ବାହାଘରରେ ଯୋଗଦେବାକୁ ବୁକ୍ କରିଥିଲେ କାର୍, ଅଧାବାଟରୁ ଉଠାଇ ନେଲେ
ବୌଦ୍ଧ: କ୍ରିମିନାଲଙ୍କ କାର୍ କିଡନାପିଂ । ବାହାଘର ଯୋଗଦେବାକୁ କାର୍ ବୁକ୍ କଲେ, ଅଧାବାଟରୁ ଉଠାଇ ନେଲେ । ପୂରା ଫିଲ୍ମ ଷ୍ଟାଇଲରେ ଅପହରଣ । କାହାଣୀ ଲାଗୁଥିବା ଏ ଘଟଣା ସତ । ଏମିତି ଏକ ଅପରାଧୀ ଗ୍ୟାଙ୍ଗକୁ ଧରିଛି ବୌଦ୍ଧ ପୋଲିସ । ଗ୍ୟାଙ୍ଗର ୮ ଜଣଙ୍କୁ ପୋଲିସ ଗିରଫ କରିଥିବାବେଳେ ସେମାନଙ୍କ ନାଁରେ ନୟାଗଡ଼ ଓ ଖୋର୍ଦ୍ଧା ଜିଲ୍ଲାର ବିଭିନ୍ନ ଥାନାରେ ରହିଛି ଏକାଧିକ ଅପରାଧିକ ମାମଲା ।
ସୂଚନାଅନୁସାରେ ଗ୍ୟାଙ୍ଗର ୨ ଜଣ ସଦସ୍ୟ ବଲାଙ୍ଗିରରେ ଏକ ବିବାହ ଉତ୍ସବରେ ଯୋଗ ଦେବାକୁ ଭୁବନେଶ୍ୱରରୁ କାର୍ ବୁକ୍ କରିଥିଲେ । ଶନିବାର ବିଳମ୍ବିତ ରାତିରେ ବୁକିଂ ବାବଦକୁ ୫ ହଜାର ଟଙ୍କା ଅଗ୍ରୀମ ଦେଇ ଭୁବନେଶ୍ୱରରୁ ବାହାରିଥିଲେ ବଲାଙ୍ଗିର । ନୟାଗଡ଼ ପରେ ଡ୍ରାଇଭରଙ୍କୁ ହଇରାଣ କରି ଅପରାଧୀ ଏଣେତେଣେ ଜଙ୍ଗଲ ରାସ୍ତାରେ ବୁଲାଇଥିଲେ । ଅପହରଣ ଯୋଜନା ନେଇ ପୋଲିସ ସୂଚନା ପାଇବା ପରେ ବିଭିନ୍ନ ଚେକ୍ ଗେଟରେ ଯାଞ୍ଚ ଆରମ୍ଭ କରିଥିଲା ।
ପରେ ପୁରୁଣା କଟକ ଫରେଷ୍ଟ ଚେକ୍ ଗେଟରେ ରବିବାର ଟ୍ରାଭେରାକୁ ଧରିଛି ପୋଲିସ । ଗାଡ଼ିରୁ ୮ ଅପହରଣକାରୀଙ୍କୁ ଗିରଫ କରାଯାଇଥି । ସେମାନଙ୍କ ନିକଟରୁ ୨ଟି ବନ୍ଧୁକ, ୨ଟି ଭୁଜାଲି, ୨ଟି କଳାମୁଖା ଜବତ କରାଯାଇଛି । ସେମାନଙ୍କ ନାଁରେ କେଉଁ ସ୍ଥାନରେ ଆଉ କେଉଁ ମାମଲା ରହିଛି ତାର ତଦନ୍ତ ଚଳାଇଛି ବୌଦ୍ଧ ପୋଲିସ ।
