ରାମ ମନ୍ଦିର ତଳେ ଟାଇମ୍ କ୍ୟାପସୁଲ,ହଜାରେ ବର୍ଷେ ପରେ ହେବ ଡିକୋଡ୍ !

1 min read
Spread the love

ଅଯୋଧ୍ୟା ରାମ ମନ୍ଦିରର ୨ଶହ ଫୁଟ ତଳେ ଏକ ଟାଇମ୍ କ୍ୟାପସୁଲ ରଖାଯିବ । ଏହି ଟାଇମ୍ କ୍ୟାପସୁଲ ଗୋଟିଏ ପ୍ରକାରର ଐତିହାସିକ ଦସ୍ତାବିଜ ହେବ । ତେବେ ମାଟିତଳେ ୨ଶହ ଫୁଟ ତଳେ କ’ଣ ପାଇଁ ଟାଇମ୍ କ୍ୟାପସୁଲ ରଖାଯିବ ? ଏହାର ଉତ୍ତର ହେଉଛି ଆଜିଠୁ ହଜାର ବର୍ଷ ତଳେ ଯଦି କେବେ କୌଣସି କାରଣରୁ ରାମ ମନ୍ଦିର ଉତଖନନ ହୁଏ ତେବେ ସେତେବେଳେ ଲୋକ ରାମ ଜନ୍ମଭୁମି ବାବଦରେ ଜାଣି ପାରିବେ । କାରଣ ଟାଇମ୍ କ୍ୟାପସୁଲ ଭିତରେ ରାମ ମନ୍ଦିରର ଇତିହାସଠାରୁ ଏହାକୁ ନେଇ ଥିବା ବିବାଦ ବାବଦରେ ତଥ୍ୟ ରହିଛି । ତେଣୁ ହଜାର ବର୍ଷ ତଳେ ଯଦି କେବେ ପୁଣିଥରେ ଖନନ ହୁଏ ତେବେ ରାମ ଜନ୍ମଭୂମିକୁ ନେଇ କୌଣସି ସନ୍ଦେହ ରହିବ ନାହିଁ ।

ଟାଇମ୍ କ୍ୟାପସୁଲ କହିବ ରାମ ମନ୍ଦିରର ଇତିହାସର କଥା  । ଖୋଲିବ ବିବାଦର ଫର୍ଦ । ଟାଇମ୍ କ୍ୟାପସୁଲରେ ରହିବ ହିନ୍ଦୁ ଆସ୍ଥା ଓ ସଂଘର୍ଷର କଥା ସବୁଦିନ ପାଇଁ  ।ତେବେ ପ୍ରଶ୍ନ ହେଉଛି ଟାଇମ୍ କ୍ୟାପସୁଲ କ’ଣ ? ଏହା କେମିତି କାମ କରିଥାଏ ? ଆଗରୁ କ’ଣ ଭାରତରେ କିମ୍ବା ଭାରତ ବାହାରେ ଏମିତି କିଛି ହୋଇଛି କି ? ଆସନ୍ତୁ ଜାଣିବା ଟାଇମ୍ କ୍ୟାପସୁଲ ବାବଦରେ । ଡିକୋଡ୍ କରିବା ଟାଇମ୍ କ୍ୟାପସୁଲର ରହସ୍ୟ ।

ଟାଇମ୍ କ୍ୟାପସୁଲ କ’ଣ ?

time capsule

ଟାଇମ କ୍ୟାପସୁଲ ଗୋଟିଏ ବକ୍ସ । ଯାହାର ଆକାର ଅଲଗା ଅଲଗା ପ୍ରକାରର ହୋଇଥାଏ । ସାଧାରଣତଃ ଏହାକୁ ତମ୍ବାରେ ତିଆରି କରାଯାଇଥାଏ । ତମ୍ବା ମାଟିତଳେ ରହିଲେ ମଧ୍ୟ ଅଧିକ ଦିନ ପର୍ଯ୍ୟନ୍ତ ସୁରକ୍ଷିତ ରହିଥାଏ । ତମ୍ବା ବକ୍ସ ମଧ୍ୟରେ ରଖାଯାଇଥିବା ଜିନିଶ ଅଧିକ ଦିନ ସୁରକ୍ଷିତ ରହିଥାଏ । ଅନ୍ୟପକ୍ଷରେ ଲୁହାରେ ତିଆରି ବକ୍ସ ମାଟି ତଳେ ରହିବା ଦ୍ୱାରା ଏଥିରେ ଜଂକ୍ ଲାଗିଥାଏ । ଲୁହା ବାକ୍ସରେ ଥିବା ସାମଗ୍ରୀ ଅଳ୍ପ ଦିନ ମଧ୍ୟରେ ନଷ୍ଟ ହୋଇଯାଇଥାଏ । କୌଣସି ପ୍ରକାରର କେମିକାଲ ରିଆକ୍ସନରୁ ସୁରକ୍ଷିତ ରହୁଥିବା ଟାଇମ୍ କ୍ୟାପସୁଲ ଏତେ ମଜବୁତ ହୋଇଥାଏ ଯେ, ଏହା ସବୁ ପ୍ରକାରର ପାଣିପାଗ ଓ ପରିସ୍ଥିତିରେ ମଧ୍ୟ ମାଟି ତଳେ ସୁରକ୍ଷିତ ରହିଥାଏ । ଅତିତରେ ମଧ୍ୟ ଟାଇମ୍ କ୍ୟାପସୁଲର ପ୍ରଚଳନ ଥିଲା । ସେତେବେଳେ କାଚ ବୋତଲକୁ ଟାଇମ୍ କ୍ୟାପସୁଲ ଭାବେ ବ୍ୟବହାର କରାଯାଉଥିଲା

ଟାଇମ୍ କ୍ୟାପସୁଲର ଉଦ୍ଦେଷ୍ୟ କ’ଣ ?

time capsule

ମାଟି ତଳେ ଗଭିରତା ଭିତରେ ଟାଇମ୍ କ୍ୟାପସୁଲ ରଖିବାର ଉଦ୍ଦେଷ୍ୟ ହେଉଛି ଶହ ଶହ-ହଜାର ହଜାର ବର୍ଷ ପରେ ମଧ୍ୟ ସେହି ସ୍ଥାନ ସହ ଜଡିତ ଇତିହାସ ବାବଦରେ ତଥ୍ୟ ସୁରକ୍ଷିତ ରହିବ । ଯେମିତି କି ଯଦି କୌଣସି ଭୟକଙ୍କର ପ୍ରାକୃତିକ ବିପର୍ଯ୍ୟୟ କାରଣରୁ ଅନେକ କିଛି ନଷ୍ଟ ହୋଇଯିବ ଓ ଅନେକ ବର୍ଷ ପରେ ପ୍ରତ୍ନତତ୍ୱବିତ୍ ,ଐତିହାସରିକ ଉକ୍ତସ୍ଥାନର ଖନନ କରି ସେହି ସ୍ଥାନ ବାବଦରେ ଜାଣିବାକୁ ଉଦ୍ୟମ କରନ୍ତି,ତେବେ ସେମାନଙ୍କୁ ଟାଇମ୍ କ୍ୟାପସୁଲ ମିଳିବ । ଟାଇମ୍ କ୍ୟାପସୁଲରେ ଥିବା ତଥ୍ୟରୁ ଜଣା ପଡିବ ଉକ୍ତ ସ୍ଥାନର ଇତିହାସ କ’ଣ ଥିଲା । ଅର୍ଥାତ ଭବିଷ୍ୟ ପାଇଁ ଇତିହାସକୁ ସୁରକ୍ଷିତ ଓ ସଂଗ୍ରହିତ କରି ରଖିବା ହେଉଛି ଟାଇମ୍ କ୍ୟାପସୁଲର ମୁଳ ଲକ୍ଷ୍ୟ ।

ଭାରତରେ ଆଗରୁ ଏମିତି କିଛି ହୋଇଛି କି  ?

indira time capsule

ତେବେ ରାମ ମନ୍ଦିରର ମାଟି ତଳେ ଟାଇମ୍ କ୍ୟାପସୁଲକୁ ସୁରକ୍ଷିତ କରିବା କ’ଣ ଭାରତ ଇତିହାସର ପ୍ରଥମ ଘଟଣା ? ଭାରତ କ’ଣ ପ୍ରଥମ ଥର ପାଇଁ ଭବିଷ୍ୟ ପୀଢି ଲାଗି ଇତିହାସକୁ ସୁରକ୍ଷିତ ରଖିବା ଉଦ୍ଦେଷ୍ୟରେ ଏମିତି କରାଯାଉଛି କି ? ଉତ୍ତର ହେଉଛି ନା । ଭାରତରେ ଆଗରୁ ଅନେକ ଥର ଟାଇମ୍ କ୍ୟାପସୁଲକୁ ମାଟି ତଳେ ପୋତା ଯାଇଛି । ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଲାଲକିଲ୍ଲା ତଳେ ଏକ ଟାଇମ୍ କ୍ୟାପସୁଲକୁ ସବୁଦିନ ପାଇଁ ରଖିଥିଲେ । ୧୯୭୦ ଦଶକର ଆରମ୍ଭରେ ଏହି ଘଟଣା ଘଟିଥିଲା । ସେତେବେଳେ ଇନ୍ଦିରା ଗାନ୍ଧୀଙ୍କ ଲୋକପ୍ରିୟତା ଚରମରେ ଥିଲା । ଇନ୍ଦିରା ଲାଲକିଲ୍ଲାରେ ମାଟି ତଳେ ୩୨ ଫୁଟ ତଳେ ଟାଇମ୍ କ୍ୟାପସୁଲ ରଖିଥିଲେ । ଏହି ଟାଇମ୍ କ୍ୟାପସୁଲରେ ସ୍ୱାଧିନତା ପରଠାରୁ ୨୫ ବର୍ଷ ପର୍ଯ୍ୟନ୍ତ ଘଟିଥିବା ଘଟଣା ବାବଦରେ ତଥ୍ୟ ରହିଥିଲା ।

ଇନ୍ଦିରାଙ୍କ ଟାଇମ୍ କ୍ୟାପସୁଲକୁ ନେଇ ହୋଇଥିଲା ବିବାଦ

indira modi time

ଇନ୍ଦିରା ଟାଇମ୍ କ୍ୟାପସୁଲକୁ ମାଟି ତଳେ କବର ଦେଇଥିଲେ । କିନ୍ତୁ ଏହାପରେ ଆରମ୍ଭ ହୋଇଥିଲା ରାଜନୈତିକ ବିବାଦ । ଏମରଜେନ୍ସୀ ଲାଗୁ କରିବା ପରେ ଭାରତୀୟ ରାଜନୀତିର ଦୁର୍ଗା ପାଲଟିଯାଇଥିଲେ ସବୁଠୁ ବଡ ଖଳନାୟିକା । ୧୯୭୫ ପରେ ହୋଇଥିବା ନିର୍ବାଚନରେ ଇନ୍ଦିରାଙ୍କୁ କ୍ଷମତା ଛାଡିବାକୁ ପଡିଥିଲା । କଂଗ୍ରେସ ସ୍ଥାନରେ ଆସିଥିଲା ଜନତା ପାର୍ଟି ସରକାର । ଆଉ ଏହି ସମୟରେ ଇନ୍ଦିରା ଲାଲକିଲ୍ଲାରେ ପୋତିଥିବା ଟାଇମ୍ କ୍ୟାପସୁଲକୁ ପୁଣିଥରେ ବାହାର କରିବାକୁ ନିଷ୍ପତି ନିଆଯାଇଥିଲା । ଏବେ ଆପଣଙ୍କ ମନରେ ପ୍ରଶ୍ନ ଉଠୁଥିବ କାହିଁକି ? ଉତ୍ତର ହେଉଛି ସେତେବେଳେ ବିରୋଧୀଙ୍କ ଅଭିଯୋଗ ଥିଲା ଯେ, ଏହି ଟାଇମ୍ କ୍ୟାପସୁଲରେ ଇନ୍ଦିରାଙ୍କ ପରିବାର ବାବଦରେ ହିଁ ତଥ୍ୟ ରହିଛି । ଗାନ୍ଧୀ-ନେହେରୁ ପରିବାରକୁ ମହିମା ମଣ୍ଡିତ କରିବା ସହ ଦେଶର ଅନ୍ୟ ନେତାଙ୍କ ଅବଦାନକୁ ଭବିଷ୍ୟ ପୀଢି ନଜରରୁ ଦୁରେଇ ରଖିବା ପାଇଁ କ୍ୟାପସୁଲରେ କେବଳ ଗୋଟିଏ ପରିବାରର ଯୋଗଦାନ କଥା ଉଲ୍ଲେଖ କରାଯାଇଛି ବୋଲି ଅଭିଯୋଗ ଉଠିଥିଲା । ଅଭିଯୋଗକୁ ନେଇ ରାଜନୈତିକ ବିବାଦ ଆରମ୍ଭ ହେବା ପରେ ତତ୍କାଳୀନ ପ୍ରଧାନମନ୍ତ୍ରୀ ମୋରାରଜୀ ଦେଶାଇଙ୍କ ଆଦେଶରେ ଟାଇମ୍ କ୍ୟାପସୁଲକୁ ତା’ ସମୟ ଆଗରୁ ଖୋଳି ବାହାର କରାଯାଇଥିଲା । ତେବେ ଟାଇମ୍ କ୍ୟାପସୁଲରୁ ବାହାରିଥିଲା କ’ଣ ? ସେଥିରେ କ’ଣ କେବଳ ଗୋଟିଏ ପରିବାର କଥା କୁହାଯାଇଥିଲା ? ଏହାର ଉତ୍ତର କାହା ପାଖରେ ନାହିଁ  । କାରଣ ସେତେବେଳର ସରକାର କିମ୍ବା ତା’ ପରେ ଆସିଥିବା ସରକାର ଟାଇମ୍ କ୍ୟାପସୁଲରେ କ’ଣ ଥିଲା ତାକୁ ନେଇ କିଛି ମଧ୍ୟ କହିନଥିଲେ । ଇନ୍ଦିରାଙ୍କ ଟାଇମ୍ କ୍ୟାପସୁଲକୁ ନେଇ ବିରୋଧୀ ଓ ସମର୍ଥକଙ୍କ ମୁହଁ ଆଜି ମଧ୍ୟ ସିଲ୍ ଅଛି

ବିଦେଶରେ ମଧ୍ୟ ଟାଇମ୍ କ୍ୟାପସୁଲର ଚଳନ ରହିଛି

ଅନ୍ତର୍ଜାତୀୟ ସ୍ତରରେ ମଧ୍ୟ ଟାଇମ୍ କ୍ୟାପସୁଲକୁ ନେଇ ମଝିରେ ମଝିରେ ଚର୍ଚ୍ଚା ହୋଇଥାଏ । ତେବେ ପ୍ରଥମ ଟାଇମ୍ କ୍ୟାପସୁଲ କେବେ ଓ କିଏ ତିଆରି କରିଥିଲା ତାକୁ ନେଇ ବିବାଦ ରହିଛି । ନିକଟରେ ପବନର ଚାପ ଓ ଦୀଗର ସୂଚନା ଦେଉଥିବା ଆକାରର ଏକ ଟାଇମ୍ କ୍ୟାପସୁଲ ଆବିଷ୍କୃତ ହୋଇଥିଲା । ଯାହାକୁ ୧୭୪୨ ମସିହାରେ ତିଆରି କରାଯାଇଥିଲା । ସେହିଭଳି ସ୍ପେନରୁ ୨୦୧୭ ମସିହାରେ ଜିଶୁଙ୍କ ଆକାରର ଗୋଟିଏ ଟାଇମ୍ କ୍ୟାପସୁଲ ମିଳିଥିଲା ।ଏଥିରେ ୧୭୭୭ରେ ସ୍ପେନର ଆର୍ଥିକ ଓ ସାମାଜିକ ସ୍ଥିତି କ’ଣ ଥିଲା ତାହା ବାବଦରେ ସୂଚନା ରହିଥିଲା ।

ଟାଇମ୍ କ୍ୟାପସୁଲର ତାରିଖ ନିର୍ଧାରଣ କରି ମଧ୍ୟ ପୋତା ଯାଇଥାଏ

 

ଏହା ଜୁରୁରୀ ନୁହେଁ ଯେ, ଟାଇମ୍ କ୍ୟାପସୁଲକୁ ଅନିଶ୍ଚିତ ସମୟ ପାଇଁ ମାଟି ତଳେ ପୋତି ଦିଆଯାଇଥାଏ । ଅନେକ ଥର ଗୋଟିଏ ନିର୍ଦ୍ଧିଷ୍ଟ ତାରିଖରେ ଟାଇମ୍ କ୍ୟାପସୁଲ ଖୋଲିବା ପାଇଁ ସିଡ୍ୟୁଲ କରାଯାଇଥାଏ । ଏହାପରେ ତାକୁ ପୋତା ଯାଇଥାଏ । ମାନେ ଟାଇମ୍ କ୍ୟାପସୁଲ ମାଟି ତଳେ ପୋତିବା ଆଗରୁ ଏହା ନିର୍ଧାରିତ କରାଯାଇଥାଏ ଯେ,ତାକୁ କେବେ ଖୋଲାଯିବ । ଉଦାହରଣ ଭାବେ ଜର୍ଜିଆର ଟାଇମ୍ କ୍ୟାପସୁଲକୁ ନିଆଯାଉ । ୧୯୪୦ ମସିହାରେ ଜର୍ଜିଆରେ ଟାଇମ୍ କ୍ୟାପସୁଲକୁ ମାଟିତଳେ ପୋତାଯାଇଥିଲା । ଆଉ ତାକୁ କେବେ ମାଟିତଳୁ ବାହାର କରାଯିବ ସେ ନେଇ ମଧ୍ୟ ବର୍ଷ ନିର୍ଧାରିତ କରାଯାଇଥିଲା । ଜର୍ଜିଆ ସରକାର ନିଷ୍ପତି ନେଇଥିଲେ ଯେ, ଯଦି ମାନବ ସଭ୍ୟତା ପୃଥିବୀରେ ତିଷ୍ଟିଥିବ ତେବେ ୮ହଜାର ୧୧୩ ମସିହାରେ ଏହି ଟାଇମ୍ କ୍ୟାପସୁଲକୁ ବାହାର କରାଯିବ । ଏହାର ଉଦ୍ଦେଷ୍ୟ ଥିଲା ଭବିଷ୍ୟ ପୀଢିକୁ ଏହି ସୂଚନା ଦେବା ଯେ, ଅତିତରେ ସଭ୍ୟତା କେମିତି ଥିଲା ଓ ପରେ କ’ଣ ହେଲା । ଏହାକୁ ସେଡ୍ୟୁଲ୍ଡ ଟାଇମ୍ କ୍ୟାପସୁଲ କୁହନ୍ତି । ସେହିଳି ଲେଖିକା ମାର୍ଗେରେଟ୍ ଆଟଉଡଙ୍କ କିଛି ଅପ୍ରକାଶିତ ଉପନ୍ୟାସ ମଧ୍ୟ ଟାଇମ୍ କ୍ୟାପସୁଲରେ ଅଛି । ଯାହା ୨୧୧୪ ମସିହାରେ ପ୍ରକାଶିତ ହେବ

time capsule

ଟାଇମ୍ କ୍ୟାପସୁଲକୁ ନେଇ ବିଶେଷଜ୍ଞଙ୍କ ଆପତି

ତେବେ ଐତିହାସିକ ଓ ପ୍ରତ୍ନତତ୍ୱବିତଙ୍କ କହିବା ହେଉଛି ଅନେକ ସମୟରେ ଟାଇମ୍ କ୍ୟାପସୁଲରେ ଅଦରକାରୀ ତଥ୍ୟ ଦିଆଯାଇଥାଏ ।  ଯେମିତିକି କୌଣସି ଶାସକଙ୍କୁ ମହିମା ମଣ୍ଡିତ କଲା ଭଳି ତଥ୍ୟ । ଐତିହାସିକଙ୍କ କହିବା ହେଲା ଏଭଳି ତଥ୍ୟ ଭବିଷ୍ୟତର ଐତିହାସିକଙ୍କୁ ମିଳିଲେ କୌଣସି ଲାଭ ହେବ ନାହିଁ । ସେମାନଙ୍କର ଏହା ମଧ୍ୟ କହିବା ହେଉଛି ଟାଇମ୍ କ୍ୟାପସୁଲରେ ଥିବା ସାମଗ୍ରୀ ଯଦି କମ୍ପ୍ୟୁଟର ଭାଷାରେ ରହିବ ତେବେ ଏମିତି ବି ହୋଇପାରେ ଭବିଷ୍ୟତରେ ତାହା ବେକାର ହୋଇଯିବ । ଭବିଷ୍ୟତର ଟେକନିକ୍ ଏତେ ଆଗକୁ ଯାଇଥିବ ଯେ, ଆମ ଟେକନିକ୍ ପୁରୁଣା ଓ ଅଚଳ ହୋଇଯାଇଥିବ । ଏମିତିରେ ତଥ୍ୟକୁ ଡିକୋଡ୍ କରାଯାଇ ପାରିବ ନାହିଁ । ଭାଷା ସହ ମଧ୍ୟ ଏହି ସମସ୍ୟା ରହିଛି । ସେମାନଙ୍କ କହିବା ହେଉଛି ଲିଖିତ ଭାଷା ସାମଗ୍ରୀ ବଦଳରେ ଭିଡିଓ କିମ୍ବା ଚିତ୍ର ରଖାଯାଉ । ତେବେ ବର୍ତ୍ତମାନ ପର୍ଯ୍ୟନ୍ତ ଲିଖିତ ଓ ଡିଜିଟାଲ ଉପାୟ ଉପରେ ହିଁ ଭରଷା କରାଯାଉଛି ।

Leave a Reply

Your email address will not be published. Required fields are marked *

Close Bitnami banner