ଦୁଇ ବର୍ଷ ପରେ ପୁଣି ଆରମ୍ଭ ହେବ ଦି-ବାଙ୍ଗ୍ ଟୁର; ଡିସେମ୍ବର ୧୦ରେ ଦୁବାଇରେ ହେବ କାର୍ଯ୍ୟକ୍ରମ

ମୁମ୍ବାଇ: ଦେଶ ବିଦେଶରେ ଅନେକ ଲୋକପ୍ରିୟତା ଅର୍ଜନ କରିଥିବା ସଲମାନ ଖାନଙ୍କ ଦି-ବାଙ୍ଗ୍ ଟୁର୍ ପ୍ରାୟ ଦୁଇ ବର୍ଷର ବ୍ୟବଧାନ ପରେ ପୁଣି ଥରେ ମଞ୍ଚକୁ ଫେରିଛି । ଡିସେମ୍ବର ୧ରେ ସଲମାନ ଘୋଷଣା କରିଥିଲେ ଯେ ଡିସେମ୍ବର ୧୦ରେ ଏହି କାର୍ଯ୍ୟକ୍ରମର ନୂଆ ସଂସ୍କରଣ ଦୁବାଇଠାରେ ଅନୁଷ୍ଠିତ ହେବ। ଏହି କାର୍ଯ୍ୟକ୍ରମର ଉପସ୍ଥାପକ ସଲମାନ ଖାନ ରହିଥିବାବେଳେ ଜ୍ୟାକଲିନ୍ ଫର୍ଣ୍ଣାଣ୍ଡିଜ୍, ଶିଳ୍ପା ସେଟ୍ଟୀ, ପ୍ରଭୁ ଦେବା, ଆୟୁଷ ଶର୍ମା, ଗୁରୁ ରନ୍ଧାଓ୍ୱା ପ୍ରମୁଖ ଏଥିରେ ନୃତ୍ୟଗୀତ ପରିବେଷଣ କରିବେ।

ତେବେ ଏହି କାର୍ଯ୍ୟକ୍ରମରେ ଯୋଗ ଦେବା ପାଇଁ ଜ୍ୟାକଲିନ ଦୁବାଇ ବାହାରିଥିବା ବେଳେ ରବିବାର ରାତିରେ ତାଙ୍କୁ ମୁମ୍ବାଇ ବିମାନବନ୍ଦରରେ ରୋକାଯାଇଥିଲା। ମନି ଲଣ୍ଡରିଂ ମାମଲାରେ ଜ୍ୟାକଲିନଙ୍କ ସଂପୃକ୍ତି ନେଇ ଅଭିଯୋଗ ହୋଇଥିବାରୁ ତାଙ୍କୁ ତଦନ୍ତ ନସରିବା ଯାଏଁ ବିଦେଶ ଯିବାକୁ ବାରଣ କରାଯାଇଛି । ତେବେ ଶୁଣିବାକୁ ମିଳୁଛି ଯେ ଅଭିନେତ୍ରୀ ଡେଜି ଶାହ ଜ୍ୟାକଲିନଙ୍କ ସ୍ଥାନ ନେବେ ।