ବାତ୍ୟା ଆସୁଛି, ପାଚିଲା ଧାନ ଅମଳରେ ବ୍ୟସ୍ତ ଚାଷୀ
ଭୁବନେଶ୍ୱର: ଡରାଇଲାଣି ସମ୍ଭାବ୍ୟ ବାତ୍ୟା । ‘ଜୱାଦ’ ଚିତ୍ର ସ୍ପଷ୍ଟ ହେବା ପରେ କେମିତି ବର୍ଷକର ପାଚିଲା ଫସଲ ଘରକୁ ଆସିବ ସେ ନେଇ ଚାଷୀଙ୍କୁ ଘାରିଛି ଚିନ୍ତା । କ୍ଷେତରୁ ଖଳାବାରି ବାରି ହୋଇ ପଡ଼ୁଛି ଚାଷୀଙ୍କ ବ୍ୟସ୍ତତା । ଅମଳ ଧାନକୁ ସୁରକ୍ଷିତ ଗଚ୍ଛିତ ଲାଗି ଚାଷୀ କରୁଛନ୍ତି ପ୍ରାଣମୂର୍ଚ୍ଛା ଉଦ୍ୟମ । ୩ ତାରିଖରୁ ବର୍ଷା ଆରମ୍ଭ ହେଉଥିବାରୁ ପାଚିଲା ଧାନ କାଟିବା ସହ ଗଦା ମାରି ସାଇତି ରଖୁଛନ୍ତି ।
ବିପର୍ଯ୍ୟୟ ପୂର୍ବରୁ ଅମଳରେ ବ୍ୟସ୍ତ ଚାଷୀକୁଳ । ଭାରତୀୟ ପାଣିପାଗ କେନ୍ଦ୍ର ବାତ୍ୟା ‘ଜୱାଦ’ର ରୂପରେଖ ସ୍ପଷ୍ଟ କରିବା ପରେ ସତର୍କ ହୋଇଛି ଚାଷୀ କୂଳ । ଆଣ୍ଡାମାନ ସାଗରରେ ସୃଷ୍ଟ ଲଘୁଚାପ ଯୋଗୁଁ ୩ରୁ ଆରମ୍ଭ ହେବ ବର୍ଷା । ଏହାକୁ ଦୃଷ୍ଟିରେ ରଖି ଧାନ କାଟିବା ସହ ଅମଳ ଫସଲକୁ ସାଇତି ରଖିବାରେ ଚାଷୀ ଲଗି ପଡ଼ିଛନ୍ତି । ଜଗତସିଂହପୁରରୁ ଯାଜପୁର, ଗଞ୍ଜାମରୁ ଭଦ୍ରକ ସବୁଠି ପାଚିଲା ଧାନକୁ କାଟି ସାଇତିବାରେ ଲାଗିଛନ୍ତି ।
ନଭେମ୍ବରରେ ଲଘୁଚାପ ବର୍ଷା ଚାଷୀଙ୍କ ମେରୁଦଣ୍ଡ ଭାଙ୍ଗି ଦେଇଥିବା ବେଳେ ଏବେ ବାତ୍ୟା ଚାଷୀଙ୍କ ନିଦ ହଜାଇ ଦେଇଛି । ଲଘୁଚାପ ପ୍ରଭାବରେ ଆସନ୍ତା ୨ ତାରିଖରୁ ଓଡ଼ିଶାରେ ପାଗ ପରିବର୍ତ୍ତନ ହେବ । ୪ ତାରିଖ ବେଳକୁ ପୁରୀ, ଜଗତସିଂହପୁର, ଗଞ୍ଜାମ, ନୟାଗଡ଼, କେନ୍ଦ୍ରାପଡ଼ା, ଭଦ୍ରକ, ବାଲେଶ୍ୱର, କଟକ ଏବଂ ଖୋର୍ଦ୍ଧାରେ ପ୍ରବଳ ବର୍ଷା ଆଶଙ୍କା ରହିଛି ।
ଅନ୍ୟପକ୍ଷରେ ବଙ୍ଗୋପସାଗରରେ ସୃଷ୍ଟ ହେବାକୁ ଥିବା ସମ୍ଭାବ୍ୟ ଲଘୁଚାପ ଜନିତ ବର୍ଷାକୁ ନଜରରେ ରଖି ଓୟୁଏଟି ପକ୍ଷରୁ ଚାଷୀମାନଙ୍କ ପାଇଁ ମାର୍ଗଦର୍ଶିକା ଜାରି କରାଯାଇଛି । ଅମଳ ସମୟରେ ଏଭଳି ବର୍ଷା ଓ ବାତ୍ୟା ଆଶଙ୍କା ଥିବାରୁ ଫସଲ ସୁପରିଚାଳନା ପାଇଁ ମାର୍ଗଦର୍ଶିକା ଜାରି କରାଯାଇଛି ।
ଏଥିସହ ପଢ଼ନ୍ତୁ: ୧୩୦ ବର୍ଷ ପରେ ଡିସେମ୍ବରର ଜାଡ଼ରେ ବାତ୍ୟା ମାଡ଼
