ଆକାଶ ଛୁଆଁ ପରିବା ଦର; ଚିନ୍ତାରେ ଖାଉଟି

ଭୁବନେଶ୍ୱର: ଦରଦାମରେ ବେହାଲ ହେଲେଣି ଖାଉଟି। ଦିନକୁ ଦିନ ପେଟ୍ରୋଲ୍ ଓ ଡିଜେଲ୍ ଦର ବଢୁଥିବା ବେଳେ ପରିବା ଦର ମଧ୍ୟ ଆାକାଶ ଛୁଆଁ ହୋଇଛି। ସାରା ରାଜ୍ୟରେ ଆକାଶ ଛୁଆଁ ହୋଇଛି ପରିବା ଦର। ଦିନକେଇଟା ଭିତରେ ଦୁଇଗୁଣା ହୋଇଛି ପରିବା ଦାମ୍ । ବାଜ୍ୟର ବିଭିନ୍ନ ସ୍ଥାନରେ ଏବେ ପୋଟଳ କିଲୋ ୬୦ ଟଙ୍କା ଥିବା ବେଳେ ଟମାଟୋର କିଲୋ ୫୦ ଟଙ୍କା ରହିଛି।

ସେହିପରି ବାଇଗଣ କିଲୋ ୪୦ ଟଙ୍କା ଓ ଭେଣ୍ଡି ୫୦, ଜହ୍ନି-୫୦, ବିନସ୍-୮୦, ଭଣ୍ଡା-୨୫, ଝୁଡୁଙ୍ଗ-୬୦, ସାରୁ-୪୦, ମାଟିଆଳୁ -୬୦, କଖାରୁ- ୨୫ ଓ ଶାଗ ବିଡା- ୧୦ ଟଙ୍କାରେ ବିକ୍ରି ହେଉଛି। ଦରଦାମ ଅଧିକ ଥିବାରୁ ଗ୍ରାହକ କମ ପରିମାଣର ପରିବା କିଣୁଛନ୍ତି। ବ୍ୟବସାୟୀଙ୍କ କହିବା କଥା କାର୍ତ୍ତିକ ମାସରେ ଦର ସାଧାରଣତଃ ଅଧିକ ରହେ। ମାତ୍ର ଚଳିତ ବର୍ଷ ଦରଦାମ୍ ରେକର୍ଡ ଭାଙ୍ଗିଛି।

ଲଗାତାର ପେଟ୍ରୋଲ ଓ ଡିଜେଲ ଦର ବଢିବା ଯୋଗୁ ଏହାର ପ୍ରଭାବ ପରିବା ଉପରେ ପଡିଛି। ପରିବହନ ଖର୍ଚ୍ଚ ବଢିଥିବାରୁ ପରିବା ଦର ମଧ୍ୟ ବଢୁଛି । ତୈଳଦର ହ୍ରାସ ଓ ସ୍ଥାନୀୟ ପରିବା ଉତ୍ପାଦନ ହେଲେ ଦରଦାମ୍ ନିୟନ୍ତ୍ରଣକୁ ଆସିବ। ସେହିପରି ଗତକାଲି ଅପେକ୍ଷା ଆଜି ପେଟ୍ରୋଲ ୩୬ ପଇସା ଓ ଡିଜେଲ ୩୯ ପଇସା ବୃଦ୍ଧି ପାଇଥିବା ସୂଚନା ମିଳିଛି ।