ଝୁଲୁଛି ଗିରଫଦାରୀ ଖଣ୍ଡା ! ରିୟାଙ୍କୁ ଆଜି ପୁଣି ଜେରା କରିବ ଏନସିବି, ସେପଟେ ସତ ଓଗାଳୁଛନ୍ତି ସୌଭିକ ଓ ସାମୁଏଲ
ମୁମ୍ବାଇ: ସୁଶାନ୍ତ ମୃତ୍ୟୁ ମାମଲାରେ ଡ୍ରଗ୍ସ କନେକ୍ସନ୍ ନେଇ ଏନସିବିର ତନାଘନା । ଗତକାଲି ୬ଘଣ୍ଟା ଜେରା ପରେ ଆଜି ପୁଣି ରିୟାଙ୍କୁ ହେବ ପଚରାଉଚରା । କାଲି ଜେରା ବେଳେ ଅନେକ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ରିୟା ମୁହଁ ଖୋଲିଥିବା ସୂଚନା ମିଳିଛି । ମାର୍ଚ୍ଚ ୧୭ରେ ସାମୁଏଲ୍ ମିରାଣ୍ଡା ଡ୍ରଗ୍ସ ଆଣିବାକୁ ଜୈଦଙ୍କ ନିକଟକୁ ଯାଇଥିଲେ । ଏସଂପର୍କରେ ରିୟା ଜାଣିଥିଲେ ।
କେବଳ ସେତିକି ନୁହେଁ, ରିୟା ଓ ସୌଭିକ ଡ୍ରଗ୍ସ ଡିଲରଙ୍କ ସହ ଡ୍ରଗ୍ସ ପାଇଁ କୋଅର୍ଡିନେସନ୍ କରୁଥିବା ମାନିଛନ୍ତି । ଭାଇ ସୌଭିକଙ୍କ ଦ୍ୱାରା ସୁଶାନ୍ତଙ୍କ ପାଇଁ ରିୟା ଡ୍ରଗ୍ସ ମଗାଉଥିଲେ । ଏଥିସହ ଡ୍ରଗ୍ସ ପେଡଲର ବାସିତଠାରୁ ସୌଭିକ, ସୁଶାନ୍ତଙ୍କ ପାଇଁ ଡ୍ରଗ୍ସ କିଣୁଥିବା ସେ ଜାଣିଥିଲେ ବୋଲି ରିୟା ମାନିଛନ୍ତି । ରିୟାଙ୍କ ଘରକୁ ମଧ୍ୟ ଯିବାଆସିବା କରୁଥିଲା ବାସିତ ।
ରିୟା ଚକ୍ରବର୍ତ୍ତୀଙ୍କ ଭାଇ ସୌଭିକଙ୍କ ସମେତ ୭ଜଣଙ୍କୁ ଗିରଫ କରିଛି ଏନସିବି । ରିୟାଙ୍କ ଉପରେ ମଧ୍ୟ ଗିରଫଦାରୀ ଖଣ୍ଡା ଝୁଲୁଛି । ତାଙ୍କୁ ଗିରଫ କରାଯିବା ନେଇ ଆଶଙ୍କା ଦେଖାଦେଇଛି ।
