ବାହାଘରର ଦିନକ ପୂର୍ବରୁ ବରକୁ ଟାର୍ଗେଟ୍, ଘର ଆଗରେ ଗୁଳି କଲେ ମୁଖାଧାରୀ ଦୁର୍ବୃତ୍ତ

ବ୍ରହ୍ମପୁର: ଅଶାନ୍ତ ହେଉଛି ଗଞ୍ଜାମ । ଗର୍ଜୁଛି ମାଉଜର । ବାହାଘର ଦିନକ ପୂର୍ବରୁ ଫୁଟିଲା ଗୁଳି । ବେଦୀକୁ ଯିବା ପୂର୍ବରୁ ଆହତ ହେଲେ ବର । ମଙ୍ଗଳବାର ସନ୍ଧ୍ୟାରେ ଗଞ୍ଜାମ ଜିଲ୍ଲା ଖଲ୍ଲିକୋଟ ଅଞ୍ଚଳରେ ଗୁଳିକାଣ୍ଡ ହୋଇଛି । ଖଲ୍ଲିକୋଟ ଥାନା ମଣିକପୁର ଗାଁରେ ଜଣେ ଯୁବକଙ୍କୁ ଗୁଳି କରି ଫେରାର ହୋଇଯାଇଛନ୍ତି ଦୁର୍ବୁତ୍ତ । ମୁଖାପିନ୍ଧା ଦୁର୍ବୃତ୍ତଙ୍କ ଗୁଳିମାଡ଼ରେ ମଙ୍ଗୁଳୁ ଦିହୁଡ଼ି ଗୁରୁତର ଆହତ ହୋଇଛନ୍ତି ।

ତେବେ, ଗୁଳିକାଣ୍ଡର କାରଣ ଅସ୍ପଷ୍ଟ ରହିଛି । ଗୁରୁତର ଆହତ ମଙ୍ଗୁଳୁକୁ ଖଲ୍ଲିକୋଟ ମେଡିକାଲରେ ଭର୍ତ୍ତି କରାଯାଇଛି । ମିଳିଥିବା ସୂଚନା ମୁତାବକ ଯୁବକ ଜଣଙ୍କର ଆସନ୍ତାକାଲି ବାହାଘର ରହିଛି । ଭୋଜି ସାମଗ୍ରୀ କିଣି ଘର ବାହାରେ ଛିଡ଼ା ହୋଇଥିବା ସମୟରେ ହଠାତ୍ କିଛି ମୁଖାଧାରୀ ଦୁର୍ବୃତ୍ତ ଆସି ମଙ୍ଗୁଳୁ ଉପରକୁ ଦୁଇ ରାଉଣ୍ଡ ଗୁଳିମାଡ଼ କରିବା ସହ ବୋମା ଫିଙ୍ଗିଥିଲେ । ଏଥିରେ ଗୁରୁତର ଆହତ ହୋଇଥିଲେ ମଙ୍ଗୁଳୁ ।