ଛୁରୀ ଦେଖାଇ ଡରାଉଥିଲେ, ଗିରଫ ହେଲେ ୨ ’ଲେଡି ଡନ୍’
ଭୋପାଳ: ମଧ୍ୟପ୍ରଦେଶ ସ୍ଥିତ ଇନ୍ଦୋରର ମୁଖ୍ୟ ରାସ୍ତାରେ ପଥଚାରୀଙ୍କୁ ଛୁରୀ ଦେଖାଇ ଡରାଉଥିବା ଦୁଇ ଲେଡି ଡନଙ୍କୁ ଗିରଫ କରିଛି ପୋଲିସ । ନିକଟରେ ଏହି ଦୁଇ ଯୁବତୀ ତୁକୋଗଞ୍ଜ ଥାନା ଅନ୍ତର୍ଗତ ଏକ ଦୋକାନରେ ଅନ୍ୟ ଜଣେ ଯୁବତୀଙ୍କୁ ମାଡ ମାରିଥିଲେ ବୋଲି ସନ୍ଦେହ କରାଯାଉଛି ।
ରବିବାର ଦିନ ଏହି ଦୁଇ ଲେଡି ଡନ୍ ରାସ୍ତାରେ ଯାଉଥିବା ଜଣେ ମହିଳାଙ୍କୁ ଧକ୍କା ଦେବା ସହ ଛୁରୀ ଦେଖାଇ ଧମକାଇ ଥିଲେ । ଯାହା ପରେ ଘଟଣାସ୍ଥଳରେ ଭିଡ ଜମିଥିଲା । ହେଲେ ସେହି ଦୁଇ ଜଣ ଉପସ୍ଥିତ ଅନ୍ୟ ଲୋକମାନଙ୍କୁ ମଧ୍ୟ ଛୁରୀ ଦେଖାଇବାକୁ ପଛାଇନଥିଲେ ।
ପରେ ଖବର ପାଇ ସରାଫା ବଜାର ପୋଲିସ ଘଟଣାସ୍ଥଳରେ ପହଞ୍ଚିବା ସହ ଦୁଇ ଜଣଙ୍କୁ ଧରି ଥାନା ନେଇଯାଇଥିଲା । ଏନେଇ ଏଏସପି ରାଜେଶ ବ୍ୟାସ୍ କହିଛନ୍ତି, ଯୁବତୀଙ୍କ ସମ୍ପର୍କରେ ଅଧିକ ଜାଣିବା ଲାଗି ଖୋଳତାଡ ଜାରି ରହିଛି । ଏଥିସହିତ ସେମାନେ ପୂର୍ବରୁ ଆଉ କେଉଁ ଅପରାଧିକ ମାମଲାରେ ଜଡିତ ସେନେଇ ମଧ୍ୟ ଯାଞ୍ଚ ଜାରି ରହିଛି ।
