ଟଙ୍କା ପାଇଁ ହୋଟେଲ୍ ଭୁଲିଲା କଟକଣା, ୭ ଦିନ ପାଇଁ ସିଲ୍

1 min read
Spread the love

ବ୍ରହ୍ମପୁର: ସଂକ୍ରମଣ ବଢ଼ୁଛି, ସତର୍କତା କମୁଛି । ଗଞ୍ଜାମ ଜିଲ୍ଲାରେ କରୋନା କାୟା ମେଲାଇ ଚାଲିଥିବା ବେଳେ କିଛି ଅମାନିଆ ମାନୁନାହାନ୍ତି ନିୟମ । ଆଇନ୍ ଆଖିରେ ଆଙ୍ଗୁଠି ଗେଞ୍ଜି ଭୁଲୁଛନ୍ତି କଟକଣା । ବିବାହ ଉତ୍ସବରେ ସର୍ବାଧିକ ୫୦ ଜଣଙ୍କୁ ସାମିଲ୍ ପାଇଁ ସରକାର ନିୟମ କରିଛନ୍ତି । କିନ୍ତୁ, କୋଭିଡ୍ ଆଇନକୁ ମାନୁଛି କିଏ । ସଂଖ୍ୟାଧିକ ଲୋକଙ୍କୁ ନେଇ ବିବାହ ଉତ୍ସବ କରିବା ମହଙ୍ଗା ପଡ଼ିଛି । ଗୋପାଳପୁର ମେ ଫେୟାର ହୋଟେଲକୁ ସିଲ୍ କରିଛି ଗଞ୍ଜାମ ଜିଲ୍ଲା ପ୍ରଶାସନ ।

କୋଭିଡ୍ ନିୟମ ଉଲ୍ଲଂଘନ କରିଥିବାରୁ ଜିଲ୍ଲା ପ୍ରଶାସନ ଏ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଗୋପାଳପୁର ସ୍ଥିତ ମେ ଫେୟାର ହୋଟେଲକୁ ୭ ଦିନ ପାଇଁ ସିଲ୍ କରି ଦିଆଯାଇଛି । ଗଞ୍ଜାମର ଜଣେ ପ୍ରତିଷ୍ଠିତ ବ୍ୟବସାୟୀ କୋଭିଡ୍ କଟକଣା ଭୁଲି ପୁଅ ବାହାଘରକୁ ଏହି ହୋଟେଲରେ ଧୁମଧାମରେ କରିଥିଲେ । ଉତ୍ସବରେ ଶହ ଶହ ଲୋକ ସାମିଲ୍ ହୋଇଥିବା ବେଳେ କାହା ମଧ୍ୟରେ ସାମାଜିକ ଦୂରତା ତ ଛାଡ଼ନ୍ତୁ ମୁହଁରେ ମାସ୍କ ବି ନଥିଲା । ଏ ଦୃଶ୍ୟ ଭାଇରାଲ୍ ହୋଇଥିଲା ସାମାଜିକ ଗଣମାଧ୍ୟମରେ ।

ଏ ସମ୍ପର୍କିତ ଖବର ପ୍ରସାରଣ ପରେ ଜିଲ୍ଲା ପ୍ରଶାସନ ଆୟୋଜକଙ୍କୁ ୫୦ ହଜାର ଟଙ୍କା ଜରିମାନା କରିବା ସହ ଗୋପାଳପୁର ଥାନାରେ ମାମଲା ରୁଜୁ କରିଥିଲା । ଗଞ୍ଜାମ ପୋଲିସ ଘଟଣାରେ ୫ ଜଣଙ୍କୁ ଗିରଫ କରିଥିବା ବେଳେ ବିବାହରେ ବ୍ୟବହୃତ ସମସ୍ତ ଗାଡ଼ିକୁ ସିଜ୍ କରିବାକୁ ପରିବହନ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି ।

ନନ୍ଦିଘୋଷ ଟିଭି ମହାପ୍ରଭାବ : ବିବାହ ଶୋଭାଯାତ୍ରାରେ ନାଚିଥିଲେ ଶତାଧିକ ବରଯାତ୍ରୀ,ଏବେ ଦେବେ ଫାଇନ୍

Leave a Reply

Your email address will not be published. Required fields are marked *

Close Bitnami banner