୧୬ଘଣ୍ଟା ଧରି ଚାଲିଥିବା କମାଣ୍ଡର ସ୍ତରୀୟ ବୈଠକ ଶେଷ

ନୂଆଦିଲ୍ଲୀ: ଭାରତ ଚୀନ ମଧ୍ୟରେ କମାଣ୍ଡରସ୍ତରୀୟ ଆଲୋଚନା ଶେଷ ହୋଇଛି । ୧୬ଘଣ୍ଟା ଧରି ଚାଲିଥିଲା କମାଣ୍ଡର ସ୍ତରୀୟ ବୈଠକ । ମୋଲ୍ଡୋରେ ହୋଇଥିବା ବୈଠକ ରାତି ୨ଟାରେ ଶେଷ ହୋଇଛି । ବିବାଦୀୟ କ୍ଷେତ୍ର ଗୋଗୋରା ହାଇଟ୍ସ, ହଟ ସ୍ପ୍ରିଙ୍ଗ, ଡେସପାଙ୍ଗ ନେଇ ଉଭୟ ପକ୍ଷ ମଧ୍ୟରେ ଆଲୋଚନା ହୋଇଥିଲା । ଭାରତ ପକ୍ଷରୁ ନେତୃତ୍ୱ ନେଇଥିଲେ ପିଜିକେ ମେନନ । ଲେପ୍ଟନାଣ୍ଟ ଜେନେରାଲ ମେନନ ଲେହରେ କମାଣ୍ଡର ଭାବେ ଅବସ୍ଥାପିତ ଅଛନ୍ତି ।

ସେପଟେ ଚୀନ ପକ୍ଷରୁ ନେତୃତ୍ୱ ନେଇଥିଲେ ମେଜର ଜେନେରାଲ ଲିଉ ଲିନ୍ । ଲିଉ ଦକ୍ଷିଣ ଶିନଜିଆଙ୍ଗ ସୈନ୍ୟ ଜିଲ୍ଲା କମାଣ୍ଡର ରହିଛିନ୍ତି  । ଭାରତ ଓ ଚୀନ ମଧ୍ୟରେ ଦଶମ କମାଣ୍ଡରସ୍ତରୀୟ ଆଲୋଚନାରେ ପୂର୍ବ ଲଦ୍ଦାଖର ହଟ୍ ସ୍ପ୍ରିଙ୍ଗସ, ଗୋଗରା ଓ ଦୀପସାଙ୍ଗ କ୍ଷେତ୍ରରୁ ମଧ୍ୟ ସୈନ୍ୟ ଅପସାରଣ ନେଇ ଆଲୋଚନା ହୋଇଛି । ଏଲଏସିରେ ବସିଥିବା ଏହି ବୈଠକ ଦୁଇ ଦେଶର ସମ୍ବନ୍ଧକୁ ନେଇ ଅତି ମହତ୍ୱପୂର୍ଣ୍ଣ ବୋଲି କୁହାଯାଉଛି ।  ପେଙ୍ଗଙ୍ଗ ହ୍ରଦର ଉତ୍ତର ଓ ଦକ୍ଷିଣ କ୍ଷେତ୍ରରୁ ଦୁଇଦେଶର ସେନା, ଅସ୍ତ୍ରଶସ୍ତ୍ର, ବଙ୍କର ଓ ଅସ୍ଥାୟୀ ନିର୍ମାଣ ହଟାଇବା କାର୍ଯ୍ୟ ଗୁରୁବାରଠାରୁ ଆରମ୍ଭ ହେଇସାରିଛି ।