୀ ସଂଗଠନ । ବ୍ୟାକଫୁଟକୁ ଚାଲି ଆସିଥିଲା ବିଜେପି ସରକାର । ଗୋଟେପଟେ ଉତ୍ତରପ୍ରଦେଶ ବିଧାନସଭା ନିର୍ବାଚନ ଥିବାବେଳେ ଅନ୍ୟପଟେ ଆନ୍ଦୋଳନରୁ ଓହରିନଥିଲେ ଚାଷୀ । ସେପଟେ ଏହାକୁ ନେଇ ପ୍ରତିବାଦ ଆହୁରି ତୀବ୍ର ହୋଇଥିଲା । ପ୍ରାୟ ୬ଶହ ଚାଷୀ ଦେଶବ୍ୟାପୀ ମୃତ୍ୟୁ ବରଣ କରିଥିବା ନେଇ ଦାବି କରିଛନ୍ତି ଚାଷୀ ସଂଗଠନ ।
ମୁଣ୍ଡ ନୁଆଁଇଲେ ସରକାର
ଆନ୍ଦୋଳନ, ପ୍ରତିବାଦ, ହରକତ ଓ ରକ୍ତପାତ ପରେ ପଛଘୁଞ୍ଚା ଦେଲେ ନାହିଁ ଚାଷୀ । ଶେଷରେ ପଛକୁ ହଟିଲେ ସରକାର । ନଭେମ୍ବର ୧୯ ଗୁରୁ ସାହେବ ପରବରେ କୃଷି ଆଇନ ପ୍ରତ୍ୟାହାର କରିବାକୁ ଘୋଷଣା କଲେ ପ୍ରଧାନମନ୍ତ୍ରୀ । ଦେଶବାସୀଙ୍କୁ ସମ୍ବୋଧନ କରି କୃଷି ଆଇନ ପ୍ରତ୍ୟାହାର ନେଇ ଘୋଷଣା କଲେ । ୫ଜଣିଆ କୃଷକ ପ୍ୟାନେଲ କେନ୍ଦ୍ର ସହ ଆଲୋଚନା କରିଥିଲେ । ଶୀତକାଳୀନ ଅଧିବେଶନରେ କେନ୍ଦ୍ର ସରକାର ଉଭୟ ଗୃହରୁ ଚାଷୀ ଆଇନକୁ ପ୍ରତ୍ୟାହୃତ କରିନେଲେ । ପରେ ଚାଷୀ ସଂଗଠନ ଡିସେମ୍ବର ୧୧ରେ ଘରକୁ ଫେରିଥିଲେ ।
