ଅନ୍ଲାଇନ୍ରେ ବିକ୍ରି ହେଉଛି କରୋନା ଭ୍ୟାକ୍ସିନ!: ସତର୍କ କରାଇଲା ଇଣ୍ଟରପୋଲ୍
1 min read
ନୂଆଦିଲ୍ଲୀ: କୋଭିଡି-୧୯ ଭ୍ୟାକ୍ସିନ୍ ଅପେକ୍ଷାରେ ଥିବା ବିଶ୍ୱବାସୀଙ୍କୁ ମିଳିଛି ଖୁସି ଖବର । ଫାଇଜର, ମଡେର୍ଣ୍ଣା, ଅକ୍ସଫୋର୍ଡ – ଆଷ୍ଟ୍ରାଜେନିକା ଭଳି ବଡ଼ ବଡ଼ ଫାର୍ମା କମ୍ପାନୀକୁ ଟିକାକରଣ ନେଇ ଡ୍ରଗ୍ସ ନିୟନ୍ତ୍ରକଙ୍କ ପକ୍ଷରୁ ଅନୁମତି ମିଳିଛି । ସବୁ ଦେଶ ଭ୍ୟାକ୍ସିନ୍ ପାଇବାକୁ ଚାହୁଁଛନ୍ତି କିନ୍ତୁ ଏହାର ସପ୍ଳାଏ ସୀମିତ । କରୋନା ଟିକା ନେଇ ସାରା ବିଶ୍ୱର ପ୍ରାୟ ସବୁ ସରକାର ସିଧାସଳଖ କମ୍ପାନୀଗୁଡ଼ିକ ସହିତ ଡିଲ୍ କରିଛନ୍ତି । ଯାହା ଦ୍ୱାରା ସରକାରଙ୍କ ଜରିଆରେ ଟିକାକରଣ କାର୍ଯ୍ୟକ୍ରମ ଅନୁଷ୍ଠିତ ହେବ । କିନ୍ତୁ ସାଧାରଣ ଲୋକଙ୍କ ନିକଟରେ ଟିକା ପହଞ୍ଚିବାରେ ସମୟ ଲାଗିବ, କାହିଁକି ନା ପ୍ରାୟ ସବୁ ଦେଶରେ କରୋନା ଦ୍ୱାରା ସଂକ୍ରମିତ ହେବାର ଅଧିକ ଆଶଙ୍କା ଥିବା ବା ପ୍ରଭାବିତ ହେବାର ଆଶଙ୍କା ଥିବା ଲୋକଙ୍କୁ ପ୍ରଥମେ ଟିକା ଦିଆଯାଉଛି । କିନ୍ତୁ ଏହି ପ୍ରକ୍ରିୟା ଅନୁଯାୟୀ ଟିକା ନେବାକୁ ବହୁ ଲୋକେ ନାରାଜ୍ । ଏହା ଦ୍ୱାରା ସେମାନେ ଟିକା ପାଇବାରେ ବିଳମ୍ୱ ହେବ ।
ଆଉ ଏହାର ଫାଇଦା ଉଠାଇବାକୁ ଚାହିଁ ବସିଛନ୍ତି ଅପରାଧୀ ଗୋଷ୍ଠୀ । କିଛି ଅପରାଧୀ ଗୋଷ୍ଠୀ ବ୍ୟବସ୍ଥିତ ଢଙ୍ଗରେ ଅନ୍ଲାଇନରେ ନକଲି ଟିକା ବିକ୍ରି ଆରମ୍ଭ କରିଦେଇଥିବା ଇଣ୍ଟରପୋଲ ସୂଚନା ଦେଇଛି । ତେବେ ପୂର୍ବ ସପ୍ତାହରେ ଏ ନେଇ ଇଣ୍ଟରପୋଲ୍ ପକ୍ଷରୁ ସତର୍କ ମଧ୍ୟ କରାଯାଇଥିଲା ।
ଇଣ୍ଟରପୋଲ୍ ସୂଚନା ମୁତାବକ ଏହି ଅର୍ଗନାଇଜଡ୍ କ୍ରାଇମ୍ ସିଣ୍ଡିକେଟ୍ ନକଲି ଟିକା ବିକ୍ରି କରିବାକୁ ଚେଷ୍ଟା କରୁଛି । ଏହି ଅପରାଧୀମାନେ ଭ୍ୟାକ୍ସିନର ସପ୍ଳାଏ ଚେନକୁ ପ୍ରଭାବିତ କରିବାକୁ ଚେଷ୍ଟା କରୁଛନ୍ତି । ଇଣ୍ଟରନେଟରେ ଗତ କିଛି ଦିନ ହେଲା ଟିକା ସମ୍ପର୍କିତ ଠକେଇ ବଢ଼ିବାରେ ଲାଗିଛି । ଡାର୍କନେଟ୍ ବା ଡାର୍କଓ୍ୱେବ୍ ଜରିଆରେ କରୋନା ଭ୍ୟାକ୍ସିନର ବିକ୍ରି ଜୋରଦାର ଚାଲିଛି । ‘୨୫୦ ଡଲାରେ କୋଭିଡ ଭ୍ୟାକ୍ସିନ୍’ ‘କୋଭିଡ-୧୯କୁ କୁହନ୍ତୁ ବାଏ ବାଏ, ‘ଆସିଗଲ କରୋନା ଭ୍ୟାକ୍ସିନ୍, ଶୀଘ୍ର କିଣନ୍ତୁ, ଭଳି ଲାଇନ୍ ଲେଖି ଲୋକଙ୍କୁ ଆକୃଷ୍ଟ କରାଯାଉଛି । .
କିନ୍ତୁ ପ୍ରକୃତ କଥା ହେଉଛି କରୋନା ଭ୍ୟାକ୍ସିନ୍ ବ୍ୟକ୍ତିଗତ ସ୍ତରରେ ଉପଲବ୍ଧ ନାହିଁ । ଫାର୍ମା କମ୍ପାନୀ ସହିତ ଡିଲ୍ ହୋଇଥିବାରୁ ପ୍ରଥମରେ ସରକାରଙ୍କୁ ହିଁ ଏହା ହସ୍ତାନ୍ତର କରାଯିବ । ସବୁ ଦେଶ ଟିକାକରଣର ବିସ୍ତୃତ କାର୍ଯ୍ୟକ୍ରମ ପ୍ରସ୍ତୁତ କରାଯାଇଛି, ଯେଉଁଥିରେ ପ୍ରତ୍ୟେକ ଟିକାର ହିସାବ ରଖାଯିବ ।
