‘ପୀଡ଼ିତାଙ୍କ ପାଇଁ ନାହିଁ ଦୟା କି ସହାନୁଭୂତି, ନିର୍ବାଚନ ଆସିଲେ ବିଜେପିକୁ ମନେ ପଡ଼ନ୍ତି’: ବିଜେଡି

ଭୁବନେଶ୍ୱର: ପୀଡ଼ିତା ମହିଳାଙ୍କୁ ନେଇ ଶସ୍ତା ରାଜନୀତି କରୁଛି ବିଜେପି । ସମ୍ବେଦନଶୀଳ ପ୍ରସଙ୍ଗକୁ ନେଇ ବିଜେପି ରାଜନୀତି ନକରୁ । ନିର୍ବାଚନ ଆସିଲେ ବିଜେପିକୁ ପୀଡ଼ିତାଙ୍କ କଥା ମନେ ପଡ଼େ । ବିଜେପି ସବୁକିଛି ଭୁଲି ଯାଏ । ପୀଡ଼ିତାଙ୍କ ପରିବାର ପ୍ରତି ଦୟା କି ସହାନୁଭୂତି ନଥିଲା । ଗଣମାଧ୍ୟମରେ ଚର୍ଚ୍ଚାରେ ରହିବାକୁ ବିଜେପି ନେତା ଭାଗ ଭାଗ ହୋଇ ବିବାଦୀୟ ମନ୍ତବ୍ୟ ଦିଅନ୍ତି ବୋଲି ବିଜେଡି ପ୍ରେସମିଟରେ କହିଛି । ଟିକିରି ଇତିଶ୍ରୀ ଓ କୁନ୍ଦୁଲି ପୀଡ଼ିତାଙ୍କୁ ନେଇ ବିଜେପି ରାଜନୀତି କରିଥିଲା ବୋଲି କହିଛନ୍ତି ବିଜେଡି ନେତା ଏଲିନା ଦାସ । ବିଜେପିକୁ କାଉଣ୍ଟର କରିବା ସହ ଟିକିରି ଇତିଶ୍ରୀ ଓ କୁନ୍ଦୁଲି ପ୍ରସଙ୍ଗକୁ ନେଇ ଭିଡିଓ ଜାରି କରିଛି ବିଜେଡି ।

୨୦୧୪ ନିର୍ବାଚନରେ ଇତିଶ୍ରୀ ଘଟଣାକୁ ବିଜେପି ଓ କଂଗ୍ରେସ ପ୍ରସଙ୍ଗ କରିଥିଲେ । ଓଡ଼ିଶାବାସୀ ଯାହାର ଜବାବ ନିର୍ବାଚନରେ ଦେଇଥିଲେ । ସିବିଆଇ ତଦନ୍ତ ଦାବି କରିଥିଲେ ବିରୋଧୀ । ସିବିଆଇ ତଦନ୍ତ ହେଲା, ଶେଷରେ କ୍ରାଇମବ୍ରାଞ୍ଚ ତଦନ୍ତ ରିପୋର୍ଟରେ ହିଁ ମୋହର ବାଜିଲା । ଇତିଶ୍ରୀ ଘଟଣାରେ ବିଜେପି ଜୟରାମ ପାଙ୍ଗୀଙ୍କୁ ନିଶାନା କରୁଥିବା ବେଳେ ନିର୍ବାଚନ ପୂର୍ବରୁ ଦଳରେ ମିଶାଇ ଦଳ ପାଇଁ ଆସେଟ୍ ବୋଲି କହିଥିଲା ।

୨୦୧୭ରେ କୁନ୍ଦୁଲି ଏକ ଅତ୍ୟନ୍ତ ସ୍ପର୍ଶକାତର ପ୍ରସଙ୍ଗ ଥିଲା । ଇତିଶ୍ରୀ ଭଳି କୁନ୍ଦୁଲି ପ୍ରସଙ୍ଗରେ ବିଜେପି, କଂଗ୍ରେସ ନାରାବାଜି କରି ହୀନ ରାଜନୀତି କରିଥିଲେ ବୋଲି କହିଛନ୍ତି ବିଜେଡିର ରାଷ୍ଟ୍ରୀୟ ମୁଖପାତ୍ର ଡ. ସସ୍ମିତ ପାତ୍ର । କୁନ୍ଦଲି ଘଟଣାରେ ରାଜ୍ୟ ସରକାର ତୁରନ୍ତ କାର୍ଯ୍ୟାନୁଷ୍ଠାନ ନେଇଥିଲେ । ବିଜେପି ଅତି ତଳକୁ ଖସି ପୀଡ଼ିତାଙ୍କ ନାଁ ମଧ୍ୟ ପ୍ରକାଶ କରିଥିଲା । ଓଡ଼ିଶାକୁ ଜାତୀୟସ୍ତରରେ ବଦନାମ କରି ବିଜେପି ବାଃ ବାଃ ନେବାକୁ ଚେଷ୍ଟା କରିଥିଲା ।

ବିଜେପୁର ଉପନିର୍ବାଚନ ପୂର୍ବରୁ ଗର୍ଜନ କରୁଥିବା ବିଜେପି ନିର୍ବାଚନ କମିଶନଙ୍କୁ ପ୍ରମାଣ ନେଇ କୌଣସି ରିପୋର୍ଟ ଦେଇ ନଥିଲା । କେବଳ ନିର୍ବାଚନ ଆସିଲେ ବିଜେପି ଡିଏଁ, ନିର୍ବାଚନ ସରିଲେ ଶୋଇଯାଏ । ନିର୍ବାଚନ ଆସିଲେ ବିଜେପି ନାରୀ ନିର୍ଯାତନା କଥା କୁହେ । ମିଥ୍ୟା ସହ ଭାରତୀୟ ଜନତା ପାର୍ଟି ଯାଉଛି । ବିଜେଡି ସତ୍ୟ ମେବ ଜୟତେରେ ବିଶ୍ୱାସ ରଖେ । ସତ୍ୟକୁ ଧରି ବିଜେଡି ଆଗକୁ ବଢ଼ିବ ।

ରାଜନୈତିକ ଫାଇଦା ପାଇଁ ବିଜେପି ପୀଡ଼ିତାଙ୍କ ପରିବାରକୁ ବ୍ୟବହାର କରୁଛି । ଯଦି ବିଜେପି ପାଖରେ କିଛି ପ୍ରମାଣ ଅଛି ତାହେଲେ ପୋଲିସକୁ ଦିଅନ୍ତୁ । ବହୁ ଫ୍ୟାକ୍ଟ ଫାଇଣ୍ଡିଂ ଟିମ୍ ବିଜେପି ପକ୍ଷରୁ ଘଟଣାସ୍ଥଳକୁ ଯାଉଛି । ଖଣ୍ଡିଏ ବି ଫ୍ୟାକ୍ଟ ବାହାରୁନି । କେବଳ ପ୍ରହସନ ପାଇଁ ଘଟଣାସ୍ଥଳକୁ ଯାଉଛନ୍ତି । ଯଦି କିଛି ପ୍ରମାଣ ଅଛି ଆଣନ୍ତୁ ବୋଲି ବିଜେଡି, ବିଜେପିକୁ ଚ୍ୟାଲେଞ୍ଜ ଦେଇଛି ।