ଇରାନରେ ଜଳୁଛି ହିଜାବ ବିରୋଧୀ ନିଆଁ; ପ୍ରାଣ ହରାଇଲେଣି ୩୧ ନାଗରିକ

ତେହରାନ: ଇରାନରେ ଜଳୁଛି ହିଜାବ ବିରୋଧୀ ନିଆଁ। ଦେଶର ଅଧିକାଂଶ ସ୍ଥାନରେ ହିଜାବ ବିରୋଧୀ ଆନ୍ଦୋଳନ ତୀବ୍ର ହୋଇଥିବାବେଳେ ପ୍ରାଣ ହରାଇଲେଣି ୩୧ ନାଗରିକ । ଆନ୍ଦୋଳନକୁ ନିୟନ୍ତ୍ରଣକୁ ଆଣିବା ଲାଗି ବିଭିନ୍ନ ସ୍ଥାନରେ ଇଣ୍ଟରନେଟ ସେବା ରଦ୍ଦ କରାଯାଇଛି। ପାଲିସ ହେପାଜତରେ ଥିବାବେଳେ ମହସା ଆମିନି ନାମ୍ନୀ ମହିଳାଙ୍କ ମୃତ୍ୟୁକୁ କେନ୍ଦ୍ର କରି ଇରାନରେ ବଢ଼ିଚାଲିଛି ହିଜାବ ବିରୋଧୀ ଆନ୍ଦୋଳନ। ଇସଲାମିକ ଡ୍ରେସ କୋଡକୁ ଉଲ୍ଲଂଘନ କରିଥିବାରୁ ଇରାନ ପୋଲିସ ୨୩ ବର୍ଷ ବୟସ୍କା ମହସା ଆମିନିଙ୍କୁ ଅଟକ ରଖିଥିଲା। ତେବେ ପୋଲିସ ହେପାଜତରେ ଥିବାବେଳେ ତାଙ୍କର ମୃତ୍ୟୁ ଘଟିଥିଲା।

ସର୍ବସାଧାରଣରେ ଆନ୍ଦୋଳନକାରୀ ମହିଳା ହିଜାବ ପୋଡିବା ସହ ନିଜର କେଶ କାଟିବା ଦେଖାଯାଉଛି। ୩୦ରୁ ଅଧିକ ସହରରେ ଆନ୍ଦୋଳନ ତୀବ୍ର ହୋଇଥିବାବେଳେ ୬ ଦିନ ଧରି ପ୍ରତିବାଦ ଥମିବା ପରିବର୍ତ୍ତେ ବଢ଼ିବାରେ ଲାଗିଛି । ସେପଟେ ଇରାନ ରାଷ୍ଟ୍ରପତି ଇବ୍ରାହିମ ରାଇସି ଇଚ୍ଛା ପ୍ରକାଶ କରିବାର ଅଧିକାରକୁ ସମର୍ଥନ ଜଣାଇଥିବାବେଳେ ହିଜାବ ବିରୋଧୀ ଆନ୍ଦୋଳନକୁ ସମାଲୋଚନା କରିଛନ୍ତି। ଆନ୍ଦୋଳନକୁ ଦବାଇବା ଲାଗି ହ୍ୱାଟସଆପ ଓ ଇନଷ୍ଟାଗ୍ରାମ ସେବା ଉପରେ କଟକଣା ଲଗାଯାଇଛି । ତେଣେ ଆନ୍ଦୋଳନକୁ ବିରୋଧୀଙ୍କ ଏକ ଷଡ଼ଯନ୍ତ୍ର ବୋଲି ଅଭିଯୋଗ କରିଛି ଇରାନର ଶକ୍ତିଶାଳୀ ଇସଲାମିକ ରିଭଲ୍ୟୁସନାରୀ ଗାର୍ଡ କର୍ପସ। ସେପଟେ ଆମେରିକାର ଜଣେ ସାମ୍ବାଦିକା ହିଜାବ ପିନ୍ଧିବାକୁ ଅଗ୍ରାହ୍ୟ କରିବାରୁ ସାକ୍ଷାତକାର କାର୍ଯ୍ୟକ୍ରମକୁ ବାତିଲ କରିଛନ୍ତି ଇରାନ ରାଷ୍ଟ୍ରପତି ଇବ୍ରାହିମ।