ନବଜ୍ୟୋତ ଖୋଲିଲେ କ୍ୟାପଟେନଙ୍କ ଗୁମର
ଲୁଧିଆନା: ପାକିସ୍ତାନୀ ସାମ୍ବାଦିକ ଅରୁସା ଆଲମ ମାମଲାରେ ନବଜ୍ୟୋଜି ସିଂହ ସିଦ୍ଧୁଙ୍କ ପତ୍ନୀ ନବଜ୍ୟୋତି କୌର ସିଦ୍ଧୁଙ୍କ ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ ଅମରେନ୍ଦ୍ର ସିଂହଙ୍କ ବିରୋଧରେ ହଲ୍ଲା ବୋଲ୍ । ପଞ୍ଜାବ ଉପମୁଖ୍ୟମନ୍ତ୍ରୀ ସୁଖଜିନ୍ଦର ସିଂହ ରନ୍ଧଓ୍ବାଙ୍କ ପରେ କୌର କ୍ୟାପଟେନଙ୍କ ବିରୋଧରେ ମୋର୍ଚ୍ଚା ଖୋଲି ଦେଇଛନ୍ତି । କ୍ୟାପଟେନଙ୍କ ଶାସନ ସମୟରେ ଟଙ୍କା ବଦଳରେ ଚାକିରି ମିଳୁଥିବା ଅଭିଯୋଗ ଆଣିଲେ । କ୍ୟାପଟେନ ଚାକିରି ବଦଳରେ ଟଙ୍କା ନେଇ ସେଥିରେ ଗିଫ୍ଟ କିଣି ଅରୁସାଙ୍କୁ ଦେଉଥିଲେ ବୋଲି ସେ କହିଛନ୍ତି ।
କ୍ୟାପଟେନଙ୍କ ନୂଆ ଦଳ ଗଠନକୁ ନେଇ କଟାକ୍ଷ କରିବା ସହ ନବଜ୍ୟୋତି କୌର କହିଛନ୍ତି, ‘କ୍ୟାପଟନ ସାବହଙ୍କ ବୟସ ଏବେ ପୂଜାପାଠ କରିବାର । ବାକି ସମୟ ଅରୁସା ଆଲମଙ୍କ ସହ ତା କଟିବା କଥା ।’
ସେ ଆହୁରି କହିଛନ୍ତି, ‘କ୍ୟାପଟେନଙ୍କ ନୂଆ ଦଳ ପଞ୍ଜାବ କଂଗ୍ରେସ ଉପରେ କୌଣସି ପ୍ରଭାବ ପକାଇବନି । କ୍ୟାପଟେନଙ୍କ ଶାସନ ସମୟରେ କାମ କରିବାରେ ମତଭେଦ କରାଯାଉଥିଲା । ଏବେ ସବୁ କ୍ଷେତ୍ରରେ ବିକାଶ ବାର୍ଯ୍ୟ ହେଉଛି ।’
କ୍ୟାପଟେନଙ୍କ ଉପରେ ନବଜ୍ୟୋତି କୌର ଆଉ ଏକ ଗୁରୁତର ଅଭିଯୋଗ ଆଣିଛନ୍ତି । ସେ କହିଛନ୍ତି, ‘ଅରୁସାଙ୍କ ବିନା ଅନୁମତିରେ କୌଣସି ବ୍ୟକ୍ତି ମନ୍ତ୍ରୀ କ’ଣ ଚପରାଶି ବି ହୋଇପାରୁନଥିଲେ । ଏପରିକି ଏସଏଚଓ, ଏସପିଙ୍କ ପୋଷ୍ଟିଂ ମଧ୍ୟ ଅରୁସାଙ୍କ ସହମତିରେ ହେଉଥିଲା ।’
ଅରୁସା କ୍ୟାପଟେନଙ୍କ ସରକାରରେ ପଞ୍ଜାବ ପୋଲିସର ଡିଜିପି ଥିଲେ ବୋଲି ମଧ୍ୟ କୌର କହିବାକୁ ପଛାଇ ନଥିଲେ ।
ସୂଚନାଯୋଗ୍ୟ, ଉପମୁଖ୍ୟମନ୍ତ୍ରୀ ସୁଖଜୀନ୍ଦର ସିଂହ ରନ୍ଧଓ୍ବା କହିଥିଲେ, ‘କ୍ୟାପଟେନ ଅମରିନ୍ଦ୍ର ସିଂହଙ୍କ ପାକିସ୍ତାନୀ ମହିଳା ବନ୍ଧୁ ଏବଂ ପାକ ଗୁଇନ୍ଦା ସଂସ୍ଥା ସହ ସମ୍ପର୍କର ଯାଞ୍ଚ କରାଯିବ ।‘ ଏହାସହ ଅରୁସା ଏବଂ ପାକିସ୍ତାନୀ ଗୁଇନ୍ଦା ସଂସ୍ଥା ଆଇଏସଆଇ ସମ୍ପର୍କର ଯାଞ୍ଚ କରିବାକୁ ଡିଜିପି ଇକବାଲ ପ୍ରିତ ସହୋତାଙ୍କୁ ମଧ୍ୟ ସେ ନିର୍ଦ୍ଦେଶ କହିଥିଲେ ।
