ବନ୍ୟା ଜଳରେ ବୁଡ଼ି ଦୁଇ ଯୁବକଙ୍କ ମୃତ୍ୟୁ

ଯାଜପୁର: ରାଜ୍ୟରେ କିଛି ଦିନ ହେବ ବନ୍ୟା ପରିସ୍ଥିତି ଦେଖା ଦେଇଛି । ବନ୍ୟା ପାଣି ଧିରେ ଧିରେ କମିଛି କିନ୍ତୁ ରାଜ୍ୟର ଏବେ ବି ଅନେକ ଅଞ୍ଚଳ ବନ୍ୟା ପାଣିରେ ବୁଡ଼ି ରହିଛି । ୨୦୧୧ ପରେ ଏହା ହେଉଛି ବଡ଼ ବନ୍ୟା । ବନ୍ୟା ପାଇଁ ୨୦ଟି ଜିଲ୍ଲା ପ୍ରଭାବିତ ହୋଇଛି । ଅନେକ ପରିବାର ଏବେବି ଜଳମଗ୍ନ ହୋଇ ରହିଛି । ତେବେ ଅଧିକ ପ୍ରଭାବିତ ହୋଇଥିବା ଜିଲ୍ଲା ମଧ୍ୟରେ ଯାଜପୁର ରହିଛି । ଏବେ ବି ଯାଜପୁର ଜିଲ୍ଲାରେ ବନ୍ୟା ଜଳ ଭରି ରହିଛି । ଏଭଳି ପରିସ୍ଥିତିରେ ଏକ ଦୁଃଖଦ ଘଟଣା ଘଟିଯାଇଛି । ଯାଜପୁର ଜିଲ୍ଲା ବରୀ ବ୍ଲକ ମନ୍ଦାରି ପଞ୍ଚାୟତ ମେଦୁଆକୁଳ ଗାଁ ବ୍ରାହ୍ମଣୀ ନଦୀରେ ଓଲଟିଲା କଦଳୀ ଭେଳା । ଏହି ଅଘଟଣରେ ଦୁଇ ଜଣଙ୍କର ମୃତ୍ୟୁ ହୋଇଛି । ମୃତକ ମାନେ ହେଲେ ଶୁଭ୍ରଜିତ ବେହେରା (୨୪) ଓ ମିଟୁଲ ବେହେରା (୨୯) । ଛେଳି ଖାଦ୍ୟ ସଂଗ୍ରହ ପାଇଁ ଭେଳାରେ ଯାଉଥିବା ବେଳେ ବ୍ରାହ୍ମଣୀ ନଦୀରେ ଭେଳା ବୁଡିଯାଇଥିଲା । ସ୍ଥାନୀୟ ଲୋକେ ଜଣଙ୍କୁ ଉଦ୍ଧାର କରି ବରୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିବା ବେଳେ, ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ଅନ୍ୟ ଜଣେ ନିଖୋଜ ବ୍ୟକ୍ତିଙ୍କୁ ପରବର୍ତ୍ତୀ ସମୟରେ ଅଗ୍ନିଶମ ବାହିନୀ ଉଦ୍ଧାର କରିଥିଲା । କିନ୍ତୁ ଡାକ୍ତ ତାଙ୍କୁ ମଧ୍ୟ ମୃତ୍ୟୁ ଘୋଷଣା କରିଥିଲେ । ବରୀରେ ଆସିଥିବା ବନ୍ୟା ଯୋଗୁଁ ପ୍ରାୟ ୫ ଜଣଙ୍କର ମୃତ୍ୟୁ ହୋଇସାରିଲାଣି ।