କେନ୍ଦ୍ରକୁ ଅତିରିକ୍ତ ୬ ଲକ୍ଷ ଡୋଜ୍ କୋଭିସିଲ୍ଡ ଟିକା ମାଗିଲା ଓଡ଼ିଶା
ଭୁବନେଶ୍ୱର: ରାଜ୍ୟରେ ଟିକାକରଣ ଜାରି ରହିଛି । ଜୁନ୍ ୨୧ରୁ ଦୈନିକ ହାରାହାରି ୩ ଲକ୍ଷ ଟିକାକରଣ ହେଉଛି । ଜୁନରେ ଓଡ଼ିଶା ୧୩ ଲକ୍ଷ ୭୮ ହଜାର ୩୧୦ ଡୋଜ୍ କୋଭିସିଲ୍ଡ ଟିକା ପାଇଥିବା ବେଳେ ଏହା ଜିଲ୍ଲାଗୁଡ଼ିକୁ ପଠାଇ ଦିଆଯାଇଛି ।
ଏବେ ରାଜ୍ୟ ପାଖରେ ମାତ୍ର ୩.୫ ଲକ୍ଷ କୋଭିସିଲ୍ଡ ଟିକା ଗଚ୍ଛିତ ରହିଛି । ଯାହାକି ମାତ୍ର ୨ ଦିନରେ ସରିଯିବ । ରାଜ୍ୟରେ ମଙ୍ଗଳବାର ପରେ ଆଉ କୋଭିସିଲ୍ଡ ଟିକା ବଳକା ରହିବ ନାହିଁ । ଏନେଇ ଅତିରିକ୍ତ ମୁଖ୍ୟ ଶାସନ ସଚିବ ସ୍ୱାସ୍ଥ୍ୟ ବିଭାଗ କେନ୍ଦ୍ର ସରକାରଙ୍କ ସହ ଆଲୋଚନା କରିଛନ୍ତି । ଜୁଲାଇ ମାସରେ କେନ୍ଦ୍ର ଓଡ଼ିଶାକୁ ୨୫.୩୧ ଲକ୍ଷ କୋଭିସିଲ୍ଡ ଟିକା ଦେବେ ।
ମଙ୍ଗଳବାର କୋଭିସିଲ୍ଡ ଟିକା ସରୁଥିବାରୁ ଟିକାକରଣ ବାଧାପ୍ରାପ୍ତ ହେବ । ସେଥିପାଇଁ କେନ୍ଦ୍ର ଅତିରିକ୍ତ ୬ କୋଭିସିଲ୍ଡ ଟିକା ଜୁନ୍ ମାସରେ ଦେବାକୁ ଓଡ଼ିଶା ଅନୁରୋଧ କରିଛି । ଏଥିରେ କେନ୍ଦ୍ର ସରକାର ମଧ୍ୟ ସହମତି ପ୍ରକାଶ କରିଥିବା ଜଣାପଡ଼ିଛି ।
