WHOର ସତର୍କବାଣୀ; ଜାନୁଆରିରେ ଆସିବ ବଡ଼ ପ୍ରବାହ

ନୂଆଦିଲ୍ଲୀ: ସାରା ବିଶ୍ବକୁ କବଳିତ କରିବ ଓମିକ୍ରନ । ସାରା ଦେଶକୁ ବ୍ୟାପିଯିବ କରୋନାର ଏହି ନୂଆ ଭ୍ୟାରିଆଣ୍ଟ । ଏହି ଭ୍ୟାରିଆଣ୍ଟ ଯୋଗୁ ୟୁକେରେ ଜାନୁଆରିରେ ଏକ ବଡ ଲହର ଆସିବାର ସମ୍ଭାବନା ରହିଛି ବୋଲି ବିଶେଷଜ୍ଞ ଦଳ ଆଶଙ୍କା କରିଛନ୍ତି  । ସେପଟେ ଅତ୍ୟଧିକ ସଂକ୍ରାମକ କାରଣରୁ ଏହି ଭାରିଆଣ୍ଟକୁ ନେଇ ସତର୍କ କରିଛି ବିଶ୍ବ ସ୍ବାସ୍ଥ୍ୟ ସଂଗଠନ । ଏବେ ସୁଦ୍ଧା ୫୯ ଦେଶକୁ ବ୍ୟାପି ସାରିଥିବା ଓମିକ୍ରନ୍ ପାଇଁ ପୁଣି ଲକଡାଉନ୍ ଓ ସଟଡାଉନ୍ ଭଳି ସ୍ଥିତି ଫେରିପାରେ ବୋଲି ବିଶ୍ବ ସ୍ବାସ୍ଥ୍ୟ ସଂଗଠନ କହିଛି ।

ଓମିକ୍ରନ୍ ଭାରିଆଣ୍ଟ ଚିହ୍ନଟ କରିବା ପାଇଁ ସ୍ପେଶାଲ କିଟ୍ ପ୍ରସ୍ତୁତ କରିଛି ICMR । ଆସନ୍ତା ଏକ ସପ୍ତାହ ମଧ୍ୟରେ ଏହି କିଟ୍ ବଜାରରେ ଉପଲବ୍ଧ ହୋଇପାରେ । ଏହା‌ ସାହାଯ୍ୟରେ ମାତ୍ର ୨ଘଣ୍ଟାରେ ଓମିକ୍ରନ ଷ୍ଟ୍ରେନ୍‌ ଠାବ କରାଯାଇପାରିବ । ଭାରତରେ ମଧ୍ୟ କରୋନାର ନୂଆ ଭାରିଆଣ୍ଟ ଓମିକ୍ରନ ମାମଲା ଚିହ୍ନଟ ହୋଇଛି । ଭାରତର ୮ଟି ରାଜ୍ୟରେ ପହଞ୍ଚି ସାରିଲାଣି କରୋନାର ସୁପର ମ୍ୟୁଟାଣ୍ଟ ଓମିକ୍ରନ୍‌ । ମହାରାଷ୍ଟ୍ର, ରାଜସ୍ଥାନ, ଦିଲ୍ଲୀ, କେରଳ, ଗୁଜରାଟ ଓ କର୍ଣ୍ଣାଟକ ପରେ ଚଣ୍ଡିଗଡ଼ ଓ ଆନ୍ଧ୍ରରେ ଚିହ୍ନଟ ହୋଇଛି ଓମିକ୍ରନ୍ । ଏବେ ଦେଶରେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ୩୮ରେ ପହଞ୍ଚିଛି । ଗତକାଲି କେରଳ, ଆନ୍ଧ୍ରପ୍ରଦେଶ, ଚଣ୍ଡିଗଡ଼, କର୍ଣ୍ଣାଟକ ଓ ନାଗପୁରରୁ ଜଣେ ଲେଖାଏଁ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି ।