ମାଇକ୍ରୋମାକ୍ସ କହୁଛି, ଚାଲନ୍ତୁ ଚିନି କମ କରିବା…

ମୁମ୍ବାଇ:  ନଭେମ୍ବର ୩ରେ ଲଞ୍ଚ ହେବାକୁ ଯାଉଛି ଭାରତୀୟ ସ୍କାର୍ଟଫୋନ ମାଇକ୍ରୋମାକ୍ସର IN ମୋବାଇଲ ବ୍ରାଣ୍ଡ । ମାଇକ୍ରୋମାକ୍ସର ନିର୍ମାତା  ଶୁକ୍ରବାର ଦିନ ଏହି ଘୋଷଣା କରିଛନ୍ତି । ତେବେ ଏହାକୁ ମାଇକ୍ରୋମାକ୍ସର ଅଫିସିଆଲ ଟ୍ୱିଟର ହ୍ୟାଣ୍ଡେଲରେ ପୋଷ୍ଟ କରାଯାଇଛି । ମୋବାଇଲ ଲଞ୍ଚ କରିବା ସହିତ କମ୍ପାନୀ ‘ଆଓ କରେଁ ଥୋଡ଼ା ଚିନି କମ୍‌’ ଟ୍ୟାଗଲାଇନ ରଖିଛି । ତେବେ ଉକ୍ତ ଟ୍ୟାଗଲାଇନ ଗ୍ରାହକଙ୍କୁ ବେଶ୍‌ ଆକୃଷ୍ଟ କରିଛି । କେବଳ ଆକୃଷ୍ଟ କରିଛି ତାହା ନୁହେଁ ବରଂ ଦ୍ୱନ୍ଦରେ ମଧ୍ୟ ପକାଇଛି ।  ସୂଚନା ଅନୁସାରେ ମାଇକ୍ରୋମାକ୍ସର IN ରେଞ୍ଜ୍‌ର ମୋବାଇଲ ୩ ନଭେମ୍ବର ଦିନ ୧୨ଟାରେ ଲଞ୍ଚ ହେବାକୁ ଯାଉଛି ।

ଭିଡ଼ିଓ ଶେୟାର କରି ଚାଇନାର ମୋବାଇଲ ଫୋନ କମ୍ପାନୀ ଗୁଡ଼ିକୁ ସିଧାସଳଖ ଟାର୍ଗେଟ କରିଛି ଏହି ଭାରତୀୟ କମ୍ପାନୀ । କମ୍ପାନୀ ଉଚିତ୍ ‌ମୂଲ୍ୟରେ ଗ୍ରାହକଙ୍କ ପସନ୍ଦ ଅନୁସାରେ ମୋବାଇଲ ଫୋନ ଯୋଗାଇଦେବ ବୋଲି ଭିଡ଼ିଓ ମାଧ୍ୟମରେ ଜଣାଇଛି ।

Aao karein thodi cheeni kum! Gear up for the mega unveiling of the new #INMobiles range of smartphones by Micromax live at 12 noon on the 3rd of November. #INForIndia #BigAnnouncement #MicromaxIsBack #AatmanirbharBharat. pic.twitter.com/wjXIGipt47

— Micromax India (@Micromax__India) October 23, 2020

ସୂଚନାଯୋଗ୍ୟ ଗତ ୧୬ ଅକ୍ଟୋବରକୁ କମ୍ପାନୀର ସହ ନିର୍ମାତା ରାହୁଲ ଶର୍ମା ଭାରତୀୟ ସ୍ମାର୍ଟଫୋନ ଯୁଗରେ ସ୍ମାର୍ଟଫୋନର IN ରେଞ୍ଜ ନେଇ କମ୍ପାନୀ ପ୍ରତ୍ୟାବର୍ତ୍ତନ କରୁଥିବା ଘୋଷଣା କରିଥିଲେ । ଏହା ସହିତ ପ୍ରତିଦ୍ୱନ୍ଦି ଚାଇନିଜ୍‌ ମୋବାଇଲ କମ୍ପାନୀ ଗୁଡ଼ିକ ସହିତ କେଉଁ କାରଣ ପାଇଁ ମାଇକ୍ରୋମାକ୍ସ ପ୍ରତିଦ୍ୱନ୍ଦିତା କରିବାର ଉଦ୍ଦେଶ୍ୟ ରଖିଛି ତାହା ବିଷୟରେ ଜଣାଇଥିଲେ ।

ଗତ ୨୦୧୪ ମସିହାରେ ମାଇକ୍ରୋମାକ୍ସ ଭାରତର ଦ୍ୱିତୀୟ ବୃହତ୍ତମ ସ୍ମାର୍ଟଫୋନ ନିର୍ମାତା ଭାବରେ ପରିଗଣିତ ହେଉଥିଲା । କିନ୍ତୁ ସୁଲଭ ମୂଲ୍ୟରେ ୪ଜି ସ୍ମାର୍ଟଫୋନ ଯୋଗାଇବାରେ ସକ୍ଷମ ହୋଇନପାରିବାରୁ ସ୍ୱେଦେଶୀ କମ୍ପାନୀ ଗୁଡ଼ିକ ପଛରେ ପଡ଼ିଯାଇଥିଲେ । ଚାଇନା ବ୍ରାଣ୍ଡ ଗୁଡ଼ିକର ଚାହିଦା ଭାରତରେ ବଢିଯିବାରୁ କମ୍ପାନୀ ବଜାର  ହରାଇଥିଲା ।