ଚିତ୍ତ ରଞ୍ଜନଙ୍କ ପରିବାର ଲୋକଙ୍କ ଅଭିଯୋଗ: କହିଲେ, ଧାର ଟଙ୍କାକୁ ନେଇ ହତ୍ୟାକାଣ୍ଡ
ପୁରୀ: ଚିତ୍ତ ରଞ୍ଜନ ପଲେଇଙ୍କ ମୃତ୍ୟୁ ଘଟଣାରେ ପରିବାର ପକ୍ଷରୁ ତା’ର ବନ୍ଧୁ ଜଗାକୁ ଦାୟୀ କରାଯାଇଛି । ୫ ମାସ ତଳେ ଚିତ୍ତଙ୍କ ବାହାଘର ହୋଇଥିଲା । ପରିବାରର ଅଭିଯୋଗ ଅନୁଯାୟୀ, ଚିତ୍ତଙ୍କଠାରୁ ଜଗା କିଛି ଅର୍ଥ ଧାର୍ ନେଇଥିଲା । ଧାର୍ ଅର୍ଥ ଫେରାଇବା ନେଇ ଉଭୟଙ୍କ ମଧ୍ୟରେ ଗଣ୍ଡଗୋଳରୁ ଚିତ୍ତଙ୍କୁ ହତ୍ୟା କରାଯାଇଥିବା ପରିବାର ଲୋକ ସନ୍ଦେହ କରିଛନ୍ତି । ଗତ ଶନିବାର ଚିତ୍ତ ତାଙ୍କ ଘରୁ ଆଉ ଜଣେ ବନ୍ଧୁ ଦିଲ୍ଲୀପ ଜରିଆରେ ପ୍ୟାଣ୍ଟସାର୍ଟ ମଗାଇଥିଲେ । ସେମାନେ ଜଗା ଘରକୁ ଭୋଜି ପାଇଁ ଯାଇଥିଲେ । ଭୋଜିରେ ଚିତ୍ତଙ୍କୁ ଅତ୍ୟଧିକ ମଦ ପିଆଇ ଦିଆଯାଇଥିଲା । ପରେ ଧାର ଅର୍ଥକୁ ନେଇ ଉଭୟଙ୍କ ମଧ୍ୟରେ ବଚସା ହେବାରୁ ଚିତ୍ତଙ୍କୁ ଜଗା ହତ୍ୟା କରି ନଦୀରେ ଫିଙ୍ଗି ଦେଇଥିବା ପରିବାର ଲେକ ଅଭିଯୋଗ କରିଛନ୍ତି । ଚିତ୍ତଙ୍କ ମୃତ୍ୟୁ ନେଇ ପରିବାରରେ ଶୋକାକୁଳ ପରିବେଶ ସୃଷ୍ଚି ହୋଇଛି । ପରିବାର ପକ୍ଷରୁ ଚିତ୍ତଙ୍କ ହତ୍ୟାକାରୀ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ପୁରୀ ଏସପିଙ୍କ ପାଖରେ ଦାବି କରାଯାଇଛି ।
ଅନ୍ୟପକ୍ଷରେ ଘଟଣାରେ ପ୍ରତିକ୍ରିୟା ରଖିଛନ୍ତି ପୂର୍ବତନ ବିଧାୟକ ସଞ୍ଜୟ ଦାସବର୍ମା । ଚିତ୍ତରଞ୍ଜନଙ୍କ ଅକାଳ ବିୟୋଗରେ ସେ ଗଭୀର ଭାବେ ମର୍ମାହତ ହୋଇଥିବା କହିଛନ୍ତି । ମୃତକଙ୍କ ପରିବାର ଲୋକଙ୍କ ପ୍ରତି ସମବେଦନା ଜଣାଇବା ସହ ସେମାନଙ୍କ ଅଭିଯୋଗକୁ ଖଣ୍ଡନ କରିଛନ୍ତି । ତଦନ୍ତ ହେଲେ ସତ୍ୟ ଉନ୍ମୋଚିତ ହେବ ବୋଲି କହିଛନ୍ତି ଶ୍ରୀ ଦାସବର୍ମା ।
ସୂଚନା ଯୋଗ୍ୟ, ସଦର ଥାନା ଗଡ଼ ମୃଗଶିରା ବ୍ରିଜ୍ ନିକଟ ନୂଆ ନଈପଠାରୁ ବ୍ରହ୍ମଗିରି ସାନ ବନ୍ଧକେରା ଗାଁର ୨୮ବର୍ଷୀୟ ଚିତ୍ତରଞ୍ଜନ ପଲେଇଙ୍କ ମୃତଦେହ ଉଦ୍ଧାର ହୋଇଥିଲା । ଏନେଇ ପୁରୀ ସଦର ଥାନାରେ ଏକ ମାମଲା ରୁଜୁ କରିବା ସହିତ ତଦନ୍ତ ଆରମ୍ଭ କରିଛି ପୋଲିସ । ଚିତ୍ତରଞ୍ଜନ ଗତକାଲି ତାଙ୍କର କିଛି ବନ୍ଧୁଙ୍କ ସହ ଭୋଜି କରିବାକୁ ଯାଇ ଆଉ ଘରକୁ ଫେରିନଥିଲେ । ଗଡ଼ ମୃଗଶିରା ବ୍ରିଜ୍ ନିକଟରେ ରକ୍ତଛିଟା ପଡ଼ିଥିବା ବେଳେ ତାଙ୍କ ଜୋତା ଓ ମୋବାଇଲ ଇତ୍ୟାଦି ପୋଲିସ ଜଵତ କରିଛି । ପାରିପାର୍ଶ୍ୱିକ ସ୍ଥିତି ଦେଖି ଏହା ଏକ ହତ୍ୟାକାଣ୍ଡ ବୋଲି ସନ୍ଦେହ କରାଯାଉଛି । ଗତ କିଛି ମାସ ତଳେ ବିବାହ କରିଥିଲେ ଚିତ୍ତରଂଜନ । ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ତଦନ୍ତ କରିବ ।
