ମହାମାରୀ ପାଇଁ ଆସିଲା ମହୌଷଧୀ, ଫାଇଜର ପ୍ରସ୍ତୁତ କଲା ପ୍ରଥମ କୋଭିଡ ବଟିକା

ଓ୍ୱାଶିଂଟନ: ଆମେରିକା ଫାର୍ମା କମ୍ପାନୀ ଫାଇଜର ଦ୍ୱାରା ପ୍ରସ୍ତୁତ ହୋଇଛି ପ୍ରଥମ କୋଭିଡ ବଟିକା ‘ପାକ୍ସଲୋଭିଡ୍’ । କରୋନା ମହାମାରୀରୁ ସୁରକ୍ଷା ଦେବ ଏହି ଆଣ୍ଟି ଭାଇରାଲ ଟାବଲେଟ । ଫାର୍ମା କମ୍ପାନୀ ଫାଇଜର ପ୍ରସ୍ତୁତ କରିଥିବା ଆଣ୍ଟି ଭାଇରାଲ କରୋନା ବଟିକା ‘ପାକ୍ସଲୋଭିଡ୍’କୁ ଅନୁମତି ଦେଇଛି ଆମେରିକାର ଫୁଡ ଆଣ୍ଡ ଡ୍ରଗ୍ସ ଆଡମିନିଷ୍ଟ୍ରେସନ । ବିଶ୍ୱର ବିଭିନ୍ନ ରାଷ୍ଟ୍ରରେ ଓମିକ୍ରନ୍ ମାଡ଼ି ଚାଲିଥିବା ବେଳେ ଏହି ବଟିକା ଆକ୍ରାନ୍ତଙ୍କୁ ଗୁରୁତର ହେବାରୁ ସୁରକ୍ଷା ଦେଇପାରିବ ବୋଲି କୁହାଯାଉଛି ।

ଫାଇଜର ପ୍ରସ୍ତୁତ କରିଥିବା କରୋନା ବଟିକା ପାକ୍ସଲୋଭିଡ୍ ୯୦ ପ୍ରତିଶତ ପ୍ରଭାବଶାଳୀ । ଏହା ଆକ୍ରାନ୍ତଙ୍କୁ ଗୁରୁତର ହେବାରୁ ଓ ମେଡିକାଲରେ ଭର୍ତ୍ତି ହେବା ଆଶଙ୍କାକୁ ଅନେକାଂଶରେ କମାଇ ପାରିବ । କମ୍ପାନୀ ପକ୍ଷରୁ କରାଯାଇଥିବା କ୍ଲିନିକାଲ ଟ୍ରାଏଲରୁ ଏହି ତଥ୍ୟ ମିଳିଛି । ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ବଟିକା ଓମିକ୍ରନ ଷ୍ଟ୍ରେନକୁ ମଧ୍ୟ ମାତ୍ ଦେବାରେ ସଫଳ ବୋଲି ଫାଇଜର ଦାବି କରିଛି । କମ୍ପାନୀ ଏହାର ଉତ୍ପାଦନ କ୍ଷମତା ୮୦ ମିଲିଅନରୁ ୧୨୦ ମିଲିଅନକୁ ବଢ଼ାଇ ଦିଆଯାଇଛି । କରୋନାର ଏହି ବଟିକା ଯୁକ୍ତରାଷ୍ଟ୍ର ଆମେରିକାରେ ତୁରନ୍ତ ବିତରଣ ଆରମ୍ଭ କରିବାକୁ ପ୍ରସ୍ତୁତ ବୋଲି କମ୍ପାନୀ ପକ୍ଷରୁ କୁହାଯାଇଛି ।  ୧୨ ବର୍ଷରୁ ଅଧିକ ବୟସ୍କ ଲୋକ ଏହି ବଟିକା ଖାଇପାରିବେ । ସେପଟେ ଫାର୍ମା କମ୍ପାନୀ ମର୍କ ଆଣ୍ଡ କୋ. ପ୍ରସ୍ତୁତ କରିଥିବା କରୋନା ଔଷଧକୁ ଫିଲିପାଇନ୍ସରେ ମଧ୍ୟ ମଞ୍ଜୁରି ଦିଆଯାଇଛି ।