ବିଶ୍ୱର ସବୁଠାରୁ ବଡ ନୌସେନା ଚୀନ୍ ପାଖରେ,ଭାରତ ମହାସାଗରରେ ରାଜ୍ ପାଇଁ ଲକ୍ଷ୍ୟ

ବିଶ୍ୱର ସବୁଠାରୁ ବଡ ନୌସେନା ତିଆରି କରିଛି ଚୀନ୍ । ଏହା ସହିତ ଖୁବ ଆଧୁନିକ ମଧ୍ୟ । ଗତ କିଛି ବର୍ଷ ମଧ୍ୟରେ ନୌସେନାରେ ଶକ୍ତି ବୃଦ୍ଧି କରିବା ଜାରି ରଖିଛି ଚୀନ୍ । ଏହାସହ ଭାରତକୁ ଘେରିବାକୁ ସମସ୍ତ ପ୍ରକାର ଉଦ୍ୟମ କରିଛି । ପାକିସ୍ତାନ, ଶ୍ରୀଲଙ୍କା, ମିଆଁମାରରେ ଚୀନ ନିଜର ନୌସେନା ଆଡ୍ଡା ବନେଇବାକୁ ଚେଷ୍ଟା କରୁଛି । କେବଳ ସେତିକି ନୁହେଁ ଇଣ୍ଡୋ ପେସିଫିକ ଅଞ୍ଚଳରେ ମଧ୍ୟ ନୌସେନାର ପେଣ୍ଠ ସ୍ଥଳୀ କରିବା ପାଇଁ ଚୀନ ଯୋଜନା କରୁଛି ।

ଚୀନ ପାଖରେ ଏବେ ୩୫୦ଟି ଯୁଦ୍ଧ ଜାହାଜ ଓ ବୁଡା ଜାହାଜ ରହିଛି । ଗଭୀର ସମୁଦ୍ରରେ ମଧ୍ୟ ଶତ୍ରୁପକ୍ଷକୁ ଆକ୍ରମଣ କରିବାର କ୍ଷମତା ରଖିଛି ଚୀନ । ଅନ୍ୟ ପକ୍ଷରେ ଆମେରିକା ପାଖରେ ୨୯୩ଟି ଯୁଦ୍ଧ ଜାହାଜ ରହିଛି । ତେବେ ଚୀନ ଠାରୁ ଆମେରିକା ପାଖରେ ଅଧିକ ବିମାନବାହୀ ଯୁଦ୍ଧପୋତ ରହିଛି ।   ଆମେରିକା ପାଖରେ ୧୧ଟି ଏୟାରକ୍ରାଫ୍ଟ କ୍ୟାରିୟର ଥିବା ବେଳେ ଚୀନ ପାଖରେ ମାତ୍ର ୨ଟି ଏୟାରକ୍ରାଫ୍ଟ କ୍ୟାରିୟର ରହିଛି ।

ତେବେ ଚୀନ ଆମେରିକାର ସମକକ୍ଷ ହେବାକୁ ବହୁ ଦିନ ହେବ ଉଦ୍ୟମ କରୁଛି । ଭାରତ ମହାସାଗରେ ଚୀନ ନିଜ ଆଧିପତ୍ୟ ବିସ୍ତାର କରିବା ପାଇଁ ଏକ ଶକ୍ତିଶାଳୀ ନୌସେନା ଆବଶ୍ୟକ କରୁଛି । ଗତ ୩୦ ବର୍ଷ ହେବ ଚୀନ ନିଜ ନୌସେନାର ବିକାଶ ଦିଗରେ ଅଧିକ ଅର୍ଥ ବ୍ୟୟ କରୁଛି ।